USA, Tennessee Tyson Foods ah zuakding ak aki khawina ah Bird flu kimu

USA, Tennessee Tyson Foods ah zuakding ak aki khawina ah Bird flu kimu

Bird Flu Outbreak om ahih manin USA, Tennessee Chicken Farm khatah akikhawi ak tultampitak neknawnloh dingin ki susia, kipaisak cih AP News pan kiza hi. Tuabek thamlo tuamun panin tai 6 huamsung (Radius) aom Chicken Farms 30 te ah akikhawi ak tezong ki tuamkoihkhitsak cihi.

U.S. Department of Agriculture te genkhiatna ah Bird Flu aki muhkhiatna Tennessee Chicken Farm panin ak bekbek 73,500 tepen nekding in lauhuai ahih manin, ki susia, kipaisak cihi. Tua ak te tungpan in H7 Avian Influenza cih natna namkhat ki mukhia a, tua natna pen ak leh sai ak “Chickens & Turkeys” te adingin alauhuai mahmah natna khat cihi.

“Bird flu” cihpen ataktak in “Avian influenza” hizaw a, ak leh vasa (Poultry) namte tungpanin aki ngahthei Influenza natna namkhat ahihi. Hih Virus pen manlangtak in akte tungah ki lawhthei hi.

Bird flu angahkha ak leh vasa te ii huih dikkhakna, ahih keileh khoihkhakna panin mihingte tungah ki lawhsawnthei hi. Bird flu Virus tawh akidiah ak, vasa ahih keileh vankhatpeuh khoihkhakna panin tua nakhuttawh namit, nanak, nakam na khoihkhakleh na pumpi sungah manlangtak in Bird Flu Virus pen lutsuak theipah hi.

Abeisa in hih ak kikhawina Chicken Farm tepan akikhawi ak tepen Tyson Foods Inc ah akizuak te ahihi. Tyson Company in agenna ah hih Bird flu hangin asumzonna Business uh sukhaloding in ka lamen uh ci a, ahi zongin Bird flu angahkha ak tampitak ki zuakthei nawnlo in paihkul himawk hi. Tuaban ah hih Bird flu vai siansuah nadingin State and Federal Officials tetawh ki vaihawmkhawm hi ci’n Tyson Company in genkkhia hi.

Chicken Farm panin Bird flu aomleh aomlo hoihtak sitcianna kinei masa a, aomlo tebek nekding zuakna mun ah kipuak ci uhhi. Bird flu aki muhkhiat nakleh tua ak tepen kizangvet nawnlo hi ci’n mipi theihsakna nei uhhi.

More: A theihhuai Nattun natna (Influenza, Flu, Tot-kuae) ~ Dr. Thangboi

Nungdiak in China leh Europe gamsung ah Bird flu Outbreaks omngei himahleh tuate leh hih US gamsung ah apiang Bird flu te kibanglo cihi. USDA (United States Department of Agriculture) te genkhiatna ah Tennessee Chicken Farm ah H7 Bird flu pen bangnam cih kitheician nailo a, ahi zongin nai 48 sungin ki theihsawm cih genkhia uhhi. ZD Sawltak #zomidaily