USA ah phalna omlo in Sazuk abeng Kawlgammi 4 kiman

USA ah phalna omlo in Sazuk abeng Kawlgammi 4 kiman

USA, Indiana State sung aom ganhing kepcingna “Johnson County Wildlife” sungah pasal 4 in sazuk nabengmawk uh ahih manin, Officers te mat thuakpah uh cih Daily Journal pan kiza hi. (Disclaimer: Dr. Dal Lian ii bawl Dictionary sungah “deer = sazuk, ekneel hai sazuk, sanang, sathak” kici ahih manin, Sazuk ci’n konggelh uh ahihi)

Tua sazuk abengte pen midang nahihetlo in, Kawlgam sungpan ih omna kinaipih phadiakte nahi sawnsawn uhhi. Aminpen: Za Hmun, 29, Peter Linn, 25, Tawk Hmung, 31, Tei Ling, 30 cihteng hi uh a, Indianapolis khuasung aom vive ahi uhhi.

Phalna omlopi in sazuk kaplup pen sum $500 bang ki liausakthei bekthamlo, thong zong ni 60 sungbang akiathei thu ahihi.

Johnson County sung aom “Atterbury Fish and Wildlife” akicihna kuamsung tengah nitaklam 7pm hunpawl in sabeng in na om uh a, sazuk 2 kaplum khin uhhi ci’n Indiana Department of Natural Resources Lt. Angela Goldman in genkhia hi.

Hih ganhing kikhawina Wildlife huangsung pen Acres 5000 bang zai a, sabek khuan aom hangin phalna lakmasakphot akul ahihi. Ahi zongin Sazuk bektheihhun “Deer Hunting Season” pen January 01 ni ciangbek kingah ci’n Department of Natural Resources te’n aciangtan uh ahihi.

More: Vanleng tawh akipuaksawm Sazukki leh Sazuksa pawlkhat Airport ah kiman

Camp Atterbury Military Base ah Security Guard khatin thau kikap aging nihvei azak ciangin akhuadak khiatleh Truck mawtaw khattawh akileh om cih mu ahih manin, tuapan in akitheikhia in akiman uh ahihi. Avek un Johnson County aom thonginn ah ki paipih in thu kibawl cih kiza hi. Sawltak #zomidaily