US kumpi (President) kiteldan Electoral College Votes ~ Muana Khuptong

US kumpi (President) kiteldan Electoral College Votes ~ Muana Khuptong

US Presidential Election – Tukum 2020 pen USA ah kumpi kitel kum hong hi ta ahih manin, America te President kitel zia tawm khat kikum leng ut huai ka sa hi. A theisa te a ding in thupilo a bat hang, US ah President kitelna ah mee (vote) ki piak dan pen a theilo te a ding in tel buang tello buang cih khat in om theih hi. Tua ahih manin Electoral College vote kici leh popular vote kici a ki lamdanna gen nuam ihi hi.

US ah pen President a kitel ciang un, Electoral college vote toh tel uh hi. Electoral vote (mee tang) a vekpi in 538 om a, electoral vote 270 sang a tamzaw a ngah pen pen in President kumpi ngah hi. Hih Electoral mee tang te pen Congress members phazah hi pah a, tua pen Senator 100 leh House of Representatives mi 438 teng ki gawm a hi hi. Ahizong in Senators leh House of representatives ten President ding tel uh cihna hi zen zen lo hi.

Hih Electoral votes pen state khempeuh pan a mitam dan dungzui a ki seh ahi cih I theih ding kisam hi. Senate (vaihawmna inn tung zaw pen ah) state khat pan mi 2 ta pai khawm hi. Mi tawm in tam taleh state khat pan mi nih ta hi a, states 50 om ahih manin senators mi 100 om pah hi. House of Representatives (Inn nuai zaw pen) leu leu ah ahih leh state khat pan mi a tam dan dungzui in kiseh hi.

California ah mihing million 40 bang om ahih manin (kusale) Representatives mi 53 nei uh a, Alaska state ah mihing 730000 khong bek om ahih manin representative khat bek nei uh hi. Tua ahih manin Senators 2 leh Representatives 1 ki gawm in Alaska pan Electoral vote tang 3 bek om a, California pan in electoral vote mee tang 55 om hi.

November 3, 2020 ni in gambup ah President kitelna om ding a, state khempeuh ah mipi in amau state ciat ah electoral vote ngah ding pen na tel ding uh hi. Alaska ah mee kikhia teng lak ah atamzaw a ngah pen pen in electoral vote 3 a ngah hi pah hi. Tua mah bangin California ah mee ki khia teng lah a percent tam a ngah pen pen in electoral vote 55 ngah hi pah hi.

Gentehna ding in, Florida ah Joe Biden (Democrats) in 48% ngah hen la, Donald Trump (Republican) in 49% ngah henla, a dang candidate Independent a ding Jill Stein in 1% ngah hi leh, 49% ngah pen Trump (Republican) in Florida state a Electoral mee tang 29 ngah cihna hi pah hi. Tua mah bang in state dang khempeuh zong mee tang tam ngah pen pen in electoral vote a vekpi in luak pah pah hi. State khempeuh ah electoral vote a ngah zah uh ki gawm khawm 270 a cing pen pen President ngah ahi hi.

Popular vote (mipi mee) pen states ah electoral vote ngahna ding in ki sim hi a, a tawpna ah electoral vote tawh president kitel na hi leu leu hi. Tua ahih manin 2016 Election ah zong Pu Trump in gambup mipi vote million 62 val deuh ngah a, Pi Clinton in million 65 val ngah in million 3 val bang in Clinton in tamzaw mipi vote a ngah zen zen hang in President sem kha lo a, Pu Trump in Electoral vote 304 ngah in Pi Clinton in Electoral vote 227 ngah ahih manin Pu Trump in President ngah hi. A nuai ah a lim ah State khempeuh electoral college vote neih zah ki gelh hi.

USA gam a phuan khia, a mukhia masa (founding fathers) te Pasian in pilna pia ahih manin hih bang a electoral college vote system na mukhia uh ahih manin thupi mah mah hi. Mipi vote tawh President kitel hi leh California leh New York khong bek mitamna teng in President tel kha den ding uh a, state mi tawmna te in kumpi ah thu nei lo ding uh hi.

More: Election tawh kisai ngaihsutna pawlkhat gelh lehang ~ Pau Sian Lian

Tua ahih manin state khempeuh mi tawm in tam ta leh kumpi ah voice nei kha den uh hi. Mi tamna state 2 leh 3 khong bek toh Electoral vote 270 ngah ding hamsa ding a, hih state mi tawm na te ngah kei le uh electoral vote 270 ngah ding hamsa ahih manin state mi tawmna te zong lim tak a a campaign uh kisam hi. Muana Khuptong