US ah abeisa naikal 24 sungin COVID-19 hangin mi 4591 sihbeh

US ah abeisa naikal 24 sungin COVID-19 hangin mi 4591 sihbeh

April 18: Trump administration in US economy hon’kikna (reopen) dingin federal guidelines thak a bawl hangin state governors ten lockdown or stay-at-home order hun ding behlap in sotto lai uh hi. US ah Covid-19 cases leh a si kiamsuk lam manawh ta hi ci-in economy a manlang thei pen in honkik ding a deih Donald Trump leh state governors tuamtuamte kido in a kinawktuah lai takun Covid-19 pandemic in America gam a nawk khit nung Thursday (American local time) in hih virus hanga si record tam pen kiciamna zah a khep nih dektakin kibehlap hi.

A beisa naikal 24 bei zan 8 p.m. Eastern time Thursday in America gam-ah Covid-19 natna hangin a si mi 4,591 kibehlap hi ci-in John Hopkins University data analysis a bawlna panin Wall Street Journal reports in suaksak hi. Tua ma-in Covid-19 hangin a si a tam ni pen a record ah Wednesday (amau gam hun) in mi 2,569 si hi.

Thursday in America ah Covid-19 cases thak reports om zah pen Nilaini a 31,451 cases tawh kikim dektak ahih manin Trump in American mite nuntakna sangin economic growth ratings hoih ding bek awlmawh masa zaw in, 2020 presidential elections gualzawhna bek mah mitsuan in nei hi cih a kilat banah Covid-19 a thusim lohna kilangkhiasak leuleu hi.

Trump in Easter ma pekin economy honkik ding deih in a kitom niloh bangin ama gum conservative supporters pawl khatte in state governors, uliante leh media in i lauh theihtheihna dingin Covid-19 a khengval in uang gen lua uh a, i up theih dingin thu phuah zuauthu (hoax) gen uh ci-in lungphona nei-in lockdown a kilakkhiatna dingin nawhna bawlin social gathering ban, social maintaining measures leh stay-at-home order palsat in ganhing bangin kihon zuih uh hi.

Hih bangin kiphinna nei mihon pawl khatte in maituam in thau tawi uh a, “Lauhna sangin a tungah Thuman” (Truth over Fear) cih tangkopih in, state guk ah lampi zuihna leh lungphona neih ding sawm uh hi. Trump in hih state government restrictions palsat amah gum mite tha pia-in a gupna a Twitter ah tuangsak a, Democratic governors ukna panin suahtakna ngah ta un ci-in a kiphinna dingun “Liberate from Democratic governors” cih kammal a zat manin state lehdo in ngongtatna a pian’na ding leh mi lawpna dingin tha pia hi ci-in ngawhna tuak hi. Lockdown a palsatte kikaplupna leh Covid-19 natna hanga si sangin lockdown palsat a kikap zah a tam zawkna Nigeria gam bangin policete ngongtat uh hileh civil war a pian’na dingin rallies neite Trump in tha pia suak hi.

More: Covid-19 tawh kisai mipi te tungah theihsakna

Johns Hopkins University data in zan in US ah 668,000 coronavirus cases leh a si 33,000 om a, leitung bup-ah confirmed cases 2.15 million val leh a si 143,800 val ta hi ci hi. Ahi zongin Covid-19 Visualiser count in a ciamtehna ah US ah 719,686 total cases om lak panin 617,550 (a beisa naikal 18 sungin 9,951 case kibehlap) active cases om a, a si 38,200 (a beisa naikal 18 sungin 1,046 sih beh) om a, 63,936 damkik hi ci-in a latest data ah ciamteh hi. Leitung bup-ah 2,297,075 total cases; 1,551,056 active cases; a si 157,974 (6.88%) leh a damkik mi 588,045 (25.60%) om ta hi ci-in ciamteh hi. Thang Khan Lian Sources: Market Watch and Covid-19 Visualiser Count