US leh a pawl te’n Syria ah nautang 56 that kik

July 20, 2016: US leh a pawl ten zan in Aleppo province sunga om Manbij khuapi leilu lam-a om Tokhar kiim ah ISte tung lam panin a kapna lam uh-ah mipi/nautang 56 (naupang meimawl 11 kihel in) kaplum kik leuleu uh ci-in Syrian Observatory for Human Rights (SOHR) in pulak hi.Manbij khua nawl-a om Hamita khuata ah mi 10 (naupang 4 kihel in) kaplum uh hi. Democratic Forces of Syria (DFS) kicite tawh kipawl in US leh a pawl ten May kha panin Manbij a kapna hangun nautang 167 kaplum ta uh hi ci-n SOHR in gen hi. 167 a kapte lak ah naupang 44, numei 17 leh thongkia mi 8 kihel hi ci-in SOHR in gen beh hi.

US central command in Manbij tung lam panin kikap mah a, nautang kikaplum kha hiam cih lim takin thu kikanpha lai hi ci hi ci-in Al Jazeera reporter Rosiland Jordan in Washington panin gen hi. SOHR director Rami Abdel-Rahman in US leh a pawl ten zan in vanleng zangin ISte kap uh a, a ngimna uh kha loin nautang 56 kaplum uh hi ci-in German news agency DPAte kiangah gen hi. Ahih hangin Manbij khua mi ten mi 200 kiim bang si ding hi ci-in gen uh hi.

US te makaihna tawh Syrian Democratic Forces ten Manbij leitang haltum sawm uh bang hi ci-in Manbij khua-a ulian Hasan al-Nifi in Al Jazeera newste kiang ah gen hi. Manbij khua pen mi 25,000 kiim teenna mun hi a, IS ten mipite kidalna in zang uh a, zan in US leh a pawl ten Zahuna ah mi 23 kaplum in, tua khit in nitumna lam-a om Manbij lutna kongpi kap uh a, Tokhar ah US leh a pawlte mi thah pen mulkimhuai mahmah a, mi 212 a sih banah tampi mah mang hi ci-in gen beh hi.

Zan halin zong Aleppo a kikapna hangin bomb them lengin kum 45 a upa, mawtaw hawl Yaser Mahmoud Shueeb kha in, dam zo loin si hi ci-in Chris Gunness, spokesman for the United Nations agency in gen hi. Nipi in zong Aleppo mun nih kikap hi ci-in UNRWA in gen hi. Aleppo leitaw lam-a galtaite camp (Damascus panin km 600 gamla a om rebels ten siktum (mortar) tawh kap uh a, a liam leh a si bel om lo hi ci-in gen beh hi.

Staffan de Mistura, UN special envoy to Syria in Syria buai kipat a kipanin tu dong mi 400,000 si ta ding hi ci-in gen hi.

-Source: Al Jazeera and agencies
Thang Khan Lian
Zomi Post