US in Yemen ah Al-Qaeda tawh kipawlte omna buluhin mi 30 si

US in Yemen ah Al-Qaeda tawh kipawlte omna buluhin mi 30 si

Jan. 30, 2017: Trump administration in thuneihna a let khit a masa pen dingin US in Yemen gam-a al-Bayda province sunga om Yakla district sunga khamtunggam ah al-Qaeda tawh kipawl Abdulraoof al-Dhahab leh gamnuaimi pawl tuamtuam bukna mun zan in va buluh uh a, mi 30 kiim in sihna tuak hi ci-in US galkapte leh Yemen ulian ten pulak uh hi. A site lakah US Commando khat leh al-Qaeda gamnuaimite 14 kihel ci-in US galkap ten ci uh hi. Sihna tuakte lakah naupang thum leh numei 10 kihel hi ci-in siavuan ten gen uh hi. Obama hunin lei galkap kizang ngei mel lo-a, tuithe vanleng (drone) bek zangin kikap hi.

US Commando ten Abdulraoof al-Dhahab bukna phalvak kuanin bomb va khia uh a, tua khit in helicopter-te zangin galkapte tawm khia uh a, USte galdona vanleng bomb khia pen a bawh in bawh khial in a bawhna munah susia (destroyed) uh uh hi. Galkapte helicopter tung panin a tawm khiat khiat lai-un gamnuaimi ten na kap uh a, US Commando khat kaplum in, thum kapliam uh hi. USte helicopter zatte gamnuaimi ten thau tawh na kap uh ahih manin helicopter hawl ten inn tampi bomb khiat uh hi ci-in min gen loh khatin ci hi.

A min bul bek a gen ngam khuami khat Fahd kici in helicopter ten inn tampi bomb khiat uh ahih manin inn kicim ten mi tampi vuk khum lai a, khua sunga om biakinn (mosque) khat zong kisia gawp hi ci hi. Official Telegram account panin al-Qaeda ten al-Dhahab leh gamnuaimi dang a site pen galkap siangtho (“holy warrior”) hi ci-in a dahpihna pulak uh a, bang zah si uh hiam cih bel pulak khia lo uh hi.

US galkap ten December 2014 in Yemen ah lei galkap zangin al-Qaedate dona dingin “special operations” na bawl uh a, tua khit nung lei galkap zangin operation a bawl kik masakna uh ahi hi.

More: China ah ganhing khawina asimlutsawm khat Sahang in na petlum

Tua loin US special ten Yemen gam sungah al-Qaeda ten US mi khat leh South Africa mi khat galmat in a mat uh (hostage) hutkhiatna dingin operation na bawl ngei uh a, a mante that uh hi. Obama hun in US in leitung bup (global) a gamnuaimite kipawlna lak panin a kihtakhuai pen pawl a ciamteh al-Qaeda in the Arabian Peninsula kicite tuithe vanleng zangin na kap mun mahmah hi. Source: The Hindu/ Thang Khan Lian