US gamsung khualzinna pawlkhat – 66

St Pete – Kennedy Space Center – Gainesville

Sunday, September 28
Tuni zingsang nai 6:00AM in dingkhia in Tampa khuasung nawkin Kennedy Space Center (KSC) omna Orlando lam ka zuan uhhi. KSC zingsai nai 8:30AM ka tung uh a, atung baih pawlmah ka hi uhhi. Lut man mikhatteh $59 ta pia in ka lut uhhi. Tua ni thu kizaksakna ah ko paini zanin a en vekpi 17,000 val hi ci uhhi.

Kennedy Space Center pen Jacksonville leh Miami kikal Alantic tuipi dung a laizang santak khawngah Merritte kici tuikhulh tungah kilam hi. Tuikulh pen 34 miles sau in a vai 6 miles khawng aihi. Tua lai santak ah kum 1968 akipan mituang vanhawmpi sungah paina Rocket a tuamtuam tawh kikhahkhia tawntung hi. Nasem vekpi 13,000 val om hi. Akisam Rocket leh Shuttle akipan a van tuamtuam a bawlna Vehicle Assembly Building (VAB) pen leitungah innlian penpen lina ah kikoih hi. Adung 716ft, avaai 518ft, asanna 525ft ahihi. Leitang 8 acres huamkha in, a sung golna 129,428,000 cubic ft pha hi.

Hih Space tawh kisai mite theih ding a lah kikna ah a kisam sum leh paai pen US kumpi in fund pia lo a, amau leh amau in ading zo dingin sum zongtawm a akisikhop dingin alutman a ciangtan pah ahihi.

Van hawmpi (space) paina ding bel kumpi in sum tampi tak beilawh a sum akipia ngekngek ahihi. 1960 kum a kipan tuni ciangdong mituang aw mituang lo aw, van awnggpi/hawmpi ah Mercury and Gemini, Apollo leh Shuttle dongin amau a kumkum a, a sehsa mah bangin kilawnkhia hi. Space sung khualzinna eimau mahmah a pai bangin kilah theihna IMAX zong ka en uhhi. Kha tungah kahna zong a eimau tektek a va pai bang tektekin ki-en thei hi.

Inn golpi tuamtuam sungah a banbanin rocket tuamtuam, spacecraft atuamtuam kilak hi. Command Module kici leitung dong hong ciah kikna leh Lunar Module tawh kha tungah a paina zong a macia lianin kilak hi. Vantung a Skylab, International Space Station, leh a annek a tui dawn akisilna awng paina akipan kilak hi. Tuate khempeuh maan zong kizaih thei lel hi.

Mun khatah “Touch the Moon” ci in bepi tangcia ding khawng kha tung pan a puak uh lei or suang maan sungah kikoihin khut bom khat tumtheina ciang bekin vangsak hi. Apai peuhin ka lawng hamtang uhhi.

Azom omlai…
Agelh: Awn Za Pau