USA, Arkansas State sung ah numeino naupang kum 4 aphapan khat Bus tungpan kia in akhaguh kitan, silo bilbel cih CNN pan kiza hi. Highway lamzikpi tungah atailai Bus khat ii anunglam kongkhak panin akiasuk ahihi.
Tua naupangno akiat laitak pen anungah apai mawtaw ii Dash Camera panin ki Record khalian a, cikziak huai mahmah hi. Mawtaw sungpan in Video Record abawlkha pen Ryan Ciampoli kici minnei khat hi a, amahpen Crawford County pan ahihi.
Ryan Ciampoli pen Arkansas Volunteer Firefighter khat hi a, naupangno Bus tungpan akia amuh ciangin amanlang in tawmpah in Ambulance sapsak uh a, naupangno ii anuntakna honkhiatthei uhhi.
Arkansas, Harrison sung aom Highway 65 tungah thupiang hi a, Ryan Ciampoli in agenkhiatna ah kamailian ah kamit tawh kamuh hi a, ahi zongin pataulua ahih manin, thakhatthu in bangmah phawklo in ka omliang cihi.
Video Record akibawlkha pen ama mawtaw sungah akikoih Dash Camera pan hi a, naupangno pen Bus anunglam kongkhak tungah kikhai langlangin tuakhit ciangin anuai ah kiasuk hi.
Anuai lamziktung atuksuk ciangin tuanlaulau a, tuakhit ciangin tangnawnlo in omcip hi. Bus ahawlpa’n ahihleh bangmah phawkkhalo in taisuak vingveng hi.
Ryan Ciampoli inzong a mawtaw thakhat in khawlsakpah a, tuakkhia in delhpheipah hi.
(Accident khatpeuh aom ciangin kumpi thunei te tunma in bangmah khoihkkhak hetlohding ahihi. Ih khutma khawng omkhaleh thunawngkai tawh kizomthei hi.)
Ahi zongin tua naupangno pen Highway lampi laizang ah akiatkhit ciangin lumsuak leulaumawk ahih manin, Ryan Ciampoli in tuaci nutsiatding piangthei salo in tawmphei in a angsung ah tawipah hi.
Video etnopleh: Video shows 4-year-old fly out of moving bus
Akiatkhit lianin khua phawknawnlo in omcip himahleh adendeuhciang khua hongphawkkik cihi.
Lamzikpinawl lamah paipih in Truck Bed tungah sial uh a, tuakhit ciangin khua hong phawkkik cihi. “Kanu koi ah omhiam?” ci’n hongkapkhia a, lainat huai mahmah hi ci’n Ryan Ciampoli in genkhia hi.
Minute 5 khitkhawng ciangin Ambulance leh Paramedics te hongtungpah uh a, ageinai aom zato ah kipuakpah hi.
Ryan Ciampoli pen hihmun ah atuak masapen “First Responder” hi a, akisam bangin huhna piapah ahih manin ki pakta mahmah hi. Ahi zongin ama genna ah hihbangdan tuatsiatna pen koikoi ah banghun cih omlo apiangtheithu ahih manin septheih bangin huhding kisam hi ci’n genkhia hi.
Naupangno ii anu genkhiatna ah hih tuahsiatna vaitawh Bus Driver papen ka mawhsakkei hi. Ka tanu adamkiktheih nading kalung himawh in, tuabek mah ka lunglutzaw hi ci’n genkhia hi.
Related: USA gamsung aom States leh Khuapimin, Region tuamtuamte
Naupangno pen akhaguh kitan cih kiza a, bangmah nawngkaina aomkeileh Monday ni in zato pan tuaktheiding cih kiza hi. ZD Sawltak #zomidaily
Comment piaknop aomleh...