US ah Police khat kikapliam, Police te’n zong mikhat kaplum

US ah Police khat kikapliam, Police te’n zong mikhat kaplum

Nov. 21, 2016: Missouri state sunga om St. Louis ah zan in mel theih loh mi khat in police sergeant khat thau tawh kap a, nak liam mahmah hi ci-in St. Louis local police department ten pulak hi. Police kikapliampa pen nak liam mahmah a, ahih hangin khua bel phawk a, tu-in zato inn ah kikem lai hi ci-in St. Louis Metropolitan Police Department ten Tweeter pan in pulak uh hi.

Police kikapliam pen kum 46 mi hi a, St. Louis Metropolitan Police Department ah kum 20 sem ta hi. Thau tawh kap pa’n police pa’ car manawh in kap a, a kappa mat dingin police ten sa beng in beng lai uh hi.

Tua loin in New York sunga Brooklyn sunga om Van Dyke House I, Brownville inn dawl kua na-ah zanhal nitak nai 1:30 pm pawl in mi khat muan’mawh om a, tua kiim-a teng ten policete nambat 911 fon tawh hopih in sam uh hi. Police ten a va delh uh leh tua mi muan’mawh pa’n policete’ molhtum (baton) laksak in, police nih a lu uh satsak a, policete tawh kilai gawp uh hi.

Police ten tuapa thau tawh kaplum uh hi ci-in Chief of Police James Secreto in gen hi. (A uphuai diam ah mit tawh kimu ahih teh policete khutlum a si ai zel tam maw cp) -Sputnik/The Hindu/ Thang Khan Lian