Upna ih cih? What is faith? ~ Suangh Dal

Upna ih cih? What is faith? ~ Suangh Dal

Hih laikhak ii a laimu in hotkhiatna pen mihingte hanciamna tawh kingah ngiat lo a, Pasian hong hehpihna upna bek tawh a kingah letsong ahi hi (3: 26) cih thu ahi hi. Tua ahih leh upna ih cih bang ahi hiam?

Upna ih cih pen a thupi mahmah ahi hi. Kuamah in upna lo tawh Pasian lungkim sak zo lo hi (Heb. 11: 6). Upna (Faith) cih le um (believe) cih tawh kisai Thuciam thak sungah 250 vei tuak bang kimu thei hi. Ahi zongin tua um, upna cih thu ah a tuamtuamin khiatna nei hi. Gentehna, Paul in diktang mi suah theihna pen Jesuh sungah upna hang bek hi ci (2: 16) hi. Mundangte leuleu ah dawite in zong Pasian’ Tapa Jesuh um hi ci (James 2: 19) hi.

James leuleu in upna tawh kisai-in Khatvei up a tawntunga kimang upna (the Faith once entrusted to the saints v.3) ci-in na gen hi. Upna thu pen a ki-umlah, a kinial nuam tawntung hi in, kibawl sia den ahih manin tua upna thu Christiante in ih sut phatphat kul ding hi. Upna ih cih hih bang hi veh aw ci-a ih thum ih gen ih hilh cian ding (apology/ apologetic) kisam mahmah ta hi hang. Paul gen upna pen a nungta upna hi a, tua a uppa Khrih nungta hi (2: 20).

Lai Siangtho sunga a kilamdang kammal upna tawh kisai zatdante

(i) Lai Siangtho gen thumaan-thutak ih um hi. Christian biakna ih um hi (1: 23). Hih pen a kinial thei khol lo thumaan bulpite upna ciang bek hi.

(ii) Khuak tawh upna gentehna Judah Laikhak 3na. Thumaan hi ci-a ih up thu pawlkhat om hi. Um. James 2: 19 ah hih dan upnate na gen hi. Gentehna Pasian khat bek om hi ci-in na um uh hi. You do well. Ahi zongin kikum taktak lehang a um lo uh hi zel hi. Dawite’n zong um lel hi. Mi tampitak in Singlamteh tungah kikhai lum Jesuh kici mi khat om hi, cih thu um uh hi. Ahi zongin tua upna pen upna maan taktak hi nai lo hi. Tua bang upna pen Kha Siangtho’ piak upna hi nai lo hi. Pianpih khuak tawh Pasian upna mikimin kinei hi. Ahi zongin tua pen hong honkhia zo upna (saving faith) hi nai lo hi.

(iii) Lungsim lawpna ciangtawh upna pen kineihtawmpak upna (emotional faith) ahi hi. Tua in hong lawp sak, tha hong ngah sak, mi ih pahtak khat peuh tungah hong kinga sak hi. John 2:24 – Jesuh in an a khamtak a piak manin mite in um uh hi. Tua pen upna maan taktak hi nai lo hi. Tua ahi manin Jesuh in tawlkhat up pakna, khuak tawh upna (head knowledge) le emotional upna tawh kisai khaici vawhpa’ thugentehna tawh hong lak hi (Matt. 13: 20, 21).

(iv) A thak Kha nuntakna pen piangthak mite bekin ngah a, tuate in Jesuh Khrih tungah upna le muanna bek tawh kinga lian uh hi. Tua pen upna maan ahi hi. Tua upna in a kimu thei lo Pasian thu muh theihna le tel theihna piang sak hi. Tua upna maan taktakte pen Pasian’ letsong ahi hi (Eph. 2: 8).

Upna tawh kisai in a tunga, (ii) le (iii)na pen ci le sa upna bek ahi hi. Upna tawh kisai ih gen numbat (iv)na pen nuntak tawntungna hong ngah sak thu-ummite ngah Kha letsong hi a, Khrih tawh pumkhat hong suak sakin Pasian ciamteh dikna ong ngah sak upna ahi hi (John 17: 3). Hih upna in mawhna pan tankhia a, nahoih sep nuntakna ah tawsawn hi (James 2: 14-26). Itna (Gal.5:6) nei sak a, tua upna in thumanna nei sak hi (Rom. 1: 7). Evan. Suang Dal