Union of Burma leh Zomite ~ Khup Lian Thang

Union of Burma leh Zomite ~ Khup Lian Thang

2015 kum Kawlgam kiteelpi ah Zogam panin minam minpua ZCD in hita leh amun dang khempeuh phial ah NLD in gualzawhna ngah uh hi. Pan mun hoihtak ki ap thei bek thamlo in Kumpi thak in nasep kipan ta in tu ciangciang nawngkaina om hetlo ahih manin in lungdam huai phadiak lai hi. A sawtlo in a khangto gamte bangmah in Myanmar gam zong zinghuan nitak huan, silh leh ten ding tawh lungkham lo in, cinat ciangin zato hoih nei ding, sih hun lopi in si nawnlo in khansau ding, naupang te in pilna siamna lam ah mi dang gamdang tetawh kikim in, gamdang mundang ah utlo pipi in paikul nawnlo ding a, inn phual zang panin sum zongin innkuan nuamtakin om khop hun ding sawt nawnlo ding hi cih pen gammi khempeuh ii lametna a hi. Hih bangin hih bangin lametna tampi kawmkal ah kidop huai, theih huai thu pawlkhat lungngaih dingin ka lunggulh hi.

Kawlte ki ukna tangthu tom leh a gam

“Kawlte kipatna Tagaung pan hi” cih Kawlte’ paunak ah aom hangin tua hunin Kumpi pen India Prince te leh Pyute hileh kilawm ahih manin tangthu theite in Kawlte ukna pen Pagan Dynasty pan a tawpna Kongbawng Dynasty (AD 1044 – 1885) in ciamteh uh hi. Hih Kawlte ukna sungah Zogam leh Kachin gam pen uk kha ngeilo hi ci-in Dr. Thant Myint-U in siangtak in gen hi.

Tua Kawlte kumpi uk hun Kum 850 kikal sungin ukna gam leh a thahat minam pen kikhel kawikawi hi. Shan te hat zel, Mon te hatzel, Kawlte hatzel cih bangin ki uk na leh a ukte ki khel kawikawi ah a, a ukna mun leh phual zong kikhel kawikawi in, atawpna pen ahi Mandalay (Yadanarpong) khuapi pan, Thibaw Min hun laitak in Mangkangte lutta ahih manin Kawlte kumpi tawh ki ukna hun a beita ahi hi.

Hih Kawl kumpite uk sungin min leh panmun kituh in unau khat leh khat sisan luanna pen a om den phial ahi hi. A minthang phadeuh pen in Kawl kumpi nunung pen ahi Thibaw Min in, ama kumpi tutna a kip na dingin a sanggam 70 val bang cikzethuai huai takin that mang hi. Kawlte’ paunak ah gal nam 5 om in, tua sungah a uk kumpite zong kihel zen hi (Kumpi, Meikang, Tuikhang, Guta leh galte). Kawlte lungsim limlim ah Kumpi ahih leh thunei ding, ama thu bek tawh nasem ding , cih khat om in panmun angah nangin zong na khempeuh sem ngam lel mawk uh hi. General Aung San leh a pawlte aki suamlupna zong tua hang abulpi pen hi pah hi.

Mangkang ten Kawlgam thumvei do in (1824,1852,1885kum), Kawl kumpi pa India ah innsung thongkia sak uh hi. 1886kum 1st Jan in Kawlgam bup Mangkang te khutsung tungta hi ci in tangko uh hi. Suahtakna a ngah ciangin zong Kumpi pa bel si khin himah leh a guh a vai zongin lak kik dingin vaihawmna om tuanlo hi. Mipi in ki it lualo leh kiphawk lualo cihna hi.

Tua hunin suahtakna ding makai khempeuh phial in Communism pakta mahmah uh ahih manin Kumpi thuneihna a ultung sak ki ukna lamah paikik ding ngaihsutin neilo uh zong ahi hi. Mangkangte in Zogam zong 1896kum aa kipan Chin Hill Regulation Act tawh ukna ong kipan uh hi. Kawlte ukna nuai ah omlo ihihna ong kilang sak mahmah hi.

Tua hangmah in zongin a tuam in ong uk aa Zogam, Shan gam, Kachin gam leh Karenni gamte a tuamin ong uk hi. Hih Mangkangte ukna ukna bulphuh in Panlong Agreement ong piangkhia ahi hi. Kawlte ukna ah om hi le hang kumpi pa akimat khitteh a gamkhempeuh laksa hi in, Kawl kumpipa aki mat hangin Zogam, Kachin Gam leh Shan gamte hamsa pi in la zo bek uh hi. Tua hun ma in Zomite pen amau leh amau a ki ukte hi a, dinmun kician a nei khin mahmah ahi uh hi. Mangkangte ukna hang leh Sangmang te hangin ih khua muhna tampi ong khangto beh lai hi.

1917kum in Piantit galmai paina hangin a khuamuhna uh khangto in, mite khantohna ki mu kha bek hilo in minam dangte tawh ki zop a kipatna zong ahi hi. Zomite tampi tak Paaltan lut in, a tuntun a sepna peuhpeuh ah a thuman acihtak in kithei a, tuni dong mah in a pu apa te cihtakna hangin Zomite acitak minam ci in kiciamteh lai hi.Mangkang ten a uk hun ma, amau leh amau a ki uk hun lai in thuman leh cihtakna tawh akalsuan minamte ahih na kimu thei hi.

Mangkang kumpi tungpan suahtakna

Leitung khuahun luanzia nakpi takin ong kikhel in, Galpi nihna huhau in Mangkang kumpi in aneihsa gam leh leitangte kep zawhna ding tha nei nawnlo uh hi. A kah thak Mangkang tanu pipa (Prime Minister) Clement Attlee’ makaih Labour Party in a neih uh gamte kep tentan ding sangin suahtakna piak ding deihzaw ta uh hi. General Aung San makai in mualmite zawn a, amah muanna bek tawh suahtakna lakkhawm dingin Mualtungmi makaite na thukim uh hi. Suahtakna lak cil in Kachin, Shan, Zomi, Karenni leh Burma ci in minam pi 5 tawh Union of Burma ong piang khia ahi hi. 1948, 4th Jan pan kipan in Kawlte tawh gamkhatin Mualmi khempeuh ding khawm uh hi.

Suahtakna ngahkhit Tualgal

Mi khempeuh ii zahtak General Aung San kisuam lum in, amah om nawnloh ciangin mualtung mite tung akamciam uh bangin Kawl makeite zuinawnlo uh hi. Constitution mahmah zong ah Kawlte bekin thuneihna a neih na dingin bawl uh hi. Kawlte mahmah zong amau leh amau ki nawkin Communist te thautawi kipan uh hi. Belpawl Kumpi ukna nuai aa om Kawl galkap te mahmah kumpite lehdo mawk uh hi.

Tua kawmkal ah Karen te zong, kipan khengkhang uh ahih manin Belpawl gam sung nak buai mahmah hi. U Nu makaih Kawlgam kumpi in ahun lap in phelh zolo ahih manin tualgal zong nasia semsem hi. Kawl galkap pawlkhat, Zomi galkapte leh Gualkha galkap te in cihtak takin ma apan na hangin Yangon kumpi akici khin phial dingmun pan in Belpawl kumpi cih dinmun tungkik zo liailiai suak hi hi.

A huampi in pen a langnih Kawl makaite (U Nu leh Communist makaite) in “amau cih bek ci tentan in, kikum hiathiat ding cih lam sangin , kei cih dan kei sandan a dik pen hi cih angsung deihna thupi sakluat nang hang in hiciang a tung hi” ci in laiat siam U Kyaw Win in ama muhna gen hi. Tua pen man mahmah hi ci ing. Tuni ciang dong tualgal beizo nailo in leitung aa a saupen tualgal in kiciam teh hi. Suahtakna ngahcil tualgal (Karen leh Communist) dan tawh ki bang nawnlo in, Kawlte leh Mualtung mite kikal ki kilem lohna khasiatna bulphuh aa a piang tualgal hizaw ta hi.

Kawlte’ minampi lungsim khauhluat hang hi in, tun zong abei hi peuhmah lo in DASSK makai ahih manin a paulo uh hi bek hi. Kawl mite, Belpawl gam mite khempeuh tangthu a man taktak aa a theih masiah, sanginn ah aki sin sin tangthu bu te a thuman taktak thute tawh kilaih masaih, Kawlmi te ki minam liatsakna lungsim pen bei hak kha thei ding hi.

Kawlgam ki teelpi leh Zogam makaipi te (1951, 1956, 1960, (2010), 2015kum)

Suahtakna ngah zawh kha 6 sungin kiteelpi bawl ding himah taleh tualgal a kipatna hangin kiteelpi om thei paklo hi. Suahtakna ngah cil aa tavuan akipia makaiten kiteelpi dong Chin Affiar Council tawh makaih uh hi. Chin Affair Council pen Zogam a makaih kumpi hi in, Minister khat om a, aman Zogam bup a makaih a hi hi. Zogam khenpi 6 in kikhen aa, Tedim, Falam, Hakha, Matupi, Kanpalet leh Paletwa gamke te ahi hi. Tedim pan Pu Capt. Mang Tung Nung hi in, Matupi pan in Pu Vum Kho Hau te tangmi na hi uh hi. Minister kidem na om a, Pu Vumthu Maung (Kanpalet) in Pu Vum Kho Hau zo ahih manin amah pen a masapen Chin Affair Minister na suak in 1951kum kiteelpi dong sem hi.

Anihna pen Pu Shein Htang (Kanpelet- 1952-1954kum), a thumna Pu Zahre Lian (Falam, 1954-1958kum), a lina Pu Thang Lian (Falam, 1958kum kha 6 sung), Pu Ral Hmung (Hakha, 1959kum), leh a tawpna ah Pu Zahre Lian hikik in (1960 -1962kum) U Ne Win’ makaih galkap ten thuneihna alak dong sem hi. Ki teelpi thumvei om manin 1951kum, 1956kum leh 1960kum cih bangin ki bawl hi. 1962kum pan 1973kum dong galkap in ong uk in, 1974kum pan 1988kum dong pen U Ne Win bekin thuneihna pan, Socialist Party bekin uk hi. Hih hunsung pen Tedim lampan Galkap lamah a citak leh min leh za nei Zomiten Zogam na makaih to uh hi.

Maj. Son Khua Lian (Tedim, 1962-1972), Col. Khen Za Mung (Tedim, 1972-1974), Col. Kap Cung Nung (Falam, 1974-1978), Lt.Col Kim Ngin (Tedim, 1978-1982), Lt.Col Khai Mung Mang (Tedim, 1982-1986), Col. Son Khua Vum (Tedim, 1986-1988) cih dan hi. 1988 pan 2010kum dong galkap temah in tutna ong lakik hi. 2011-2015kum dong pen Galkap puansuah mipi makaihna hun ki ci thei in, Chief Minister pen Pu Hung Ngai (Mindat) leh State Parliament Speaker pen Pu Hau Khen Kham (Tonzang) te ahi hi. 2015kum kiteelpi pan a gualzo NLD leh ZCD in Zogam ah gualzo uhhi. Chief Minister pen Pu Lian Luai (Falam) hi in, State Parliament Speaker pen Pu Zo Bawi (Hakha) in a makaih hi ta hi.

Zomite in Hoihtak lungngaih ding thu

• 1) Zomite sangin mi a tamzaw Kawlte’ pianza leh tangthu te Zomite in a theih ding kisam, DASSK bang om nawnkei leh ong koici ding?
• 2) Gam ki uk zia ah State te ii thuneihna damdam in tam semsem ding ahih manin State level ah koici tawh panmun la ding?
• 3) A tunga Zomite Zogam gamvai tangthu ah, Tedim kampau Zomite in mipi teel’ ki ukna hun ah khatvei zong Zogam makai dinmun ngah ngei hetlo mawk hi. A pilna, a siamna, a neih leh lam kicing leh hawmtawh omlo hi mah ta leh bang hangin makai dinmun ngah zolo uh hiam?

Hih a tunga dotna te nang mahmah in hoihtak na ngaihsun dih in. Gambup huam gamvai ah kimawl dan ding, Zogam gamvai ki ukna ah mapan dan ding koici kimawl ding cihte ki ging ding, ki dop ding sep ding aom leh tun kipat pah hunta hi . Ki khelhuai thute aom leh tui bangin kikhel in mun khempeuh ah lut siam ding, thu leh late kikum liailiai in makaite tungah ngaihsutna hoihte piak ding, Makaiten zong , mipi’ piak ngaihsut piaknate hoihtak sasak in mipi mailam ding khual aa ki puah ding aom leh khatvei kipuah kik ding thupi ding hi.

Zomite khempeuh a neu a lian, a moi aham ki zahtaak siam in, thuneihna , gamvai, minam vai leh biakna lamah amau aa dingin alauhuai pen a gal, a lang ahi Kawlte’ huzap na pan in a suahtak nangin nakpi takin nasem in Zomite khempeuh in a ma uh anawt khawm ding hunta hi. Hih bangin khut kilen in a kalsuan khop nak leh Zogam bek hilo in Kawlgam leh Leitung bup a makaih zo ding, Pasian’telsa Zomite ahi hi. Lungdam, Khup Lian Thang

Reference:

• Zahre Lian of Burma, Dr. Stephen Hre Kio
• Kawlgam gamvai et phat na, U Kyaw Win
• A History of Southeast Asia, Arthur Cotterell
• Saw Ba U Gyi leh Minan neuter buaina, Mg. Sin Kye
• Lest We Forget, Col. Khen Za Mung
• Saturday’ Son, U Nu
• Pu Hang Khan Lian’ thugenna, ZIS
• The River of Lost Footsteps, Thant Myint-U