Malaysia, UNHCR zumpi ah alianpen Richard Towle nasep khawltading

Malaysia, UNHCR zumpi ah alianpen Richard Towle nasep khawltading

Malaysia, UNHCR zumpi sungah alianpen asem laitak ahi Richard Towle pen tukum December khasung in nasep khawlding a, Malaysia gampanin ciahkhia tading cih kiza hi. Richard Towle pen “UNHCR Representative for Malaysia” panmun tawh 2014 January kha akipanin asem hi a, ama sep makaipi sep hunsung in Zomi te UN vaizong tampitak ki lumlet dikdek cileng kikhiallo dinghi.

Malaysia UNHCR zumpi ah Richard Towle in makaipi asepma in Alan Vernon in makaipi semngei hi. Alan Vernon ii makaipi asep hunsungin Mobile Registration zong neivei (2009 leh 2013) kibawlngei a, Zomi tampitak in UN Card ngahlawh in, gamthumna zong atunlawh tampitak ki om hi.

Richard Towle hongkipat ciangin Fraud Case cihte, FMT cihte akipan buaina tuamtuam tawh hongki sulzuih toto a, anunung ah Chin State pan Refugee te Malaysia gamsung ah 2019 kumbeidongbek omtheilaiding cihciang dinmun dongah hong tunpih mawk hi.

Richard Towle pen New Zealand gammi ahihi. Malaysia gamsung ah UNHCR Representative panmun tawh honglutma in “UNHCR Regional Representative” panmun tawh Australia, New Zealand, Papua New Guinea, South Pacific cihteng ah semngei hi. Tua panmun tawh 2007 kum panin 2013 kumdong sem a, tuakhit ciangin Malaysia gamsung hongtungkha ahihi.

Richard Towle pen UNHCR tawh akizop sawtsimsim khin a, 1990s kumpek panin Hong Kong aom UNHCR ah nasep naki pankhin hi. Tuahunlai in ama naseppen Vietnamese Refugee te vaitawh kisai anaseppi hipen hi. Tuakhit ciangin Hong Kong panin London khuapisung aom UNHCR zumpi ah nasep kituah leuleu hi.

UNHCR Headquarters aomna ahi Geneva ahzong Department of International Protection nuai ah Senior Legal Role panmun tuamtuamtawh nasemngei khinhi. Tuabangin asep hunsung inzong Human Rights, IDP (Internally Displaced Persons), Asylum-migration Issue cihvai tawh na vaihawmpih ngeihi.

2001 paninzong 2003 kum kikalsung in Yugoslavia, Belgrade khuapisung aom “United Nations High Commissioner for Human Rights” ah Chief of Mission zong nasemngei hi. Tuabek thamlo “New Zealand Refugee Status Appeal Authority” ahzong Member khatin akihel ngeikhat ahihi.

More: Malaysia gamsung aom Chin State bup gambel kipawlna ICC makai te leh UNHCR makaipi ki muhkhopna

“Hong Kong Refugee Status Review Board” ahzong Deputy Chair asemngei hi a, tuabek thamlo, UNHCR sungah nasep alutma in New Zealand gamsung ah Lawyer nasep semin Refugee leh Human Rights Issue vaituamtuam akin mahmahkhat ahihi. Mangpha, Sawltak #zomidaily