Ui bawlsiatgawp zong thong kiattheihna, sum liau theihna ahihi

Ui bawlsiatgawp zong thong kiattheihna, sum liau theihna ahihi

Singapore gamsung ah pasal kum 41 aphakhin khatin a inn ah akhawi ui pen satgawp ahih manin, zanni Wednesday (23 November) ni in thukhenna thuak cih CNA pan kiza hi. Tuapa minpen Chiam Choon San Alan hi a, ganhing te tungah tatsiatna leh Dog License thukhun zuihloh manin dann atuak hi ci’n Agri-Food and Veterinary Authority of Singapore (AVA) te’n Press Release ah pulakkhia uhhi.

Hih thupiang pen May 23 ni hi a, innteekpa in ama khawisa uikhatpen a innnunglam ah tumgawp, sawtgawp, suigawp hi. Tuapen mikhatin Video nazaihkha citciat a, Facebook tungah koihto ahih manin, Social Media tuamtuam ah ki Share kawikawi hi. Tua Video sungah innteekpa in ui 3 anei hi a, adang ui 2 te maiah khatpen bawlsiagawp hi.

Innteekpa genna ah a uikhawite kipet uh a, anasemnu in akipehloh nading un vakhen hi. Ahi zongin a ui khatpen thumanglo in, ahehsuak in nasemnu na ngikgawp, napehsawm cihi. Nasemnu zong lau in awng ahih manin, innteekpa zong innnung ah paipah cihi.

Tua a ui pen adaih theihtheih nading in abawl hangin ngahtuanlo ahih manin, ahehsuak in asuigawp hi’ng ci’n genkhia cihi. Tuapen ama ii genna ahihi.

Tua abawlsiat ui pen AVA kici “Agri-Food and Veterinary Authority of Singapore” te’n kem uh a, zatui zaha akisambang in bawl uh cihi. Tuaban ah aki bawlsiatna, aliamma te velcianna nei uh cihi. Tuakhit ciangin SPCA akici “Society for the Prevention of Cruelty to Animals” te khutsung ah kikemphot cihi.

Innteekpa ii gamtatna pen khialhi ci’n thukhenna akineihleh Singapore Dollar S$15,000 liausum tuakkhatheiding, bekthamlo kha 18 sung thong kiatheiding cimawk hi. Tuaban ah Dog Licensing and Control Rules cihte zuilo ahih manin S$5000 zong atuamin liau tuaktheiding cihi.

Ih omna gam ii thukhun theihhuai hi. Kawlgam, Zogam ah ui khawng utbang in suitawh sattawh tuattawh ihthuah phial a, nekding in ih golumphial zongin abeisa ciangciang ah bangmah liau kituaklo hi.

Ahi zongin gamdang ah ui ahi zongin innsung ah akhawi uh ganhing “Pet Animal” khatpeuhpeuh pen utbang in ki bawlsiatheilo hi. Liau kituak theihi. Lampi tungah mawtaw tawh taihkhakzong liau aki tuakthei ahihi. Ui asim gawhgawh tezong hongki theikha zenzenleh, ummmmm….. ZD Sawltak #zomidaily