U.S Kumpi sungah panmun asang pen anei Zomi

Zakhang lungdampihna: U.S Kumpi (U.S Federal Government) sungah asang pen Za anei ZOMI

I biak Pasian in Zomite hong lamsang in U.S Federal Government (US Kumpi) sungah zong zalian mahmah anei Zomi hong om sak ta hi. U.S Department of Commerce khut nuai aa United States Patent and Trademark office ah Electrical Engineer – Patent Examiner za tawh asem Pa Thomas On Sian Mung (Pa Thomas Mung; FB ID – Thomas Mung Guite) pen Primary Patent Examiner – Senior Electrical Engineer : Full Signature Authority @ G.S-14 level ah (promotion) za hong khangto ahih manin kilungdampih mahmah hi.

U.S Federal kumpi sungah Za sim dan pen General Schedule (G.S) level tawh kisim to to aa, GS 1-15 dong om in, GS 15 pen asang pen hi aa, Pu Thomas Mung in G.S 14 level hong tung thei ta ahih manin angtan huai mahmah hi. Ei Zomi lak ah U.S kumpi sung nasepna ah Za sang pen hong tung masa hi ding in kiciam teh hi. US Kumpi nasepna sungah Senior Engineer or GS-14 level pen Kawlgam ah hi leh Vuandawk/Men-kyi za tawh ki kim kha ding hi.

Nung kum in zong Pa Thomas Mung (FB: Thomas Mung Guite) in US Federal Government (Department of Commerce) pan akipia asang pen medal khat ahi “Bronze Medal Award – Superior Performance in Federal Service” medal leh pahtawina lianpi khat hong ngah khia thei aa, ei Zomi lak pan U.S Kumpi ii asang pen Pahtawina Medal hong ngah masa pen khat zong ahih manin Topa min I phat hi.

Pa Thomas Mung pen Guite beh hi in, Siapi Ngen Za Dal (Late; Vangteh khua, Guite beh) leh Nu Dim Khan Niang (Talzang/Khampat Khua, Tung Dim beh) te Tapa hi aa, Tedim gam Vangteh khua pan 1975 kum in suak hi. B.E.H.S Kanpetlet pan Tan Sawm awng in Yangon University pan “Physics” major tawh B.Sc Degree tawh Sang hong man hi. 2001 kum in Guam Tuikhulh pan USA hong tung aa, U.S tun zawh kum 17 bang pha ta hi.

USA Maryland State sung aom Capitol Technology University pan B.S (Electrical Engineering) tawh degree hong ngah thei ahi hi. Kawlgam ah asangkah lai in Zomi Siamsin “MOMNO Newsletter” ah Chief Editor leh Zomi Momno Association ii General Secretary te kum tampi hong sem aa, i minam a it, a vei mahmah khat ahi hi. Tulai tak in zong Zomi Innkuan Washington D.C Area ah E.C makai khat in kihel hi.

More: Pa Thomas On Sian Mung ii Bronze Medal Award ngah lungdam pihna

US Federal Kumpi ii Department khat ahi Department of Commerce (United State Patent and Trademark Office) ah na asep zawh kum 8 hi ta hi. Hi bangin ei Zomi khat in US kumpi ii asang mahmah Za limci hong nei thei ahih man in Topa min phat hang. Topan Zomite thupha hong pia to to, hong lam sang to to ta hen.

Information Department
Zomi Innkuan Washington D.C Area