U Kim Tuang ~ Siambawi

U Kim Tuang ~ Siambawi

U Kim Tuang pen gam leh minam a vei luat man bek aa, gam 3 na tun thei ding abaih mahmah kimlai, Zogam lam hong leh-ciah dildel khat hi. Lungsim siangtho in, hoih a sak te, hoih a sak dan, hoih a sak loh te zong hoih a sak loh dan ama muh bangbang, ip nei lo, siit nei lo in, a gensiang thei khat hi. Ahi zongin kua mah tung ah Lungsim sia a nei hi lo hi.

Kei mimal tung ah zong a ma muh bangbang in hong gen thei hi, tua hangin ko unau kikal sung ah bang mah buaina om ngei lo hi.
Kei mahmah zong ka neu lai pek ua kipan, laibu tuamtuam Sen Tai Watthuh te akipan, gamvai laibu tuamtuam sim ding a hong lamlak hong pattah hi. Tua mah bang in kum tampi sung Zomi Khangno, Siamsin tampi te thumuhna tampi a khanna ding a hih theih bangbang tawh a panpih, a hilh, adeihsak den khat hi.

2021 April kha kipat tung, Kawlpi, Tahan veng ah thau vui thau tang hong ging ziahziah. vok an pia ding a pai Zomi papi khat hong sih lawh tungtang in, ka lunghimawh lua a, a omna mun, a bit hiam? Mun dang kituah kul ding hiam cih tawh phone pan aa ka kihona uh pen, a nunung pen hi.

Gamvai ah Minam a it mahmah, a vei mahmah ngiat “Zomi Nationalist” khat hi a, Zomi te gamvai, party vai, minam nasepna tuamtuam te ah thuuk tak in kihel in, akipiakhia ngiat ahi hi. Zomi te gamvai nasepna tampi te ama khutma tawh kician tak a, ciamteh, tangthu tampi a nei, khangno makai khat ahi.

2012 Kum November 16 in, Siamsin Seminar vai ding a azinna Kawlpi ah cycle accident tuak in a lu ah liamna lianpi hong ngah hi. Siamsin sanngamte in a sun a zan a Yangon na puak uh hi. Yangon a om thei teng in Zato hoih pen ah, a hoih thei pen na bawl a, Topa hehpihna tawh a nuntakna hong suakta hi.

Tua zawh kum 10… 2021 Kum November 29 ni in Kawlpi pan Zogam zuan in a zinna pan thukizak loh tuni Kum 40 a cinni dong hi. Kum 40 nuntakna sung ah a hih theihna khempeuh tawh a gam a minam ading a semkhia khat hi. Nuntakna cih in kum bang zah sawt nungta cih sang in i nuntakna sung bang zah kipia khia cih thupi zaw hi, kici hi.

More: Moses Kim Tuang vai thumna

A hih theihna khem peuh tawh a gam a minam ading a nungta U Kim Tuang hi. Nang tawh Yangon tuncil akipam huntampi ka kithuah khak angtang mahmah ing. Na nau khat ka hih khak angtang ing ei U Kim Tuang aw. Ni khat ni ciang bel kimu kik veve ni ei maw. I kimuh kik ciang kong gen ding thu tam peuh mah ei U Kim Tuang. Feb 7, 2022 1:54 Am