Tuzawh kum 40 ciang ~ Hau Za Cin

Tuzawh kum 40 ciang ~ 40 years from now ~ Hau Za Cin

Tuzawh kum 40 ciang numei tampi kumpi leh company office ah ulian tampi hong omta dinga, Muslim te tampi nitumna lam gam ah pemsuk ding uh a, office ah nasemte tutna munkhat bek pan tulo ding uh hi, kici hi. South America gamte nek leh dawn ah hong kiningcing mahmah ta dinga, Middle East gamte ahih leh biakna vai, minam vai leh beh leh phung vai ah hong buai mahmah ding uh hi. Khau saulua kikaiawk bang ding uh hi. Hihte pen 1970 kuma “Future Shock” cih laibu gelhpa, laigelhsiam Alvin Toffler thukanna zum Toffler Associates te muhkholhna hi.

Tua laibu gelh kum 40 cinna phawkna in mailam kum 40 cianga thupiang ding a muhkholh a genna hi.

Tuma kum 40 huna tuni hun ding ana genkholh pen technology leh science nakpi a khantoh ding thu leh thukizakna ah thu kizaktuah ding tamlua ahih manin a thu bek kiza in a mihingte kiho manlo zah dongin thu leh la kibuaipih ding cih thu hi. Pawlkhat a gente dik peuhmah a, a diakdiak in Thuthak (News) pen mitphiatkal sungin leitung kimvial man ding, neih kibang kitenna (numei leh numei, pasal leh pasal) khangin tuate in ta nei ding uh a, innkuan bawl ding uh hi.

Buaina piangsak kidona leh kitot kiselna khang dinga, khua hun lum leh vot kikhek nasia lua ding ahih manin i tenna leitung nuamsaklo mahmah ding hi. Tua bang a genkholhte a tungtung hi a, USA gam ah meitui tawhkhiatna kicim leh meitui bua khawng zong environment disaster a genkholhna pan kimu theihte hi.

Tua ahih manin tuma kum 40 huna tuni hun ding a genkholh dik takpi ahih leh mailam kum 40 cianga thupiang ding agen kholh zong kitheihmawh bawl theih hilo ding hi. Tuipi tungah vanpuakna Ship te lianlua mahmah ding ahih manin van kisap khat peuh leitung kiu pan kiu dang khat ah puak ding hamsa nawn vetlo ding hi. Puak man zong tawm dinga, van man zong tam tuanlo ding hi. Tua a pian theihna ding in Suez Canal leh Panama Canals te kipuahpha ding hi.

Mihing a tamzaw in amau nek tawm ding ann ciing ding uh a, a kisap vante uh bawltawm ding uh hi. Tua in vanbawlna phual ah vanlei leh nek ding lei a paipai kul nawnlo dinga, amau leh amau a kisap khempeuh kizon tawm theita ding hi. Internet pen manlang mahmah ta ding ahih manin video tawh kiho kimuh cihte munkhat ah tukhawma kimu mah bang ding ahih manin mipi ading nasem leh kumpi nasemte in zong office ah tu sese lo in a omna mun khat peuh pan sem thei ta ding uh hi.

Leitung kiu khat ah a om zong khuasung khat ah omkhawm mah tawh kibang ding ahih manin koimun peuh pan office nasep sem thei ding hi. [Air Force One sungah tu vive tawh kibangta ding cihna hilo diam!]. Gam pawlkhat bek gilo ta ding uh a, ngawngtat a mipi ading haksatna a piangsak gam tawm mahmah ta ding hi. Gentehna in Iran leh North Korea cihte bang hong tawmta ding ci hi.

Tua hun ciangin politics (i cih mipi leh gam khantohna ding nasepna) pen khat leh khat kilapsangna lam hong hita dinga, politicians te nasep zong tua banga khantohna ding leh a gilo gamte tawh bangtana kizoploh ding cih gelna te hong hita ding hi. China kumpi leitunga nek leh dawn ah kiningcing pen leh a thahatpen hita ding ahih manin amau nasep ding lianpen amah banga thahat Brazil leh India tawh sumbawlna vai ah thudik taka kalsuan dan ding ngaihsut leh Venezuela leh Africa gamte ah meitha (energy) a kisap zah uh vaihawmsak ding hita ding hi.

US bel China gam pan piang rare earth metals nam 17 te galvan bawlna ding, meitha ngahna ding van bawlna leh cars bawlna ding nangawn ah kisam ding uh ahih manin China tawh a kizop hoih mahmah kisam ding hi. Petroleum a kizat nawnloh ciang leh alternative energy a kizat hun ciang US pen China sangin vanzat kicinglah zaw ding hi. US bek hilo in Saudi Arabia, Iran, Iraq, Russia, leh Venezuela, leh Gulf gamte zong thuak kha ding uh hi.

Christian biakna khang semsem dinga, leitung khempeuh kizel in leitaw lam diakdiak ah nasia mahmah ding hi. Muslim te zong nitumna lam gamte ah pemsuk ziahziah ding ahih manin amau omna mun peuh ah mite omdan leh gamtat dan, lungsim puakzia kilamdang pah lian in kumpi vaihawmzia zong kilaih kawikawi ding hi.

Khualum leh khuavot kilamdang manlang lua hangin kitotna tampi piangsak ding hi. Tuipi tui a level kahto ding ahih manin leilu leh leitaw (North pole and South pole) ah tuikhal (ice) te tuisuak in, leilu leh leitaw ah teng mite a tenna gam uh pan taikhia ding uh hi.

Pitek putek tam mahmah tading ahih manin tuate kepna khoina in sum tampi bei ding hi. Tuni a kizang khep li (4 times) bang kum 2050 ciang kizangta ding hi. US bangah social security leh Medisave, health insurance for the elderly cihte bei hiau ding hi: ahang – – a ngah ding tamlua, a pia ding tawmzaw, kumpi in a ngah thei khempeuh pia zo nawnlo ding hi. “Tua bang policy om ngei hi” kici bek ta ding hi, ci in Deborah Westphal, Toffler Managing Director in AFP te kiangah gen hi. “Tua bang policy te bang tawh kilaih ding hiam ka thei kei hi. Ka theih khat om a, i nuntakzia kilamdang mahmah dinga, i kisap zong kilamdang mahmahta ding hi. A mihing mahmah zong mi tuamtuam kihi ta ding hi,” ci hi.

Numei te in makai nasep len zaw ta dinga, makai thei zong kibehlap in mun khempeuh ah numei thunei tampi kibehlap dinga, gam tampi in, “gam khantohna dingin a gam mi za-ah-sawmnga (50%) bek tawh vaihawmna tawh hithei nawnlo,” cih phawk ding uh hi,” ci hi. Mai kum 40 hun ciang thuthak theihna manlang zaw lai dinga, Petabytes level ah kikahta ding hi, ci uh hi. Petabytes — i cih pen 10-to-the-15th-power bytes hi. Tua ‘bytes’ pen computer sungah files bangzah koihtheih cih genna hi(storage space). Tuni pan mai kum 2050 kikal sungin Petabytes tawh storage space genna kilimzat mahmah ding hi. Hau Za Cin (Phuitong Liim)