Tuucing vs Siampi

Tuucing vs Siampi

Tuucing le Siampi kibang lo hi. Tuhun ah siampi om nawn lo hi. Jesuh bek Siampi hi khin zo a, a bilbelin Thuciam lui’ gen siampi nasep tawh kisai-in thu-um mi khat ciat pen tuhun ah siampi za ngah a hi hi. Khangluite in simbeng zong kim citciat tangzang kiguang a cih mah bangin, thu-ummite lak panin tangzang kiguan in Tuute ahong cing ding kisam a, tua banga tavuan ih guat tuamte Tuucing ahi hi.

Thuciam thak hun (new dispensational) hun sungah Siampi cih kammal zat ding hi nawn lo zawin Tuucing cih kammal kizang ta hi. Tuamah zong Protestant te ii ih paikhiat pih RC tawh kilamdanna (distinctive) khat ahi hi. Siampi nasep tawh kisai diakah tuucing te in a sep ding sacrament pen tuiphumna le nekkhawm piakna ahi hi.

Pasian’ kammal hilhna le tua tawh makaihna cihte zong ahi hi. Siampi (Priest) cih ding hi lozaw in Tuucing (Shepherd or Pastor) cih ding hi zaw hi. Siampi daan in na ngaihsut lai leh na thuhilhna pen Thuciam lui pan in Thuciam Thak ah suak khia zo lo dinga, Thuciam thak panin Thuciam lui ah a ciah kikkik na hi lel dinga, na tuute lam maan ah na kha zo kei zaw ding hi.

Mihingte pen tuucing ki-ut lo a, siampi ki-ut zaw ahih manin, siampi suak nuam lungsim pawlpi mite sungah hong piang dinga, kiliatsakna le tutphah kituhna piang ding hi. A taktak in ci lehang Jesuh pen Siampi nunung in ih up ih saan leh siampi ih ut nading thu a om nawn lo hi.

Tua siampi za teng mah tawh a kidiah nop man vua Judah biakna makaite in Jesuh a na that uh ahi hi. Siampi hun hi nawn loin tuucin hun hi zaw hi. A kisam siampi nasep ding khempeuh Jesuh in man khin a, thu-ummite teng Pasian’ kammal tawh ih kicin ih kikep ding hi bek hi.

Siampi thunget cih hi lozawin, Tuucing pa’ thungetna (Pastoral Prayer) cih ding hi zaw hi. Siampi cih kammal le Tuucing cih kammal in kilamdanna lianpi nei hi. Siampi cih kammal ih zat ding ih khel theih het keileh zong Siampi cih kammal le Tuucing cih kammal kikal ah kilamdanna lianpi piang khin zo cih ih phawk den ding thupi veve ding hi. Leitung kiu-li pana a phualphual-a pawlpi (local church) te ii tuucing Church Pastor te a lianzaw a neu zaw om loin Pasian’ mai-ah a za (office) uh a kibang ahi hi.

Pilna, ciimna, sinna, theihna, hauhna, hatna, pawlpi mi tam nei zaw cihte tawh kisai ah kikim sitsetna om lo beka, ahi zongin Emmanuel Tuiphum Pawlpi kem tuucing pa le Paniel Pawlpi kem tuucing pa, Tahan Tuiphum Pawlpi kem tuucing pa le Mercy Tuiphum Pawlpi kem tuucing pa, Leipi Tuiphum Pawlpi kem tuucing pa le Sakhanzi Pawlpi kem tuucing pa a za (office) uh a kibang hi a, a neuzaw a lianzaw om lo hi. Pawlpi khat sunga a dawldawl a om pastors te thu bel hiah ih kikum man kei ding hi. By Evan. Suangh Dal