Tusawng Kawlgam Khuahun (25 Aug)

Tusawng Kawlgam Khuahun (25 Aug)

Tukha (August 2024) ni 3 ni in Kawl galkapte’ phualpi alianpen thumna ahi Lashio khuapi a om North Eastern Command (NEC ရမခ) minam thautawi 3 Brotherhood te’n buluh khia uh hi. 2021 kum buai khit tuni ciangciang ah anasiapen leh khuapi kilazo lak ah a golpen ahi hi. Lashio khuapi pen mi 150000 val omna khuapi mahmah khat ahi hi.

Kawl galkap te’n Military Regional Command စစ်တိုင်း 14 aneih lak vuah agolpen thumna ahi hi. Kawl gam ah township (မြို့ bek hilo မြို့နယ်) 330 om lak ah 3 Brotherhood te’n township 20 val lata uh hi. En zu zi khutsung ah zong township 1 om a, tuapen Tonzang ahi hi.

Ahuzap

Hih kawl galkap phualpi khat akiatna in huzap hau mahmah in mipi zong linglawng gawp zo hi. Kawl sum kiam suk henhen pah a, $ 1 = Ks. 7,200/ tan tung hel hi. August ni 6 ni in kawl galkap mangpa in TV pan thugenna nei in “Ka khahsuah teng ka lakik peelmawh ding hi” ci’n awng baabaa hi. Sen te’ tungah lungphotna mun pawlkhat ah hong om zeuhzeuh man hi.

Namgim tui zong hong haksa tektek in mi pawlkhat in zan taam liang in namgim tui ngak in kigual ngetngat uh hi. Men Ong Lai kiman cih thu nangawn kigen zeelzuul hi. Thu kawng khat hei ding un a upmawh huai tan hong tungto hi.

Kawl Galkapte Nuak

August ni 8 ni 3 Brotherhood te tawh kilemna vai kiho ding in Sen gam ah Sen kumpi in sam mah leh SAC (kawl galkapte) nuak in pailo uh hi. (BCP hunlai in zong tulai dan mah in Sen kumpi in BCP (or) CPB deihtak huh in Kawl galkapte nuai acih in nuai mawk ahih man un tua hunlai in kawl kumpi U Ne Win in Sen te nuaksan in USA tawh kizawlh san ngei hi. US te’n zong na welcome mahmah uh a, tua hunlai a US kumpi Lyndon Johnson in 1966 kum September 8 – 10 sung US ah sam in kumpi pa ngiat in White House sungah kimuh pih ngiat hi. Amaikum ciang in Yangon ah Sen leh Kawl minam kal buaina nasia tak in piang pah hi.)

Sen te’n mai-et kik

Kawl galkapte anuak ciang in Sen te’n zol kik in ambassador level tawh hopih kik uh hi. Ambassador thak ding in Ms. Ma Jia August 12 ni in Kawlgam hong pai pah lian hi. (SAC tawh kizopna ding ambassador sang aniamzaw ah akhiapsuk sa kimlai uh tu’n akhankik uh ahi hi)

Honpa hiphial hiam?

August 14 ni in Sen gamdang vuanzi Wang Yi hong pai ding cih thu hong thang vanghvangh hi. “Men Ong Lai akimat takpi leh takpi loh kitel pahve maw” aci zong om hi. Wang Yi leh Men Ong Lai kimu takpi uh a, Men Ong Lai nak maitai mahmah hi. Ih neu lai a ih nute vai hong tun ciang a ih nuam dan bang liang hi.

Wang Yi in “No hong do 3 Brotherhood te thukim pih kei ung: na kitelna bawl sawm uh hong huh ding hi ung: kawlgam ah daihna a omna ding lunggulh ung” cihiau ahih man in tangval lawmngaih ngahcilte bang in nui vemvam hi. Tua laitak migi mahmah khangel ding hi.

Kawl Sum Kah Kik

Wang Yi hong pai ni azingciang a kipan kawl sum aman kahto kik pah hethet hi. Wang Yi ong pai ni tawh kituak in Central Bank te’n bank sum met atawmpen 5% pan 7% ah khanto uh ahih man in tua hang zong hih tuak hi. Sen kumpi in SAC $3 billions amet omlo in leitawi pia hi aci zong om hi.

US zong kitom pah

Sen kumpi in SAC ahuh ding lam US in amuh ciang in Wang Yi ciah khit phet in kawlgam a minam thautawi K3C leh En Zu Zi te kimuh pih in “Hong huh ding kahi uh aw” ci hethat pong hiau mawk uh hi. Khangual khat hileh; “Na Burma Act uh leh na NDAA vai te beek uh e koi ciang?” cihnop huai peuhmah hi.

SAC te’ kithawina

NEC center Lashio kiata ahih man in Lashio pan Km 65 khawng agamlatna Mongyai khuapi ah tuah uh a, Major-General Myint Kyaw Tun lensak uh hi. LIB 325, 67 leh 22 te tawh kipan uh hi.

SAC in Militia Law (ပြည်သူ့စစ်ဉပဒေ) tangko khiapah uh a, militia te avui atang akipan akisam bangbang kipia ding ci uh hi. Kawlpi kiim bang ah Pyu Saw Htee ih cih militia Kawlte naktam mahmah ta ci hi.

Militia Law tha-hat sak

Pa-O National Organization (PNO) nuai a Pa-O National Army (PNA) te’n galkap training first batch sangtuah pawi August 21 ni in nasiatak in bawl uh hi. First batch ah galkap tul 10 kah cizen hi. Kawlgam tangthu ah batch 1 ah galkap mi tul 10 kah cih bel amasapen hiphial in um ing.

Amin in minam galkap ahih uh hang militia min tawh SAC tawh kizom lel ding uh hi. PNO/PNA in 1991 kum in kawl galkap tawh kilemna bawl uh a, Township 2 tawh Special Region No. 6 ci’n ciaptehna ngah uh hi. SAC akiat kei buang leh Township 2 bek ahih uh hang asawtlo in State ngah thei mahmah ding dinmun ah omta uh hi.

Party te tawh kihona

SAC in matpongtin apiak uh party te tawh kamkupna ni 2 sung nei uh hi. Tua lai ah NCA a kihel thautawi pawl 7 zong kihel hi. Tukha 21 – 22 sung kikupna Naypyitaw ah anei uh ahi hi. 2008 thukhun puah ding vai leh kitelna bawlzia dingte kikum uh ci hi. Tua kikupna ah kihel Zakhai makai khat ahi Dr. Aye Mg in “SAC bel tuk kei lua inteh” cipah lian hi. Tu ciangciang matpongtin apiak uh party 51 phata hi.

Bang ngimna himawk hiam?

SAC in Anti-Terrorism Law အကြမ်းဖက်မှုတိုက်ဖျက်ရေးဥပဒေ cih khat asuaihsuaih laitak uh ahi hi. Tu’n Second Draft tungta hi. Russia tawh zong Anti-terrorism lam Joint Committee (အကြမ်းဖက်မှုတိုက်ဖျက်ရေးပူးတွဲကော်မတီ) khat nei uh hi. En Zu Zi leh agalkapte uh bel Terrorist a aciapteh sa uh hinong ven maw.

Tulaitak Yangon

Zogam, Zakhai gam, Shan gam leh Kachin gam pan galtai tam mahmah a, innsap manh khang mahmah hi. Zomi sung zong pawlpite khang mahmah hi. Namgim tui haksatna bel om nawnlo tadih phot hi. Ih gam ah cidamna leh ki-it kilemna hong om ngiat ta hen.

Shalom !!!
Mung Laan Thang
Yangon