Turkey te vanleng Kyrgyzstan ah kia, mi 32 kiim si

Turkey te vanleng Kyrgyzstan ah kia, mi 32 kiim si

Jan. 16, 2017: Turkey gamte vanpuakna vanleng (cargo jet) Boeing 747 tu zingsang nai 7:31 am local time (01:31 GMT) in Kyrgyzstan gam-a Manas airport kianga om khua ta khatah kia a, mi 32 kiim in sihna tuak hi. A vanleng pen meii a sah luat manin kia a, sihna tuakte pen a tamzaw khua mite hi ci-in Kyrgyz ulian ten gen uh hi.

Airport administration ten a genna ah hih vanleng pen Kyrgyzstan khuapi Bishkek panin km. 25 gamla a om Manar airport ah a bawh/kinga pak sawm hi a, tu zingsangin Hongkong panin Istanbul khuapi zuan dinga leng hi ci uh hi.

Manas vanleng phual ah meii sah lua ahih manin khua ta khatah kia a, a kiatna khua-ah inn (building) 15 kisia a, mi 15 si hi thu a kizak cil in a kigen hangin mi 32 kiim si hi ci-in emergencies ministry management centre head Mukhammed Svarov in ci hi.

Medical staff ten a site lakah naupang guk kihel hi ci a, health minister in vanleng hawl (pilots) li in zong sihna tuak hi ci hi. Hih thupiang hangin Manas airport kikhak hi.

Flightradar24 in a genna ah hih vanleng pen Istanbul pansan Turkish cargo airline-te’ ACT MyCargo Airlines hi ci hi. Local media in hih vanleng pen Turkish Airlines nuai-a kilengsak flight number TK6491 hi ci hi. Source: Reuters news agency/ Thang Khan Lian