Tuni Zangkong Ah (05 September 2015)

Tuni Zangkong Ah (05 September 2015)

Tuni Zangkong ah Zomi leh Zogam ading in thunget khopna TBCY biakinn lui mun ah 12:00 – 2:00 pm kikal nuamtak in kinei thei hi.

Hun kipatna in Lamka pan aa Zogam Zolei ading in anuntakna hong piakhia sanggam Salphate zahtak piakna in minute 1 daihna tawh hunte kipan hi.

Tua khit ciang in Rev Dr Do Suan Mung in galpi nihna lai in Hitler’ khutsung atung dektak Britain gam Sir Winston Churchill’ makaih siamna tawh agualzawhna leh 1965 kum lai in Malaya/Malaysia gampan akihawlkhia Singapore gam Lee Kuan Yew ii kamaih siamna tawh tu aa dinmun hong tunna thute bulphuh in hanthotna hong nei aa thangah huai mahmah hi.

Tua khit ciang in Dr Khup Lian Pau in thunget hong makaih aa khitui naptui tawh apai khempeuh in Zogam Zolei aa ding in thungetna kinei hi.

Tua khit ciang in Zolia lasiam mahmah khat in la hong sak khit teh Rev Dr Go Chin Zam leh Lengtong Kam Khen te’n Pasian’ thuthuk tawh hanthotna hong nei uh aa Mung Lan Thang/ Thangboi in zong Lamka lam buaina tawh kisai pawl khat genna nei hi.

Hun tawpna ding in Rev Dr Do Suan Mung’ ngetna om bang in tutung gambup kitelna pan Zomi tading in ahoih penpen kumpi hong kahna ding in thu ngetna kinei hi. Sia Mung in “Mihing’ mit tawh et in adah huai tampi om hi. Thumante hong gualzawh lohding dah huai hi” ci hi.

Apai khempeuh Rev Dr Go Chin Zam in moh leh avot tawh hong vaak ban ah agamla pan aa hong pai ta ding mawtaw vaihawmsak lailai hi. Zaksakna aneihna ah “A sawtlo in India Embassy ah banglo khat ki vaihawm ding hi” ci hi.

Gen kizom suakvet in ah:

Galkap ki-ukna nuai ah omlai hun haksat mahmah hun lai in ZNC hong panpih gige den pen kei’ theihna ah anuai aa teng hi.

1. Rev Gin Khen Mang/Sia Khenpi
2. Rev Dr Do Suan Mung
3. Rev Dr Go Chin Zam
4. Pu SB Thangno (Pu Dai Cin’ tapa)
5. Pu SB Langhno (Pu Dai Cin’ makpa)

Hih teng in ZNC na huh gige den uh ahih manin Zomite’ party tuni dong anungta zo ahi hi.

Lungdam
Mung Lan Thang/ Thangboi
Zangkong