Tulsa Paina Report ~ Rev. Gin Khan Nang

Kum 2008 Lungdam Bawl leh Kumthak hunin ka laisimna tawh kisai manlah pian ka hih manin koi mahah ka paikhia man kei hi. Lungdam Bawl ni taktak ciangin kei kia-in khan sungah omin, lung leng keii hi. Ei gamah Lungdam Bawl leh Kumthak hunte pen biakpiakna a thupi pen ni, mi tam pen ni, a kikhawm ngei lote in tua ni beek kikhop hamtang sawmin a hanciam ni hi a, pawi an nek khop ding mah ut pena i neih ni ahi hi.

Tukumin kei zong hih ni thupi nite Tulsa ei mite kiangah zang dingin ka khensat hi. Dec. 17, 2009 ni-in LA (Los Angeles) panin vanleng tawh pai-in Dallas Fordworthah ka tu masa uh hi. Tua panin paikikin nitak 8pm pawl a tung ding pen vanleng ziakai ahih manin 9 pm pawlin ka tung pan hi. Ka sanggam nu Nu Docing, a tapa Mangno leh Khualpu (Kham Khan Kual) in vanleng tualah hong dawn uh hi. Inn ka tun uh ciangin 11 pm sat phial ta hi. Pa Khual pen Murlen khua suak hi a, a neu lai-in ka sangnaupang hi ngei hi. Aman zong ka sangsia lui hong pai ci-in hong dawn ahi hi. Amaute deihsakna tawh Tulsa khua nuam takin ka tung thei hi. Nu Docing pasal Pa Ngothangte inn pen inn bangin ka zat ahi hi. A tapa Mangno leh a lawmnu Tengno in tanu khat nei uh a, ka pai masak sangin innkuan na tamzaw ta uh hi.

Kikhopna tuamtuam: Tulsa khua-ah Zomite kikhopna tuamtuamah va hawh kim ding ka ut hangin ka hun in cin lo ahih manin mun 4 bekah ka kikhawm thei hi. Dec. 20 ni-in Far East Myanmar Christian Mission Pawlpi-ah ka kikhawm a, Senior Pastor Rev. Cin Khua Kham leh huh sia Rev.Dr. Nang Khen Khup makaihna ahi hi. Kikhawm zong hoih bilbel a, khangnote in lapawl sa-in teci panna hun zong bawl uh hi. Lamka pana pai Tg. Khan Kham pen khangno makai-in om a, Tg. Zam Khan Thang zong hong kikhawm hi. Pa Khualpu in teci panna leh lasakna nei hi. New Lamka a om ngei Pa Gin Suan Paute innkuan zong hih Pawlpi-ah na omin nuam tuam mahmah hi. Kikhop tawp ciangin niangtui dawnna hun ka nei uh hi.

MCC Pawlpi-ah: Myanmar Christian Church pen Rev. Dr. Kham Khan Khai leh Sia Lianno makaihna hi. Amau Kawl hun (2pm) leh Zo hun (6pm) nei uh a, Zo hunah hun hong pia uh hi. 2006 kum December kha ka pai lai-in hih Pawlpi bek omin Pawlpi dang om nai lo a, Kawl pau bek tawh biakna bawl uh hi. Tuhun ciangin mi zong kicing zaw deuhin, Kawl hun leh Zo hunin na khen ta uh ahih manin khantohna khat hi ci-in ka mu hi. Lamka mi Rev. Lian Cin Khup zong hong kikhawm thei hi. Pa Khual in teci panna leh lasakna mah tawh hong uap thei hi. Mel theihsa pawl khat na omin nuamtuam mahmah hi. Khangnote in Christmas Carol khua vot nuai-ah vak uh a, thalawp thei mahmah uh hi. Pawlpite dangte zong Carol vak tek hih tuak hi. Ka zin tunnate omna Pawlpi hi a, kikhop kik ding ka ut hi napi-in hun nei nawn lo ka hih manin ka kikhawm man nawn kei hi.

Oklahoma City-ah: Florida a om ngei Pa Tuang Khan Nang in Dec. 22 ni-in hong hopih a, Oklahom city a om Zomi teng in ko innah Lungdam Bawl ka zang ding uh hi, hun na ngah leh hong pai thei leteh ut ung, hong cih ciangin Lungdam Bawl ni pen hun dang nei lo ka hih manin pai dingin ka khensat hi. Dec. 24 ni-in Greyhound Bus tawh ka pai hi. Zingsangin guahzu a, guahzupi mahin ka ding khia uh hi. OK city ka tun kuan uh ciangin vuuk na kia-in khua sung ka tun uh teh vuuk na sah mahmah ta hi. Patuang in Bus khawl munah hong dawnin vuuk lakah a omna uh Norman veng lam zuanin ka tai pah uh hi. Lampi-ah vuuk zu ngeekngeek ahih manin lamhaksa mahmah a, mun khatah ka tang dektak uh hi. Norman ka tun dek uh ciangin motor khat pai zo nawn lo ahih manin lampi khak a, kipai thei nawn loin nai khat val ka khawlcip uh hi. Vuuk tam ahih manin lampi nalin lau huai mahmah a, a sawtna ciangin tawmtawm kikhinin tak lamah ka pelh thei uh a, Norman cidamin ka tung thei uh hi. Patuangte innah nungak tangvalte in an nek ding na bawl ngeingai uh a, vuuk lah pak zihziah hi. Nitak lam ciangin Lungdam Bawl zang dinga hong paisawm Zomite vuuk sah lua-in lampi kikhak ahih manin hong pai thei nawn kei uh a, a paisa teng zong a ciah thei nawn kei uh hi. A paisa teng Patuangte innah zan khat giak uh hi. A om teng in Lungdam Bawl hun zangin nuam takin kikhopna ka bawl thei uh hi.

MZBC Pawlpi-ah: Dec. 27 ni-in Myanmar Zomi Baptist Church Pawlpi-ah hun ka zang hi. Rev. Thawng Khan Cin makaihna hi a, Sia Vung Lian Mang pen lai-atpi ahi hi. Biakinnah kikhop theih loh ahih manin Upate inn khatah ka kikhawm uh hi. Biakinn pen vuuk tam lua-in motor koihna ding (parking) om lo ahih manin kikhawm thei lo uh hi. Pa Khual omna Pawlpi hi a, teci panna leh lasakna mah tawh hong uap hi. Khangnote in lapawl siam takin hongs a uh hi. Teci panna hun zong kihong a, teci pangte in vuuk lak panin i nuntakna Topa in hong kepsak a, hih bang hun pha i ngah pen lungdam hang ci-in pulak ciat uh hi. Hih lai-ah zong mel theihsa na om a, nuam tuam mahmah hi. Kikhawm zong upmawh sangin hoih zaw hi.

ZBMC Pawlpi-ah: Jan. 3 sun hunah Zomi Baptist Mission Church ah hun ka zang thei hi. Rev. Kap Khan Mang, Sia Thangbawih leh Upa Langnote makaihna hi. Kikhopna pen gamla pian napi-in makaite in motor tawh hong la-in ciah ciangin ong khakik vingveng uh hi. Khangnote in lapawl sa-in teci panna hun kihong a, tha kingah thei mahmah hi. Kumthak nipi khatveina ahih mah bangin Sia Kap Mang in nekkhawmna zong hong bawl hi. Hih Pawlpi pen Tulsa khua adingin a naupang pen hi a, kha 4 bang pha pan hi napi-in kikhawm zong hoih bilbel hi. Kumthak ahih mah bangin Pasian adingin “hici zaw lai leh” cih ding om loin, “hih theih tawp” siam theih tawp, hat theih tawp suahin (Thsia 3:12) Pasian adingin nuntak ding cih thu tawh ka kihanthawn uh hi.

ZCF kikhopna-ah: Jan.3 nitak 7:30 PM panin ZCF kikhopna 2010 adinga masa penah hun ka zat theih pen lungdam mahmah ing. Makai ahi Sia Thawng Khan Cin, Sia Cin Khua Kham, Sia Kap Khan Mang, Sia Vung Lian Mang, Sia Cin Do Kham leh Nu Khumi (Manipur Minister Pu Phung Za Thang tanu) te in kikhopna-ah tha hong pia tek uh hi. Sia Khamno in hun ukin, Khangnote in lapawl siam takin sa uh a, mihon thungetna zong kinei hi. Kikhawm zong hoih mahmah hi. Thupi ka sakna panin ZCF min tawh Kawlgamah missionary kikhah cih ka theih ciangin thupi ka sa hi. Zomite pen koikoi-ah i om zongin mission nasepna a thupi ngaihsutte hi hang cih hong phawksak hi. Thkna 6:4-9 sung siksanin Isreal mite in Kanaan gam a luah uh ciangin a omzia ding uh Moses in ahilhna thu tung tawnin Zomi US gam a tung mite omzia ding leh Pasian mangngilh loh ding cih thu tawh ka kihanthawn uh hi.

Zomi Innkuan tawh holimna: Dec. 28 (Monday) nitakin OK Zomi innkuan makaite vaihawmna tawh Sia Vung Lian Mangte (Mangpi) innah holimna ka nei uh hi. Leitungbup ZI makaite akipan, OK ZI leh US ZI makaite ahithei teng paikhawmin holimna ka nei uh hi. A tamzaw pen khangno lam hi a, Malaysia-ah minam vai-ah a thuaknate uh hangin minam itna khangno sungah om hi ci-in kimu thei hi. Holimna sungah Zomite kipumkhatna ding, Lai leh pau lamah kipum khat theihna ding kilim gen pen hi. Kipum khatna dingin kam pau ahi zongin lai gelhna tawh ahi zongin kipum khat theihna ding nakpi takin hanciam ding hoih kisa ciat hi. Kipum khat theih lohna a tuamtuamte, lai gelhzia kibang lote, upna tuamtuam leh Pawlpi tuamtuamte hangin kibuaisak loin, lai lam leh pau lamah kipum khat zawk sem nadingin hanciam ding kideih tek hi. Sangmang J.H. Cope in hong pattahna laibute zong kipho khia a, khangnote in a muh ngei loh uh leh a phawk khak loh uh thute a muh uh ciangin Cope topa nasepna pen thupi kisa ciat hi. Holimnate CD leh Youtube ah kisuaksak hi.

Thukhupna leh Lungdamkohna: Jan.2 ni-in ka naute uh Nang Za Kai leh Go Deih Lunte in innthak lutna nei uh a, tua-ah inntek thugenna hong tangsak uh hi. Mualbeem kipawlna panin vok khat, Kimpi leh Mungno (MCC) in Kel khat leh Hau Lian in Kel mu zo loin Bawngsa tawh huh a, hih banga kihuh tuah siamna pen thupi ka sa mahmah hi. Kaipite pen Guasing khua pan hi a, ka pa Zam Za Nang tupa ahi hi. A diakin ko Khupson beh sung panin US ah inn nei masa pen hi dingin ka um mawh hi. Tulsa khua a om Pastor 6 bang hong kihel thei ahih manin lungdam mahmah ing. Pa Hau Lian leh Nu Mante innkuan in zong inn leithak a, thungetna hun zang thei ka hihmanin lungdam ing.

I theih tek bangin Tulsa khuapi-ah Pawlpi tuamtuam om hi. Inn lamah Pawlpi tuam tek i hih manin ahi thei ding mah hi ci-in ka ngaihsun hi. Ahi zongin a sia lamin ngaihsun loin omna Pawlpi tek panin tha la-in hanciam tek ding thupi ding hi. Kuamah kideidan lo, kigensia loin, kilang bawl tuan se loin eima mai lam ciatah Topa adingin hih theih ciangciang sep tek ding thupi ding hi. Ka tha ngah mahmahna khat pen Sia Do Khamte, Sia Khamnote, Sia Cicinte ta nungakte in Zo kam tawh la sa-in, lapawl khawngah makai-in hong om uh ciangin ka lungdam mahmah hi. Bang hang hiam cih leh tu-a nungakte pen US a khangkhia hi ta uh a, mikang kam zat nuam sa zaw ta uh hi napi-in Zo kam tawh biak piakna a om ciangin eima pianpih pau tawh la hong sak ziahziah uh pen tha ka ngah mahmah hi.

A tawpna dingin lungdam koh ding tampi ka nei hi. Nek leh dawn akipan neihsa lamsa ahi zongin Pawlpi leh mimal deihsakna ka ngahnate hangin lungdam mahmah ing. Hotel a hong paipihte ahi zongin innah an hong nekpihte khempeuh tungah ka lungdam hi. A diakin Rev. Dr. Cin Do Kham in ka ciah ding ni sun an Vietnam Hotelah hong nekpih a, Sia Cicin, Sia Sawmkhup leh Sia Mangpi tawh holimna nuamtak ka neih theih manun zong lungdam mahmah ing. Tua bek hi loin Sia Dokham leh Sia Cicin in vanleng tualah hong kha-in a hun uh leh neihsa uh tampi sengin hong buaipihna, hong khualna uh hangin lungdam thu ka puak hi. Amau pen leitungbup ZI makaite hi a, kipia zo ka sa mahmah a, etteh huai ka sa hi. Tulsa Pawlpi tuamtuamte leh mimal kim tungah lungdamna gen kim zo lo ka hih manin hih lai-ah ka pulakna nong sansak tek ding uh zong kong thum hi. Kumthak Thupha Zomite khempeuh tungah hong tung ta hen!