Tulaitak NCA dinmun leh maban ~ Bob Tuangpi

Tulaitak NCA dinmun leh maban ~ Bob Tuangpi

Gambup kumpi, galkap leh mualmi thautawite’ thukimna (Nationwide Ceasefire Agreement – NCA) dinmun leh maban ilungngaih kik zel ciangin mualmi thautawite’ lam pan pilvanhuai leh ngaihsut kidawp ding thu tampi hong om ta hi. Tu ciang in bel hih NCA thukimna ah kihel mualmi thautawi pawl (10) pha hi.

Tulaitak mualmi thautawi lompi (3) kisuah thei hi. NCA thukimna nei pawl, Federal Political Negotiation and Consultative Committee (hih pawl -7 sung ah kumpi tawh alangtuak apawlzui thukimna nei pawl om in aneilo pawl -4 om), NCA ah lah lutnailo, FPNCC ah lah kihello pawl (Gtna : KNPP, Naga) cih bang lamtuamtek zui om uhhi.

NCA thukim pawl/signatories groups pawl tulaitak dinmun leh maban ahih leh nungkik ding lah haksa manawt ding lah mai kikhakcip (Political Deadlock) lampi tungah om uhhi. Nungkum abeisa NCA thukim makaipi teng, NLD kumpi leh galkap makaipite’ kamkupna ( 10 +10 + 10) pan hong kipan ahihi.

Tua hun pan kipan mualmi thautawi NCA group lutangpi (2) ahi KNU leh RCSS in adinmun uh khauhtak tangkokhia-in NCA maban kamkupna khempeuh ah kihel nawnlo ding khensat photin pawl (1) leh pawl (1) kihokik masak phot ding ( Gtna : KNU – Galkap kithumin masa ding tua teh NCA maban zomkik pan ding) cih thu hi a, tua zawh tunitan (2) vei khong kamkupna nei napi uh thukimna hih hi (Result) khat zong om theinailo hi. RCSS zong tunitan tua bang dinmun mah ahihi.

Tua ahih man’n gambup kilemna khawmpi (Union Peace Conference – 21st Century Panglong) zong maban kizom theilo hi. Maban zop ding thukimsa (Union Accords 51 Points) te nangawn mualmite’ deihna gam kivaihawm nang lamet tam khollo lai hi.

NCA thukimna apomzo nailo tulaitak mualmi thautawi thahat penpen kipawlna pawlmi leh tunitan kumpi galkap tawh kidolai (Northern Alliance Group – KIA, MNDAA, AA, TNLA) te anunung pen kumpi palaite tawh athukimna (30.4.2019, Muse Talk) vuah pawlkhat tek in kumpi tawh thukimna nei masa ding (Bilateral Agreement) cih thukim uh a, tua khit teh NCA etphatna leh puahphatna/behlapna neihkhit tak teh NCA thukimna sign pan ding cih ahihi (NCA puahphat nading ah FPNCC Political Roadmap zui-in dingtang ding) cih ahihi.

Hibang dinmun bilbial kawmkal ah mualmi thautawi NCA thukimna ah luut ding alunglut zenzen a om leh ngaihsut ding leh pilvanhuai thu tampi om hi. Hamphatna lam ah (စီးပြားေရးအျမင္) bang diakdiak ah 2015 NCA signed pawl (8) danin Motor Permit leh Business Permit nengneng ngah ding nangawn om nawnlo hi. Gamvai kamkupna ah mun (1) NCA pawl in angah uh 21st Century Panglong nangawn bang hun teh kipankik ding cih kuaman genkhol theilo hi.

NCA luuttheih nading lampi ahih leh State/Region Level Government tawh thukimna neih masakkulin, tua pan gambup kumpi/Union gpvernment tawh langnihtuak thukimna ( Bilateral Agreement) neih khit teh NCA ( Nationwide Ceasefire Agreement) lampi ah aluutciat uh ahihi (Theih ding : tutung Northern Alliance leh NRPC kimuhna ah bel kumpi lam pan lampituam khat tawh N.A lam pan Bilateral Agreement a omnai loh hang NCA) ah luuttheih ding zawtna nei uhhi.

NCA maban ngimna bulpi ahih leh gamvai thukimna ngah khit teh (Union Accords/Political Dialogue) mualmi thautawi teng in thaukhiat kul ding (DDR – Disarmament, Demobilization, Re-integration) cih lampi (nung 21st Century Panglong Khawmpi (3) na madeuh in zong NCA signed athahatlo asak uh honkhat DDR bawl dia ngattak galkap lam pan sawlna om khin) hi. NCA leh 21st Century Panglong pan kingah thukimna teng nangawn 2008 thukhunpi khengvalin kipusuakzo nailo mawk hi.

Tua ahih manin, NCA signed pawl (10) tungah pilna laak kawmkawmin FPNCC/NA te’ tawnzia encik aa adangteng (NCA leh FPNCC huangpua ah omlai mualmi thautawite) in amau leh amau kiging kawm/အင္အားတည္ေဆာက္ aa bilvaktakin khuadaak siam mahmah ding lamkal (လမ္းဆုံလမ္းခြ) ah atung uh ahih ziakun lamkoi khat ah apaikhial khatte gamthu ah leitang kizepna-in amuuktuk/kigui awk (Political Suicide) theih ekh hun uh ahihi. Agelh: Bob Tuangpi