Tulai thupiang kei’ muhna ~ Pu Thangboi

Tulai thupiang kei’ muhna ~ Pu Thangboi

Tulai kawlgam thupiang pen sabak kituhna ahi hi. Kawlgam hluttaw sung ah kawl galkap te’n aki lam et zah uh mun angah loh ciang un tu a lampi azuih mai uh ahi hi.

Amau’ ut masak bel:

Kawl galkap te’n party honkhat khawi uh hi. Kitel madeuh in party 34 leh kawl galkap mangpa kimu uh hi. Tua party teng akhawi uh ahi hi. Kitel madeuh mah in lutol Wirathu leh Bullet Hla Swe te abukna uh pan in ong paikhia uh a palikte’ kiang ki ap ziau uh hi.

Ngimna:

Kitelna ah kawl galkapte’ khawi party teng in akigawm in 26% mun angah nakleh a omsa kawl galkap 25% tawh gawm le uh hluttaw control zo ding uh a, kumpi semzo ding uh hi.

Tua hi leh adeih bang un paipih thei ziau ding uh a Wirathu, Hla Swe, Kyi Lin cihte pawl khahkik ziau lel ding uh hi.

Upmawh banglo

Aki lam-et uh ong banglo in NLD in 2015 kumlai sang in zong tam ong zawhzawk lai mawk ciang in thukawng khat ong hei uh ahi hi.

Mawhzonna

NLD in hihzah angah theihna pen vote kigu pawlkhat a omman hi ci’n kawl galkap te’n ngawh uh hi. Tua ahih man in:

• 1. Vote simphat ding
• 2. UEC athak tawh laih ding
• 3. Hluttaw sap nailoh phot ding

in kawl galkap te’n NLD kumpi’ tungah ngen hi. Kawl galkap mangpa ngiat in zong NLD te’ pi ASSK’ tungah laikhak ngiat in ngen hi.

NLD in khat zong manglo hi. Azenzen in NLD in vote sitphat ding na ut henla, vote gu peuhmah thu bawl ding naci lian ngam leh hih tan tung khollo kha ding hi.

Maban

Kawl galkap te’n a utmasak pen uh ahih loh hang amau’ ngaihsutna ah hihloh aphamawh “Sabak tuhna” in thuneihna hong buluah phot uh hi.

Atangkona vuah

Kum 1 khit ciang kitelna bawl ding in agualzo party te thuneihna apding

Vote sit pha ding

cih thu 2 kihel hi. Hihte gel ki tukalh simtham hi.

Kitelna bawlpha ding acih teh abeisa kitelpi result pen kimang nawnlo ding cihna hi napi bang dia vote sitpha ding cimawk aitam ?

Kei’ upmawh thu 2

1. Vote sitpha ding in amau’ party lamte honkhat ngahsak kik ding. Atung a ih gen dan in adeihzah uh angah teh hluttaw sam sak ziau ding in kumpi phuan sak ding.

2. Maikum kitelna ah NLD athanem theihna ding in NLD pan MP te mawhzon theihna ding leh mat theihna ding in vote sitpha ding.

Amasapen ahih leh bel sawtlo in galkap ukna hong bei ding a gamdang pressure zong tampi kiam lel ding hi. Khuahun ong kihongkik pah ding hi.

Anihna ahih zenzen leh bel vaisah mahmah ding hi. Hih lampi azuih sawm uh leh NLD kumpi sung a panmun nei teng zong mawhzonna leh khumcipna ding lampi ong zong lai ding uh hi. Sianggen leng bel NLD leh ASSK asih muhdah uh himai hi.

Lampi nihna ong zuih mawk uh leh bel buaina tampi hong om ding hi. Mipi zong mawk om tuanlo ding ahih man in tawlkhat bel sialkhau kisuh phot ong kul ding hi.

Tutadih bel Zomi te’n khut zep phot zaw mai leng hoihzaw in ka um hi. Lungdam, Mung Laan Thang (Tonzang, Zogam)