Tulai Pawlpi te buaina pawlkhat – I

Tulai Pawlpi te buaina pawlkhat – I

Leitungah a beisa kum 100 tampilai a kipan Pawlpi sung buaina ki khenna na omkhin in Zogam dong’ hong tung hi. Tuate ki khenna a, ki siatna ki tot ki selna na a tangpi in doctrine na hi hamtang hi. Ahi zongin tulai Pawlpi ki khen pawlkhatte I etciangin doctrine mahmah ki helkhalo hi. A hang tuamtuamte lak-ah pawlkhat Pastor/Sia utman, UPa utman, Sum zatnop man, beh lungsim, khua lungsim, pau awkaih lungsim neihman peuh hi leh kilawm kasa hi. Tua ahih manin tulai Pawlpi buaina ahang pawlkhatte enpakleng:-

Pastor/Siate hang hi: Pasian in kei tuasem dingin hong tel takpi hiam, cih ki-en masalo in amau utthu tawh, beh le phung khua le tui, ki tanu deihsak man tawh, semgiap ngam uh hi. Israel mite makai ding peuhmah Lai thei hi hamtang ding, nek le dawn, gamtat luhek siangtho ding, sum huaihamlo ding etc, Pasian in naci hi. Tua hita leh Pasian in a nasem dingin hong sam, hong deih, hong tel hi, cih paulap nei-in bangmah theilopi, laitan neilopi semgiap, ki pumtel, ki pumdeih sak uh hi. A mau leh amau Pastor/Rev/sia kipia zong om hi. Pasian in mikhempeuh a nasem dingin asap hi-a, Pastor/sia dingin mi khempeuh samkhinlo hi. Tua ban-ah Sia pawlkhat te’n seppih upate leh mipite guptuam paih tuam neithei uha, Meeting leh vaihawmna khat peuh ah amau thu bek mah thusa in Meeting neihma in a zi or mi pawlkhatte tawh ki kumkholsa in Meeting pai phiauphiau uh ahih manin a tawpna ah Pawlpi buaina ki khenna nangawn hong piang saklai hi.

UPate hang hi: Pasian in Siate bek encik ding cilo in UPate zong limtak encik ding ci-in hong hilh hi. Pasian in mikhempeuh Pastor/sia dingin asap atel loh mah bangin mi khempeuh UPa sem dingin samkhinlo hi. Tua hita leh Pawlpi a tamzaw in UPa I tel dingteh Lai Siangtho deihna tawh ki tuak in I tel I encik kei a sum le pai a neih manpeuh in I tel hi. Bangmah theikeita leh a zi ata ukzo keita leh a zite tungah citak keita leh angkawm zelzelta leh meigong nupite khawng kawmkawmta leh, khamthei guihtheih khawng suta leh zuakta leh sum a neihman, a semding om loh man etc, ci-in I telmiau, I zanghmiau thei hi. Tuaci bang mite pawlkhat amau leh amau zong kitheilo in a seppihte leh a tungsiahte khawng mawhna ding zongnuam in gensia ngam hawmthawh ngamlai dep uh hi. Meeting zong makaih theilo, thu zong khensat theilo in a aw-ngaih, a pauhang khat peuh cih hoihta kei leh manta kei leh he,he,he, acih uhteh Pawlpi sung buiana hong ki pan ciauciau thei hi. Pawlkhat Sia uttheilai uh hi. Hici bangmi te’n panmun deih mahmahlai thei uha, ki telkuanteh mi inn pawlkhat ah vak-in mehneng peuh vakholh, vankhat peuh vapia, va holimpih theilai sawnsawn uh hi. Amau Idia bangmah neilo in a zite thu,a beh a tanute thu mi dangte thu tawh Pawlpi makaih uh hi. UPa ngahkha kei leh thadah lianin a semte gensia theilai uh hi. Beh lungsim, khua lungsim pau awkaih lungsim khawng nei-in tua tawh Pawlpi makaih uha, ama naihuai khatpeuh gamtat luhek ut bangbang in gamta in Pasian thu tawh kituak keita leh Pastor/sia ding khawngin deih in a seppih UPa pawlkhatte tungah kuatheih loh kal in vadap kupkup thei hi. Meeting neih dingteh Committee member ahilo mi pawlkhat a seppihite thukimna theihpihna omlopi in dapzot in a genda zong pawlkhat tawh ki holimsa, amansa in pai uha, a lawmdang te’n thei kik veve uh hi. Hici bang lungsim tawh Pawlpi aki makaihteh Pasian thu tawh ki tuak-a, a kalsuan nuamte’n nuamsalo in a tawpna ah Pawlpi sung buaina ki khenna hong piangsak hi.

Sum hang hi: Sum pen zatdan ding kep danding khensatsa omta leh makai pawlkhatte leh sumkem te’n zuilo in a nadapzatteh ki thei veve a a tawpna ah Pawlpi sung buaina lianpi hong tungthei hi. Mipi pawlkhat in a zangh pa/nu amau tanau,beh,khuapih naihuai ahih leh pawlpi thukhun bangin painuamlo, semnuamlo in pumgup thei uh ahih manin Pasian thu leh Pawlpi thukhun tawh kituak a, a kalsuan nuamte’n nuamsalo in a tawpna ah Pawlpi sung buaina ki khenna hong piangsak hi. Makai pawlkhat in zong theita leh maikum ah makai ngahnawn kei kha leh ci-in genngamlo thukhun om bangin semngamlo thei uh hi.

Tua hih manin Pawlpi khat peuh abuai ciangin nang Pawlpi a buailo bangin pawlkhat vamawhsak, vakuppihse kenla lungsim takpi tawh thu ngetsak zaw in. Pawlpi khat peuhmah in thanemna, gen banna neitek uha, ahi zongin a tunga I gen bangin Pawlpi a kalsuan peuhmah khangto henhan ngeiloding in buaina om den hi. Na Pawlpi khantoh ding na ut leh hih a tunga teng tawh na kipelh phot hong kul teitei ding hi. Hun neihtek aban zomlai ni.

Khaibawi