Tuipi khua ah Zomi MP te tawh

Tuipi khua ah Zomi MP te tawh

Ih lunggulhna leh ih thungetnate Pasian in hong dawng in Zomi MP te tawh Tuipi khua va sik in taksa leh kha nuntaknate ah akisam mahmah thute va suut thei ung. Khualzinna tawh kisai atom thei pen in hih dan hi.

April 22 ni Tedim pan zingsang nai 10:00 in dingkhia ung. Tuithang ah baang in sanginnpi en ung. Sanginnpi tawh kisai thute gen khit ciang in Tungzang lam zuan ung. Tungzang te’n sun an lim mahmah hong vak uh hi. Tua khit teh Tuithang leh Tungzang te’n Tuipi khua ah saikel 7 tawh hong khasuk uh hi.

Tuipi khuazang in hong dawn in Zolapite hong sak uh a thau ngaih mahmah lawng tampi hong lot ban vuah sial gol mahmah khat hong gawh uh hi. Nitak an khuazang bup in kine khawm hi. Nitak an nek khit ciang in MP te in khua leh tui khantohna ding thute gen uh a ken zong Pasian’ thu kagen hi. Mailam ah Tuipi Khua khantohna tawh kisai nasep zia ding ngaihsutna thak tampi hong phuul khia hi. April 22 ni zan Tuipi khua ah ka taam uh hi.

April 23 ni zingsang kiallap nek khit teh Pangzang khua kapai uh hi. Pangzang khua ah khua leh tui khantohna ding thute gen khit ciang in sun an lim mahmah hong vak uh hi. Tua khit teh Tuipi ah kileh kik phei in sun an nekloh phamawh ci leuleu uh ahih man in hen zawhzah kihen leuleu hi.

Tuipi pan in saikel mah tawh Tungzang ka kahto kik uh hi. Tungzang ah khua upate’n hong vaitun uh a khua leh tui khantohna ding kikupna om leuleu hi. Tungzang pan Tedim lam zuan in mawtaw tawh ka ciah kawm un Tuithang hausapa’ inn ah ki baang uh hi. Hoihtak phatak in zin hong do hi.

More: Thu Pulaakna: Zomi Innkuan USA Kumcin Khawmpi 2017

Tutung Zomi MP te tawh khualzinna pan mipite’ kampau kazak mun pen:

“Nidang a ulian te tawh kimu ding hileng kawl pau zat kul den keei. Tu’n bel eipau tawh kiho ziauziau hi in tua mahmah nuam” citek uh hi.

Gennop tampi tawh

Mung Laan Thang