Tuhun leitung mipilte leh Pasian

Tuhun leitung mipilte leh Pasian

Kawl gam pan USA ka tunciang in Kawl gam ah ka muh khak ngei khol loh Dinosaur guh lim tuamtuam ka mu kha koikoi a, “Lawmte’n dinosaur it phadiak uh ee!” kei leh kei ka ci thei zel hi. Tua ciang bek tawh hi lo in, sang naupangte in a sang kahna uh ah, mihingte zawng peuh ngau peuh tawh kibehkhat cih dan in a sin uh khawng ka nung theihtheih ciangin um ngam lo phialin dah huai mahmah ka sa hi. Tua ngaihsutna pen kikhel tohtohna, evolution theory kici a, a ngaihsun khia pa’ min pan kila in, Darwin upna(Darwinism) zong kici hi. Hih Darwin upna leh Laisiangtho ah Pasian in mi a bawlna, Creationism pen kilehbulh lian ahih manin, khat a maan leh khat khial hamtang ding cihna hi pah hi.

Bang hangin, mi 100 lak ah Pasian bia 75 bang a omna gam ah Laisiangtho tawh kituak lo thute kumpi sang ah kisin sak hiam? A beisa 1860 ma ciangciang, kumpi sangte ah Pasian in mihing leh nate a bawlna thu kisin sak hi. Kikhel tohtohna thu ong minthan ciangin kumpi sangte ah kisin sak hi. Leitung galpi masa khit lam ciangin Pasian’ thu-um William Jennings Bryan in kumpi sangte ah sin sak nawn loh nading makai in ong vaihawm a, lawhcing lua lo dan in ka mu hi. Tennessee ah bel kikhel kik sak hi [http://en.wikipedia.org]. 1981 kumin Arkansas state ah mihingte /nate Pasian in a piansakna kumpi sang ah kihilhna ding thukham bawl ding a hanciam uh a, a tawpna ah zo uh hi. Luciana ah zong tua bang dan mah hi in a tawpna ah lel uh hi. [http://www.religioustolerance.org/evhist.htm].

States tuamtuam ah, kihanciam zel in kilel den mawk ta hi. Hih kikhel tohtohna thu pen kumpi sangte ah nakpi zungkha ahih manin damdam in Pasian’ thu-um mi kiam semsem hi. 1985 kum in Watchtower Bible and Tract Society pan akibawl khia, “Life- How did it get here? By evolution or by creation?” cih laibu page 21 na ah, mipilte in kikhel tohtohna thu bek nakpi in la uh a, a man lohnate imcip in sang ah kisin sak ahih manin mi tampi tak in, thu man thu tak in um ta uh a hihna gen hi .

Tua laibu a kibawl a kipan tu dong Pasian’ thu-um ki-kiam semsem lai ding hi. Hih bang upna pen Pasian kici om lo hi, a ci-te aa ahi hi. A lamdang khat ah, USA ah Pasian um lo(Atheist) mi 9 % bek om hi na pi lai sinna sangte ah amau’ upna tawh ukcip zo mawk uh hi. Tua ban ah, pilna sang a sin seemseemte in Pasian’ thu upna taisan in Pasian om lo hi cih lam ah pial pahpah uh hi, ci lai uh hi[ http://atheistempire.com]. Hih mite’ thu tawm en ni.

American Atheists, ki ci Pasian om lo kipawlna pen 1963 kum in US ah kiphuan khia hi. Amau gammial nasepna pen kumpi sangte ah Pasian’ thu tawh kimakaihna tuamtuam thungetna cihte bei sak ding, Laisiangtho tawh kilehbulh upna ahi, kikhel tohtohna thu kumpi sangte ah sin sak ding, kumpi leh biakna khen khia ding cih ahi hi [ http://www.atheists.org ]. 1960 a kipan kumpi sangte ah Pasian’ pian sakna thu hilh kik ding hanciamna tuamtuam a om ciang a mau zong kipawlna tawh a kipan uh hi dingin ka um hi. A taktak in, leitung ah hih bang upna pen 1859 khit, Darwin in a laibu a bawl khit lam a kipan kician takin ong khang to hi.

Amau’ aa dingin, Darwin ’ laibute pen a laisiangto( ei aa dingin lai nin) uh ahi mai hi. A dah huai mahmah khat ah, mipil pipi pawlkhat in sang thei uh hi. 2008 kum in Chicago pan a kibawl, The World Book Encyclopedia laibu page 426 ah, Darwin in a gen, kikhel tohtohna thu( evolution theory) pen mihing guh/ ganhing guh lei sung pan a kimuh kikna tuamtuam tungtawn in leitung mipil a vekpi phial in thu takin sang ta uh hi, ci hi.

Leitung ah Pasian cih bang om lo hi cih upna a nei, gam thupi zaw deuhte pen- Sweden 85 % , Japan 65 % , Denmark 80 %, Norway 72 %, South Korea 52 %, Germany 49 %, Britain 44 %, Australia 25 %, New Zealand 22 %, Singapore 13 % leh USA 9 % ahi hi. Gam tampi om lak ah et theih pak ding hih teng i la khia hi[Zuckerman, Phil. “Atheism: Contemporary Rates and Patterns”, chapter in The Cambridge Companion to Atheism, ed. by Michael Martin, Cambridge University Press: Cambridge , UK (2005)]. USA mite in Pasian’ pian sakna leh Darwin gen kikhel tohtohna koi um zaw cih lungsim kaih khopna(poll) om thei den a, Pasian’ pian sak hi a ci lamte in 54 % ciangciang tawh zo zel uh hi. A hi zongin Pasian’ thu um a tam na zah in cih taak ka sa kei hi. 1859 khit, Darwin kici mipa’ khat ii muhna hangin leitung ah kha lam khuamialna ong kizeel hi.

A taktak in hih pa pen Pasian’ thu um khat mah hi. Ganhing lam(zoology) leh leisung lam(Geology) pilna thuuk a nei khat hi a, 1831 December kha a kipan Beagle teembaw pi tawh leitung mun tuamtuam veel koikoi ding in a pu mipilte tawh kithuah kha hi. Tuipi nawl ah, a tuah khak singkung, ganhing leh na tuamtuamte thuuk tak in ngaihsun in kantelna a bawl pahpah khat hi. Chile, Peru, South America, New Zealand, Brazil, South Africa leh Australia dong pai koikoi uh a 1836 October ni 2 in England tung kik uh hi [Charles Darwin: The Origin of Species and the Voyage of the Beagle, Everyman’ Library, New York, page 17-517].

Pasian in ganhingte a ma’ dan khat( law) tungtawn in bawl hi cih upna a nei gige ahihna pen hih a khualzinna pan a ciah dong a upna hi. Tua teng kawmkal ah, a it mahmah a tanu khat in 1851 kum in a sihsan ciang na sa lua in Pasian a upna bei hi. Nidang in a thu kantelna ah, Pasian in a bawlna, Creation cih pen la khia in, leitung paizia( Nature) tawh khek hi. 1859 kum in Ganhing cii tuamtuam a pian zia, The Origin of Species, bawl khia a, 1871 kum teh mihingte pian khiatna(The Descent of Men, and Selection in Relation to Sex) laibu Laisiangtho tawh kilehbulh takin ong bawl khia hi.

Tua thu pen a deih vanglakte in naak deih mahmah uh a, Germany ah Nazi makai Hitler in ong ngah kha hi. Mihingte pen ganhing mawkmawk khat bangin ong ngaihsun ta ahih manin mi that ding cih pen khensat hak sa het lo hi. Mi a tultul in that lel hi. A dam pha lote, kimanna a nei lo ding naupangte pen that mengmeng lel hi. Amau minam sung mahmah ah zong, minam lianpi suak ding deihna tawh ta tampi neih loh ding hanthawn hi. Mi tawm leh neek leh dawn a kipan vanzat kicing ding cih bangin a ngaihsutna pen Darwin in a thu bulphuh “ Natural Selection” pan a ngah sawn ahi hi. Pasian’ thu um Richard Weikart in a laibu bawlna sung ah Darwin tung pan ong piang khia upna hangin mi tampi in a sih lawhna thu tampi at hi.[ From Darwin to Hitler: Evolutionary Ethics, Eugenics and Racism in Germany , 2004, page 233]

Leitung mipil khempeuh in hih thu um tuan lo uh hi. Leitung pilna tuamtuam ah kibulh thei ding tawh a kibat hangin a kitaangsam lai mihing guh leh ganhing guh pawlkhatte tawh kilak thei nai lo ahih man in thu tak in sang zo lo hi. Laisiangtho lam pan, Pasian in bawl hi cih pen a thu bek tawh kigen thei a, leitung pilna tuamtuam ah kibulh thei lo ahih man in Laisiangtho a um lote’n ong zat pih thei lo uh hi. Tua ban ah, ih Laisiangtho ah vantung a cih pen koi lai ah om hiam ci in zawn sawm le hang, pawlkhat in a kimu thei lo kha gam(sih nawn lohna) hi ci ding a, pawlkhat in a kipatcil in aksi leh ni/khapite vantung ah koih(Gen 1:18) ahih ciang a taktak in a om mah hi ci ding hi.

Cihnopna ah, Laisiangtho a umte mahmah in zong, ih theih dan kibang lo lai ahihna gentehna khat kong gen pak ahi hi. Ahi zongin, Pasian in leitung vantung leh mihing nate bawl hi cih Laisiangtho umte’ genna tawh a kilamdang lo, leitung pilna tungtawn in a kimu khia ngaihsutna nam khat Seattle ah piang khia a, gam dang mipil(scientists) pawlkhat tawh kizom uh hi. A makai pipa pen University of California ah Law lam ah sangsia a seem Phillip E. Johnson hi a, 1990 kum pan a kipan khia ahi hi[Thomas Woodward: Doubts About Darwin , Baker Books, 2004, page 19].

Tua pen intelligent design(ID) kici a, na khempeuh a hih khat om ding hi, a om sa khat peuh nih leh thum suak toto in a kikhel toto hi lo ding hi cih upna hi. Gentehna in meikang khawng, mi kithat khawng a om ciang, a seem khat zon loh pha mawh hi. A geel/ a bawl khat a om ciang bek in a piang hi bek hi. Tua pen Pasian zong hi thei, Pasian lo zong hi thei cih upna hi. A tawpna ah Pasian’ thu-umte in Pasian mah ngawh loh phamawh ahi hi. Mihingte ci leh sa sung ah molecule-te leh pumpi sung ah na aseem diamdiamte ih et ciangin geel na lo pi in mawk pian zuahzuah theih ding hi lo a, lamdang mahmah hi.

Darwin hun lai in, ci leh sa sung tawng-a mit tawh muh zawh loh sa them (molecule)te kimu thei nai lo ahihman hi ding hi, ci in ID upna a neite in gen sia uh hi. Tu hun Darwin a umte leuleu in, a tawpna ah nate a bawl/geel pen koi hiam cih kilak thei kei leh thu tak in kisang thei tuan lo hi, ci uh hi. Leitung dang a hi, Mars ah nuntaakna a om leh tua tung pan zong ei omna leitung ah nuntaakna a pian zia kithei ding, Pasian om lo ahihna kician ding ci in Mars ah bang om cih theih ding hanciam uh hi.

1960 khit lam in Mars leitang pan huih lak ah kileh koikoi ding a a bawl uh thu kantelna mutpuak vanleng (Balloon Mission) in a sanna 30,000 ft- 130,000 ft kikal ah mit tawh muh zawh loh nuntaakna nei ganhing neute ( microbial life) om cih mu uh hi. Tua nangawn pen leitung pan a ken khak uh hiam cih a um lote’n muangmawh leuleu hi[Hugh Ross: The Creator and the Cosmos, NavPress, 1993, page 145]. Pasian om lo hi, cih pen tu laitak mipilte’ muh khiat nop thu khat leh a hanciamciam uh ahi hi.

Tu hun ciangin USA -a pilna sang zaw sinna University sangte ah Darwin upna kibulphuh in na kiseem hi. Sangsia Pasian’ bawl sakna thu a gen khate a nasep kitawp sak in nasep dang zong ngah kik sak nawn lo hi. Mipil te in Darwin upna dung zui in tel beh na ding kantelna(research) bawl uh a pawlkhatte in a kilehbulh ID upna mukhia zaw hi. Tua bang mite sang pan kitawp sak pah hi. Darwin upna a dong kikkikte sangsia pan kihem khia ziauziau hi.

Sangsia pawlkhatte a up loh uh hang, a nasep khahsuah nuam lo uh ahih manun bang mah pau ngam lo uh hi. Kumpi in hih upna pen a thu tak in la ahih manin, a dangte pen thu don nawn lo hi. Damdam in a dang upnate bei lel ding hi cih tawh kithusim nawn lo hi. Gam khempeuh ah pilna sangte hih bang dan hi tuan lo hi. A suakta mahmah a minthang USA in pilna lam ah suahtaakna ( Academic Freedom) nei lo hi. Poland ahih leh, Pasian in leitung a pian sakna kihilh sak in, kikhel tohtohna(evolution) pen thu man thu tak in sang lo uh hi.

Hih Pasian’ thu tawh kituak lo, kikhel tohtohna thu a man lohnate gen theihna US kumpi ong piakna ding tu laitak Pasian thu umte in a hanciam laitak ahi hi. Hih thu a lunglut kha-te in, hih http://www.expelledthemovie.com website ah hawh ding zong kong hanthawn hi. A makai pa Ben Stein in documentary movie khat bawl a, lungsim ong su kha sak mahmah hi. EXPELLED: No Intelligence Allowed, cih thu lu tawh hi a, 2008 February kha sungin a kibawl khia ahi hi.

Galpi nihna hun lai in, dawi mangpa in hih upna pen Hitler tung ah na guang a, leitung bup khem dingin na kipan hi. A zenzen in, Hitler in gal zo bang na hi leh, hih Darwin upna tawh leitung zaancip dingin ka um mawh hi. Pasian in leitung keem lai ahih manin, tua hanciamna taangtung lo hi. Tu hunciang in, dawi mangpa in lampi dang khat tawh na ong seem leuleu hi. US leh gam lian zawdeuhte’ sung ah hih upna khaici ong vawh hi. A diakdiak in, US pen nget in a neekneek inn khuamte tawh kibang ka sa hi. A thupit lam ong thei sak khol lo in, ong awl mawh lo sak hi.

Tua ahih manin, pilna sin Zomi khangthakte in inn pan leh biakinn pan mahin ih upnate a ngahna ding uh khatciat in hanciam ding kisam hi. Amau ong muhna ah zong et teh huai khat a hi zo dingin Topa’n thupha ong pia ciat ta hen! Source: USA Thupuak, Vol 3 Issue 2, Column 11-14