Trump in Defense Secretary dingin James Mattis guansawm

Trump in Defense Secretary dingin James Mattis guansawm

Dec. 3, 2016: US President kiteelcing thak Donald Trump in mi thah nuam a sakna thu a kisialhpih ngei “It’s a hell of a lot of fun to shoot them,” cih a kammal a zat manin gensiatna tampi a tuak US Marine Gen. James “Mad Dog” Mattis pen Secretary of Defense dingin guan’ sawm ahihna thu pulak ta hi. Mattis in US Marines ten 2001 in Afghanistan a simna uh na makaih a, 2005 in Afghante bangci na sa hiam ci-a a kidot leh Afghante do nuam mahmah a, galdo nuamsa ing. Mi pawl khat kap(lup) nuam sa ing ci-in dawng hi.

Marines panin 2013 in Mattis pensen (retired) a, Islam pen ama’ ngaihsutna ah “political Islam” kici pen gambitna dingin (nation’s security) a lauhuai pen hi ci hi ci-in Washington Post in gen hi. Trump in zanhal nitak (Thursday) in Ohio ah rally a neihna Mattis pen Secretary of Defence len dingin kiseh ding hi ci-in na gen a, ahih hangin Monday ma-in ‘Mad Dog’ Mattis i Secretary of Defense ding hi ci-in kipulak khia nai lo ding ahih manin kuamah kiangah na gen sawn nai kei un ci hi.

Mattis in Defense Secretary len takpi ding hiam cih gen theih nai lo hi. Bang hang hiam cih leh US upadi (Constitution) in galkap ulian len laite leh a pensen khit kum 7 cing nai lote Defense Secretary a let ding uh phal lo hi. Tua ahih manin Congress in hih thukham panin Mattis a maapsak masak ding uh kisam lai a, New York a Democrats senator Kristin Gillibrand in Mattis in Defense Secretary a let theihna ding ka dal ding hi ci ta hi. Tua bek hi loin US in leitung kumpi tuamtuamte tungah mipi ukna (civilian government) ulian pen galkapte lensak kei un ci-in thuhilh khum den uh ahih manin upadi in galkapte tungah gakna a koih pen thuneu hi lo hi ci-in observers tampi in ci uh h.

Galkap ulian tampi in civilian government ah panmun sang teng len le uh civil (nautangte) ukna leh deihna kip/kho zo lo ding a, galkap ulian ten vaihawmna len leh gam pen gal tam zaw dopih ding uh hi ci uh ci-in Carol Giacomo in New York Times ah laipaih (article) gelh hi. Tua banah Pentagon in $600 billion kiim budget pen national security policymaking adingin zang a, tua loin State Department in resources tampi zangtum lai hi ci-in gen beh hi.

More: Zomi All D ngahte pahtawina kipia khin ~ Sia Pau Khai

Washington Post in zong senior Pentagon ulian pensen min gen loh khatin civilian control pen galkap (military) control na nuai-ah ah om leh Joint Chiefs of Staff tuamtuam ten aw nei lo ding a, galkap uliante (generals) deihna in gamvai pai zaw ding hi. Tua ahih manin Mattis pen kihtakhuai hi ci hi. Giacomo in Trump a cabinet sungah generals tampi guang mawk leh leitunga gamtuamtuamte tungah bang message khak ding hiam ci hi. Source: Common Dreams/ Thang Khan Lian