Topa’ thawhkik ni pen Nute’ ni maw? Sunday ni? ~ Evan. Suangh Dal

Topa’ thawhkik ni pen Nute’ ni maw? Sunday ni? ~ Evan. Suangh Dal

A nih in khat zong hi lo. Sun ading kipia ni hi lo zawin Thawhkik ni pen Sunday ni hi. SDA lamte adingin Sunday pen dawi-in mu uh hi ci phial lehang zong kici thei hi. Kaal khat sunga om zing ni suak tawh kisai-in, ni khat pan ni sagih dong Roman minvawh om hi. Zomi te’n zong minvawh nei hi hang. Kawlte lawh dang zong atuam hi lai hi. Saturday ni pen Sabbath (SDA) ni a kizang pen hi. Kaal khat sungah nimasa pen Sunday ni leuleu pen Topa’ ni (Christian) a kizang hi. Roman, Kawl le Zo min vawhte zang nuam kei lehang Sani ni pen Sabbath ni cih tektek ding hi a, Sunday ni pen Topa’ ni (new Covenant Sabbath) cih tektek ding hi.

Sunday law tawh kisai-in SDA thuzuite in amau’ Sabbath ni in nute’ ni pate’ ni cihdante a zang a om kha diam thei keng. Ahi zongin Christian pawldangte’ sungah Judson Sunday, ZBC Sunday, ZBCM Sunday, MBC Sunday, MC Sunday cih bangin tampi tak kizang ta hi. Sunday ni Topa’ thawhkik ni pen kikhop ni tawlngak ni biakpiak ni dingin ih zatna hangin anti-Khrih thu-upna hi lo hi.

Ahi zongin a ki-um khial hong pai khial sak leh Topa hehna a piang sak thei ding pen tua Sunday pen Topa’ thawhkik ni sa nawn loin nute’ ni pate’ ni cihte pawl ading ih sak leh tua Sunday pen Anti-Sunday, Anti-Lord day, anti-Sabbath suak thei mah ding hi ci-in LStho ka tel na ciangciangin ka muhna hi. Topa’ thawhkik ni pen a taktak in Sunday ni bek ah a kizang ahih mah bangin, nute’ ni, pate’ ni hi lo hi. Ahi zongin tua Sunday Topa’ thawhkik ni a kikhawm ei Christian te’ adingin nute pate adingin thu ih nget sak ding thupha ih pawl ni diak ding zong hi mah hi.

Thu khat peuhpeuh a kizat khit a kizuih khit ciangh a thumaan lohna a puahpha leh a pholak kikte pen kimukhial zo thei hi. A kizuih a kizat zawh a sawt lua, a gei mahmah khin thumaan lohna ah thumaan pen tualtang thei nawn vet lo hi. Pasian in khahkhong vet thei hi. Khahkhongna sungah Pasian’ hehna hai a buak taktak ciangin minam khat le nam khat tualgal sisan luanna gimna tung thei hi.

Tua bang a tun ma-in thumaan ahi, Topa’ thawhkik ni pen Nute’ ni hi lo hi cih kong gen khia nuam teitei hi. Nute’ ni tawh kisai pen tuma kum 1914 khit ah America gammi Anna a kici numei khat hanciamna tawh Second Sunday in May a zat dingin hong kiphuan hi a, tua hun lai-in kei piang nai lo ka hih manin, Sunday Topa’ ni pen kum 1914 ma Pawlpi in bangci zat cih thu a gen nuam bek ka hi hi. Topa’ ni pen bangci kizat cih pen u le nau Christian te in bangci zat huai, bangci siantho sak huai cih ih lungsim tawng conscience ah ih thei ciat hi.

Anna mahmah in zong ama’ ngaihsut bangin nute ni kizang loin sumbawl sum zuakna (commercialization) in kizang ahih manin na sa mahmah kici hi. Tua sangin a na zaw lai dingin ka ngaihsut in bang hiam cih leh Sunday ni Topa’ ni ah mihingte’ kilaitak thute gualgual lehang anti-Sunday/ anti-the Lord day hong suak takpi ding hi. Pate’ ni hun zang khat bang a pa a vui ding hong bang hi. Nute pate’ ni thupi kisa bek ahih manin tua ni kikhawm bek hi. Thutaang gen bel kisiam thei mahmah. Thugen nuam vive. A ngai nuam om lo. Thumaan thutak za thei nai lote. Thu thuk zaw duh thei nai lote,,,ciamnuih gospel, Lungdamna thu zawn gen lua cihte pawl zong lau huai hi.

Sunday Topa’ ni a luh Nidang tuamtuam zong hong lut behbeh ahih manin, Topa’ ni in Singlamteh thu laigil namte suut siam loh hilh theih loh banah kisuut lo kihilh lo semsem hi. Pawlkhatte bangin nute ni in pate gensia pian a, pate’ ni in nute gensia pian liang kha pahpah hi. Topa’ ni Nipi ni a thu kigen (preaching) ding ih cih pen tua banga lum leh suk lum leh toh thugente gen sak ding hi lo a, pawlpi kem syate maw? Bekin hong hilh hong gen ding uh hia, kum khat sungah nute, pate adingin nipi ni khat bulphuh diaka, thu ngetsak thupha bawl letsong pia cih pen bel program sungah hel ziauh theih hi lel a, ahi zongin amau ni suak sak liang ding hi lo hi.

Hi thei leh zat vet loh hoih zaw lai hi. Banghang hiam cihleh a dangte zong hong kilawh toto ding a, mai lam ah tate’ ni zong hong om dinga, ih Nipi ni pen out of tune ong suak ding hi. Githa kitaih lo hong bang gawp ding hi. Na khat peuhpeuh pen LStho tawh a kituah kei leh a thusun a hoih khem hangin a tawpna lam ah a gah pen sihna le Topa tawh kigam latna, phengphitna le thu mel la mel khen theih nawnloh hun hong tung lel ding hi, cih ka muhna hi.

Genkhialh, gelh khialh a om leh hong mai sak un. Topa’ min ading khualna ah nute pate’ hamsiat thuak loh nading ka deih luatna hi zaw hi. Nute zong nu nei ngeite hi a, tate zong nu ding pa dingte ahi uhhi. Topa ni thawhkik ni pen nute pate bek hi lo, piansak nakhempeuhte adingin thungetsak ni ding zong hi. Nute pate pahtawina a nial hi loin, Topa’ ni-in kum khat sungah nute ading Sunday khat a diakin la-in thu a nget sak, letsong a pia cih ciang hi hen la, Topa’ ni mah hi ci zaw hi. Topa’ gupkhiatna thu mah sut ni. A kisap leh LStho sung numeite thu tawh Topa’ thu ih sut diak ni zong hi thei lua lel hi.

Nute’ ni pate’ ni pen mihing kilaitat thusun ahih manin kithukim ding hamsa het lo hi. Thu-um lo Kawlte bangin ei sangin mothers’ day hong lim zat mahmah ziau ding uh hi. Jesuh le a singlamteh a san nop het loh uh hangh. Biakna ih cih pen a ni a hun tun cianga kineihna tawh nute mai pate’ mai ah lukun keei cih dan hi, ritualism kici hi. Christian te pen Nipi ni bek, nute ni a kici ni beka zahtak it, thupi bawl ding hi lo a, nuntak laiteng thupha bawl ding hi. Life time service hi. Nute pate’ tungah Nipi ni Topa’ ni hing suan lianga thu kigen kihilh kisawl sangin nisim ih nuntakna ah kineih lohna tawh thupha ih hih den ding hi zaw hi, cih tawm ka sung nuam hi. Ritualism ah a ciah kikkik ih hih khak ding. Suangh Dal