Topa tawh tonkhawm ni ~ David Tuang (Pian 5:24; Amos 3:3 ; Luka 24:15)
1. Pasian tawh bangci tonkhop ding?
Pasian tawh i tonkhop theih nadingin amah tawh kilemna(thukimna) ineih phot ding kisam hi. Mi nih, thukimna om masa lopi-in lampi-ah tonkhawm thei uh ahi hiam? Amos 3:3
- Mawhna kisikkik in Pasian’ kiang zuan ding.
- Jesu Khris gumpa leh Topa in sangin Pasian ta suah phot kul.
- Pasian’ deihna bangin nungta kalsuan in, amah kimakaihsak ding.
- Nisim naisim in Pasian’ kiang naai-in, Pasian’ maipha zong den ding.
- Pasian hoihna gengen in, pulaklak ding.
- Pasian min phatphat in, lungdam koko ding.
Hi bang teng khit ciangin Pasian tawh kilem-in amah tawh i tonkhawm thei pan ding hi.
2. Banghangin Pasian tawh tonkhop kul hiam?
- Pasian tawh tonkhawm loin, a piangtheilote ihi hi.
- Pasian tawh tonkhopna omlo nuntakna pen Satan in nopneh in susia ding hi.
- Pasian tawh tonkhawm kei leeng, ze-etna kido zo lo hi.
- Pasian tawh tonkhawm loin, lungmuanna om theilo hi.
- Pasian tawh tonkhawm loin lungsim kha leh pumpi adingin lauhuaina tam den hi.
- Pasian tawh tonkhawm loin, gualzawhna cingtaak, pilna cingtaak, hauhna cingtaak, lawhcin’na cingtaak cohte om ngeilo ding hi.
3. A bangci mite Pasian tawh tonkhawm theilo ding?
- Ama pumpi(ci-le-sa)deihna a niallo mi.
- Mawhna sungah bualin siatna a nolh/nial lo mi.
- Pasian’ kammal a lunggulh lo mi.
- Pasian maipha a zong masa nuamlo mi.
- Leitung nate a lunggulh mi.
- Duhhop huaihamna leh hazatna anei mi.
- Mawhna kisikkik lo mi.
- Jesu Khris a nial mi(a umlo mi).
4. Pasian tawh a tonkhawm mite koici kitheih ding?
- Leitung nate sangin Pasian leh ama kammal lunggulh masa zaw ding hi.
- Leitung nate sangin, Pasian’ maipha zong masa zaw nuam den ding hi.
- Siatna sungah kidiahdiah lo ding hi.
- Mite tawh kilem thei ding hi.
- Ama phattuam nading bek ngaihsun lo ding hi.
- Itna leh hehpihna cihte a sungah nungtasakin gahkhiasak ding hi.
- Mite hoih lohnate lim muhsak se loin, mite hoihnate ah pahtawisiam ding hi.
- Mite’n Pasian phat ta kei leh aman phatphat lel ding hi.
- Mite kikhawm nuam ta kei leh amah kikhawm nuam ding hi.
- Mite tungah kinga loin, Pasian tung bekah kinga ding hi.
- Mite sangin Topa muang zaw ding hi.
- Leitung hauhna leh damnate bek lunggulh hi loin, kha hauhna leh kha damnate zong lunggulh ding hi.
- Pasian min leh gam ading ahih nak leh thupi san’in mapang nuam den ding hi.
- Pasian mizat(Pasian nasem)te langpan’pan lo ding hi.
- Makaite hawmthawhthawh loin, nungzuite neu muh lo ding hi.
- Ama thanemna kiphawk thei-in, midangte thanemna ko bawl lo ding hi.
- A san’sa gupkhiatna thu lenkip dinga, Kha Siangtho kimakaihsak den ding hi.
- Pasian minthan’ gamzai nading leh midangte phattuam nadingin na hoih sem ding hi.
5. Pasian tawh tonkhopna hanga hamphatnate
- Pasian tawh tonkhopna in, lungmuanna hi.
- Pasian’ tawh tonkhopna in, suahtakna hi.
- Pasian tawh tonkhopna in, gualzawhna hi.
- Pasian tawh tonkhopna in, lawhcin’na hi.
- Pasian tawh tonkhopna pen damna hi.
- Pasian tawh tonkhopna pen, galte zawhna hi.
- Pasian tawh tonkhopna in, lampi(ma) kihonna hi.
- Pasian tawh tonkhop in, mi tawh kilemtheihna hi.
- Pasian tawh tonkhopna in kiniamkhiatna hi.
- Pasian tawh tonkhopna in, na khempeuh thuaksiam in ahoih lamin muh theihna hi.
- Pasian tawh tonkhopna in, thu-um diktak kilatkhiatna bulpi hi.
- Pasian tawh tonkhopna in, upna cingtaak hong neisak ding hi.
- Pasian tawh tonkhopna in, i san’sa gupkhiatna-ah hong kipsak ding hi.
A phawkhuai pawlkhat:
* Pasian tawh i tonkhop manin haksatna tawh kipelh ding cih hipah lo a, haksatna sungah ama ompihna ngah in, suahtakna tawh hong kizom ding cihna hizaw hi.
* Pasian tawh i tonkhop manin, i daupai den keei ding cihna hi tuan lo a, i ma bing den lo ding cihna hizaw hi.
* Pasian tawh i tonkhop khit ciangin, satan tawh tonkhop hun ding, ineih nawn loh ding (i beisak ding) thupi hi.
* Pasian pen amah a lunggulhna gam leh minam sungah mun la in, amaute a makaih nuam, thupha a pianuam Pasian ahi hi.
* Pasian pen, amah a lunggulh khua leh tui, laamto in thupha a pia nuam Pasian ahi hi.
* Pasian pen, amah a kiphatna amah a kiliatsakna pawlpi-ah na lamdang piangsak in, khanlawhna lianpi a tungsak nuam leh tua pawlpi a phungvuh nuam tawntung Pasian ahi hi.
* Pasian pen amah a it/zahtak innkuan sungah, kha thupha taksa thupha dimin, a ettehtaak innkuan nuam a suaksak nuam Pasian ahi hi.
* Pasian pen, amah munpia-in amah a kimakaihsak mite tungah ama hoihna musak nuam den in, tua bang mite laamto in thupha namkim a pia nuam Pasian ahi hi.
* Tua ahih manin, i gam leh i minam adingin Pasian bekmah thupisak ni. I khua leh tui adingin Pasian bekmah thupisak ni. I pawlpi adingin Pasian bekmah thupisak ni. I innkuan ading Pasian in Pasian bekmah thupisak ni. I mimal ngiat mahmah adingin zong Pasian bekmah thupisak in Topa tawh tonkhawm ni.
Thukhupna:
- Pasian tawh a tonkhawm lo nuntakna pen leukeuna a om (tui ngah lo) singkung tawh kibang hi.
- Pasian tawh a tonkhawm mite minuamsa hi dinga, gun gei-a kisuan singung bangin nosuak den ding uh hi.
- Pasian tawh tonkhawm loin, i khatha hat ngeilo ding hi.
Lungsim, kha leh pumpi cidam in a thahat theih nading leh i deih/sap na khempeuh a kicin theih nadingin, deih teng cin’na leh sap teng kimna Topa tawh tonkhawm in, amah liansak ni. Halleluijah. Lai sim mimal kim tungah, Topa’n thupha hong pia ta hen. Amen. Khazih sungah, David Tuang
Comment piaknop aomleh...