Tong Luansiam Lia Zozam – 9 ~ Hau Za Cin

Tong Luansiam Lia Zozam – 9

Nipini khat zing kikhop ma in tuikhuk ah va kisil a, a puansawp teng tawh inn hong tung netnut hi. Lampi ah a khepi tawh suangsi khat sikkha a, a si tawmkhat naam nemnom hi. A khau lukhu balkek in huankhanga Taangsam teh naupangte a lawhsak a tui suuk in a tuamnelh pah hi. Anne in kuangsil a, kikhawm dingin a teekte tawh a kuan pah uh hi. A kiteen ni uh pan a pasal a sepna lamah pai kikpah ahih manin zankhat zong a lumkhawm nailo ahi uh hi.

A kitaipih lai un lah lawmte tawh ahih manin Nupa omkhop ding cih bang lem mello a, khua a tun uh ciang lah a pai kik kulta ahih manin a zi tawh zan khat takpi zong lumkhawm manlo in a paltan tumna lamah a paisan kik ahi hi. A pai ding laitak lupna lamah nai khat sung khawng a kua muhloh a kongkhak a kikalhcip, a kikalhnelh bek uh simloh a kitheician tam nai kei uh hi. A khuan kong la kik pah dia, ka omna lamah i nih in i paikhawm pah ding hi cih tawh a kizinsan uh hi a, ni khat zong sawt baih mahmah hi.

Sun ciangin biakinn sungah kikhop laitak in a khepi bawk hanhan a, mutpuak mut bangin khang hanhan tawh kibang sa hi. A tuamnate kigak deuhdeuh ahih manin a kikhop tawp nailo in pusuak a, a zun thak khit ciangin inn ah a ciahsuak hi. Inn tung manlo in lampi ah a khe na sa lua ahih manin nihvei kipuk a, awmbawhvak in inn a tung ciamciam hi. Inn a tun ciang a khe bawk nasia luata ahih manin lupna nuaia singkuang sunga Tuisanza lakhia in tui lum tawh hel in a khepi bawk a sil hi.

A sawtlo in kikhawmte hong tawpta a, nupi te in Zozam a ciahsim sa in lamdang sa in hong hawh ngeingai uh hi. Inn sung atun uh ciangin Zozam khuaphawklo in na tuuk a, a khe silna Tuisanza leh puansia nel nonote na om lai hi. A khe bawk mu pah uh a, tuihu lut (septic) hi cih a theipah uh hi. Saza ki la in upate in a khepek pan sisan hoihlote hupkhiatsak uh a, a gu a kidalna dingin za-ek leh tuibuk a nesak uh hi. A khutdawh bangmah acih loh hangin khuaphawklo, hopih theihloh ahih manin a lungtang kisai bek et hi a, a gim mahmah hi.

(zop lai ding)

Hau Za Cin
Phuitong Liim