Thuthak Tomkimcing 23 Nov 2014

Thuthak Tomkimcing 23 Nov 2014

A. Tuithang Gunleei pan Guasing khua dong Lampi kibawl.

Tuithang gunleei Phillui tunpan kipan Tongsial, Tuicinlui, Muallum, Mualnuam B, Mualnuam A, Guasing khuadong JCB 2 tawh lamtoh abeisa 17 Nov ni in kipan ta uhi. Tuicinlui khua leh Muallum kikal lampi hoih khinsa ahih man in Phillui pan Tuicinlui khua azawh khit ciang taisuak in Muallum pan Guasing khua dong Kyats 300,00000/- tawh lampi bawl ding uh cih kiza hi.Nasem pen Kazaitha Company cihdan in kiza hi.

B. Setaw leei bawl nading Kyat 643 Million

Kalay- Gangaw meilei lampi 1996 Feb 5 ni kihong hi taikawk 82 leh Meileeng khawlna 20 pha ahihi. Tulaitak Setaw leei tui in nawk lua ahih man in leeibul kho lo ding lamen ta uh a, Ka Meo Myint Company te in kyats 643 Million bei in bawl pha kik ding kipan khin uh hi. Hih leei pen ft 670′ sau ahihi.

C. Vantung ah Coffee tui hawp ding.

Italy mipilciim Samantha Cristoforetti in Huihlak khazau leeng sungah a kisam bang in coffee tuilum bawlna ISSpresso kici set bawl khia hi. Asawtlo in Van awngthawl sung Huihlak khazau leeng phualpi International Space Station (ISS) sung ah hunsau pi nasem in aom siamciim teipil te in asawt lo in azat theih ding uh ahihi. Italy gam Lavazza coffee company te leh van awng thawl sung neek leh dawn bawlkhia Argotec Company tawh kipawl in bawl kop uh coffee machine ahihi.

D. Phalbi tung’Tualgal tung, Thaupi tawh 11 vei kap kik uh.

KIA galkapmang siamsin nasang akikap zawh 22 Nov 2014 zingsang daak 6 khua vak kuan in Kawlgalkap te in KIA batalian No. 3 te thum vei kap uh a, 23 Nov 2014 zingsang daak 4 pawl in Hkaya bum) leh (hpun hpyen bum)om kawl galkap te in thaupi MM60. MM81, MM105 cih te tawh 8vei kap kik uh hi. KIA galkap 2 liam cih ciang kiza hi. Phalbi kuan khuadam hun ta in Kachin gam ah kikapna tualgal piangden in kimu cihi.

Hau Thang