Thuthak tomkim ~ The Tedim Post (29 July)

News In Brief: Thuthak tomkim ~ The Tedim Post (29 July)

July 27, 2020 ni ZCD in kiteelna kidem ding tangkona na nei a, Sagaing Region, Kalay Township, Chin Ethnic Affairs adem ding candidate Pu Kap Khan Khual in Mee(vote) tang ki khenkham loh nading in deihna tawh (Mimal tangdin) Pu Vum Za Nang awn hi, cih thu ZYA HQ page tungtawnin kiza hi.

July 28, 2020 in Kayin State, Hpapun khua ah mipi 4000 valte in Hpapun Township, Polothah khuami numei khat a sihna hangah thuman ngah theih na ding deihna tawh lungphona nei uh hi.

Covid-19 natna hangin kha 4 sung nasep akikhawlsak Cinema (Datsian) zaihnate July 27, 2020 ni akipan kizaihkik sak ta ci hi.

Shan State, Pyine Hluttaw ah 2015-2020 Hluttaw term hun sungin thusunna khatvei zong a neilo mipi tangmi 100 val bang om ci hi. Shan State ah Pyine Hluttaw a kah thei mimal 143 pha ci hi.

England gam, Europe, USA, leh Africa gam pan hong ciah Myanmar gam mi mimal 313 te donghu Vanleng in Myanmar gamah hong tun ta ci hi.

A 4 veina 21 Century Panlong Khawmpi kibawl hun sung teng gamsung ah khat leh khat kidona piansak huailo hi, ci-in RCSS Advisor ahi U Khun Sae in Myanmar galkapte leh mualmi thautawite kiangah ngaihsut piakna nei hi.

Myanmar gamah COVID-19 ngah teng lakpan 60% bang natna symptom laklo hi, ci-in Union Minister Dr. Myint Htwe in July 28,2020 in thukikupna khat ah genkhia hi.

World Health Organization(WHO) kipawlna in COVID-19 natna pen WHO tangthu ah a siahuai penpen natna khat hi, ci-in WHO makaipipa Tedros Adhanom in pulak khia hi.

India thukhen zumpi in Alibaba neihsa ahi UC Browser leh UC News ah China(Sen)tawh kisai thuthang pawlkhat hangin Alibaba Company phuan khia mihau Jackma thusit dingin sam ci hi.

North Korea gamah a masa pen Covid-19 natna ngah ding aki-ummawh cina khat kimu hi, ci-in KCNA media in gen hi. Thu a im den North Korea in a gam vuah Covid-19 natna om nailo hi cinapi kua man umlo ci hi.

Peru gamah Covid-19 natna kipat zawh March 16 pan June 30 dong numei mimal 915 val in sihna leh manna tuak uh ci hi. Abeisa kha sung nuntak haksakna hangin inn sung buaina tampi piangsak a, a diakdiak numeite tung khut khialhna hang tawh asi tam pen ci hi.

More: Sialtaang Tuinak leh Saizang ~ Tedim Municipal

July 28, 2020 ni Leitung bupah Covid-19 natna ngah Tein 160 val(16,534,345), asi Tein 6 leh lang val (655,300) leh adam kik Tein 95 val (9,611,440) phata hi. Source : 7day news, , Eleven Media, Myanmar Times, VOA, Irrawaddy, ZYA HQ page.