Thuthak tomkim ~ The Tedim Post (17 July)

News In Brief: Thuthak tomkim ~ The Tedim Post (17 July)

Tedim Township, ZCD Party pan Candidates ding in form khia mi 11 te lakpan 5 tel khiat nading in Khua tuamtuam pan party member te leh township committe pan tangmi 156 in secret vote khia uh ci hi. July 27 ni-in ZCD CEC in vote(mee)tang simna nei ding a, candidates form khia 11 te lakpan vote(mee) tang tam ngah pen mi 5 in mee kuang lui ding uh hi.

Myanmar gam sung a akizang sum khempeuh tungah Bogyoke Aungsan lim kituang sak tading hi, ci-in Myanmar Central Bank Vice President U Soe Min in gen hi. Tulaitak sum akizang nam 11 om a, pek 1 lai, pek 5 lai, pek 10 lai, 50 lai, 90 lai, 100 lai, 200 lai, 500 lai, 1000 lai, tul 5 lai leh tul 10 lai te ahi uh hi.

2020 kiteelpi ah mipi in nuamtak a vote(mee) piak theih na dingin kiteel hun sung palik 40,000 val tawh vaipuak ka la ding uh hi, ci-in Home Affairs Department lam ten gen uh hi. A beisa 2015 kiteelpi ah palik 40,304 in vaipuak lakna nei uh hi.

Mucu sang khempeuh pen July kha bei dongmah kikhak lai ding a, akihong kik hun ding hong ki zasak kik ding hi, ci-in Pilsinna lam thunei khat ahi Dr. San San Aye in gen hi.

Philippines gam ah COVID-19 natna hangin July 13, 2020 ni-in mimal 162 si ahih manin ASEAN gamte lakah nikhat sung COVID-19 natna hangin misi tam penpen in ki ciamteh hi. Philippines gamah COVID-19 natna ngah mimal 58,850 om a, asi mimal 1,614 pha uh hi.

China (Sen) gam, Jiangxi State ah guah tamluatna hangin Yangtze gun khang gawp a gundung a teeng mi 141 si in mimal 1 million (Tein 10 val) bang inn leh lo nusia in kihem uh hi.

Piantit (France) kumpi in cidamna lam nasemte khasum khansak dingin thukimna nei uh ci hi. COVID-19 natna dalna dingin cidamna lam nasemte panlakna zong thupi mahmah hi, ci-in Kumpi ten gen uh hi.

Turkey gamah July 16, 2020 ni-in galvanleng khat kia a, vanleng tunga tuang mi 7 si uh hi.

Australia gam, Victoria state ah COVID-19 natna ngahthak mimal 317 nikhat sungin om ahih manin Australia gam adingin tuni ciang a tam penpen in ki ciamteh hi.

Guah tamluatna hangin Bangladesh gam seh 3 suah seh 1 tui in tumcip a, mimal 4 million(Tein 40 val)bang cimawh dongtuak uh hi.

Leitung ah mihau minthang Amazon online vanzuakna nei Jeff Bezos, Microsoft co-founder Bill Gates, US kumpi lui Barack Obama, billioner Warren Buffett, Rap Lasiam minthang Kanye West te nupa akipan mi minthang 10 val te Twitter Account ki hack(guksak) ci hi.

Philippines gam palikte in inn kimah COVID-19 natna nei om maw/omlo cih sitna nei ding hi, ci-in Kumpi lam thunei ten tangko uh hi.

More: USA, Tulsa pan Rev. Dr. Thawng Cin Khan (Tedim, Taithul beh) in hongnusia

July 16, 2020 ni Leitung bupah Covid-19 natna ngah Tein 130 val(13,654,445), asi Tein 5 leh lang val (586,174) leh adam kik Tein 75 val (7,617,607) phata hi. Source : 7day news, Eleven Media, Myanmar Times, Voice of Zomi, MRTV