Thuman in Suahtakna ~ Rev. Fr. Damian Dal

Thuman in Suahtakna ~ Rev. Fr. Damian Dal

Thuman thutak in hongsuakta sak dinghi (Jn 8: 32) – Tu hun tu laitak in i zakthu tampi om a, tua sungah mihingte suahtakna (human freedom) tawhkisai thu in genbelh in akinei tawntung khat ahihna thu i thei hi. Gamvai, minam vai, upna tawh kisai thu te a kipan, khantohna tuamtuam tawh kisai leh kipawlna, nasepna, ki-ukna cih thu te khempeuh ah mihingte suahtakna thu thumeilet leh thuzungpi in man in, nei in thu kigen tawntung hi.

Hih thu in bang hongtheisak hiam i cih ciangin, mihing te khat le khat ki-ukthawhna, kinuai nenna, kideidanna te ki deihnawn lo in, tua te in leitung asiasak nuntakzia te ahihna, mihingte nuntakna asusia thu te ahihna hongphawktel semsem hi. Hih thuhangin mihingte in minamvai ah minam lian minam neu, ahau azong, alian aneu cih omlo in, mikhempeuh liangko kikimna (equality) a omtheih nading ki lunggulh in, anuntakna uh apiakhia zahdongciang in nahongsem mithupi tampi tak i nei hi. Tua bang mite sungah Abraham Lincoln, Martin Luther King Jr, Nelson Medela, Aung San Suu Kyi cihbangin gam makai phadiak te kiciamteh hi.

Mite phawkkhak loh himahtase leh, leitungah liangko kikimna taktak leh mihingte manphatna leh suahtakna te hoihtak kepcing leh nuntak pihding honghilh tampi omhi. Tua te sungah Pope Leo XIII leh Mr Teresa of Calcutta te i manggilh thei kei hi. Nasemte in akilawm thaman angah nading, nasepnei te in amet angah na uhtawh kizui in, nasem te tungah thaman akicing apiakna ding, nasemte (workers) pen nasepnei te in, sila bangin ngaihsun theilo ding a, naseppih lawmbang in ngaihsun in, simmawh bawlthei lo ding cihthu akipan, nasepna ah nasemte in natna sihna athuak khak a ahih leh, nasepnei te in, vaipuak la ding hi cih thu te khempeuh leh, nasemte suahtakna – tawlngak ni, tawlngak hun cihte – zahtaaksak ding cih thu te, khauhtak leh hangsan tak in leitung gammakai te leh mihau te tungah ahilh pa Leo XIII (Pope Leo XIII, Rerum Novarum, May 1891) ahihi.

Mihingte suahtakna leh manphatna te in sum leh paai tawh leitheih, zuaktheih hilo in, amau te ngahding, amau te tanhding mihingkhat tawh akilawm zahtakpiakna, itna piakna, nek le dawn leh silk le teen leh, omnang khawl nang vaihawmsakna ahihna thu, gamtatna tawh honghilh tawntung nu in, Mr Teresa of Calcutta ahihi.

Tu hun tulai tak in, mihingte suahtakna tawh kisai in, natampi kisem, thutampi kigen, latampi kisa leh laitampi kigelh in, mihing le mihing salsuahsakna khau te sattat zawhnang kihanciam tawn tung hi. Khangthak salsuahna (modern slavery) hongpia thu le la tampi tak te, mihingte neih, suahtakna thu tungah, thuzungte phutin, thu leh la te kisut kigen ahih manin, salsuahna khuazingsung pan in mitampi takin zong suahtakna hongmukik uhhi.

Mihingte pianpih suahtakna (human freedom) pan in, mihingte manphatna (human dignity) hongki telsemsem ban ah, mihingte tanh (human rights) zong athak athak in kiphawk semsem hi. Hih thute i etkik ciangin, nidangkum tul kim hunlai ahi a, kum 500 kim hun te sangin, tuhun ah mihingte ii manphatna, mihingte ii thup’t na thute atangzai zaw leh athuthuk zaw in kitel le kimu khia semsem hi i ci thei hi. Hih theihkhiatna inzong, mihingte suahtakna (human freedom) thu tungah zungman in kiphut ahihna thu i mu thei hi.

Tuhun ciangin, mihingsuahtakna mitampi te in mihingte deihna, ngaihsutna, theihna leh muhkholhna te tungah phut uha, suahtakna man panin pialkhia ta uhhi. Human freedom-mihing suahtakna ci in, nei le nei kiteenna te bawl in, mihing piannang lampi akhaktan ahih lamuh kiphawk nawnlo uhhi. Suahtakna ci in, mite upna te zahko na, simmawh bawlna laite gelh in suaksakin, nisim in hawmkhia uhhi (gentehna Charlie Hebdo magazine, Paris, France). Suahtakna (freedom) pen tuhun ciangin, deihngahna, deihsepna, deih bawlna, uutbanga paukhiat theihna, uut uut a uutbangbang septheih, bawltheihna in kingaihsut ahih manin, uutna kibanglo, deihna kibanglo, upna kibanglo mihingte sungah kilemna sangin, kisiatna hong tamzaw ta hi.

Topa Jesu in: “thuman thutak in hongsuakta sak dinghi”(Jn 8: 32) ci in honghilh ban ah, “Kei mah in thuman thutak leh nuntakna ka hihi” (Jn 14: 6) ci in honghilh hi. Mihingte thu in thuman leh thutak nuntakna hongpia zo lo ahihmanin, mihingte pilna hanciamna in mihingte suahtakna taktak hongpia zongeilo hi. Topa thu bek in, thuman le thutak nuntakna hongpia in, ama thusungbek ah suahtakna man om ahihna, mite in athakin ateltheih, a up theih semsem nading un, Huhpa khasiangtho in leitung maitang athak hong suaksak tan hen, Amen. Rev Fr. Damian Dal (Leuven, Belgium)

Reference: Congregation for the Doctrine of the Faith, “Instruction of Christian Freedom and Liberation: The Truth Makes Us Free,” March 22, 1986, AAS 79 (1987) 554-599; OR 6.4.1986, 1.4; CivCat 137 (1986) 2, 146-185; Communicationes 18 (1986) 48-53 [n. 71 usque ad n. 80]; DocCath 83 (1986) 393-411; EV 10, 118-239;LE 5184; Dokumenty, II, 15