Thum Gawm Pasian ~ Thang Siangh

Thum Gawm Pasian ~ Thang Siangh

Laisiangtho thumaan i zon ciangin, Pawlpi deidan omlo-in, laisiangtho tawh kituak penpen kithukim ding kisam hi. Gentehna-in: SDA te in RC pen Anti-Christ hi, ci-in agen uh hangin, Thumgawm Pasian ahi, Pa, Tapa, Khasiangtho pen RC san bangmahin sang lel hi. RC upna hi cihtawh nial nading mawkzon ngeilo hi. Thumaan’ pen thumaan’ mun mahah koih ding kisam hi. Tutungin “Thumgawm-Pasian” pen laisiangtho tawh sittelin kikum dih ni.

Ei leh Pasian pen kikhailua mahmah hi. Abawlpa leh a bawlnate kihi mawk hi. Tungman milim mekpa leh tungman kikhaih mah bang ihi hi. Tu-in hong bawlpa Pasian thu kikum ding ihihmanin, kiniamkhiat takin i pau ding a, kidawmtakin i sut ding hi. Pasian cih tawh kisai a vekpi-in theih zawh ding i hanciam kei ding hi. Thuthuk hi a, among themno khat zong kisutsiang zolo ding hi. Laisiangtho sung khuavak omzah ciangtawh i lungkim ding hi.

Thuman lamhilh Khasiangtho ngenin i thuum ding hi. Doctor degree te Phd degree te, leh leitung pilna liatnate leh pawlpilian majority lungsim suahkhia photin Pasian piak Khasiangtho pilna muangin thuman khatkhit khat pholhkhia ni. Kamsangte leh thuhilh zuaute hilhna khempeuh pen Laisiangtho bekmah tawh kisittel thei ding hi. Ih tawi laisiangtho tungah Topa in, i mit hong honsak ding hi.

Thum kigawm Pasian pen thuthukpi hi-a, vantung dongin sinding ahi hi. Ahizongin Pasian cih kammal pen, Hebrews leh Greek tawh a kigelh Original laisiangtho sungah (plural) khat sang-a tamzaw genna nazang tawntung hi. Tua pen numei naupang leh mi-nautang eite aadingin sang lua ahihmanin , laisiangtho sung kigen bang, eibil sungah kitelthei ciangtawh kikup ding ihi hi.

Leipiancilin [Pa, Tapa, Khasiangtho] naseemkhawm.

“A kipatcilin Pasian in van leh lei a bawl hi.—Tua ciangin Pasian Khasiangtho pen tuipi maitangah gamtangin uapsuk pah hi.” Genesis 1:1-2.

Hihmunah Pasian leh Khasiangtho nih hong kilang hi. Nungzui John in, Leitung a bawl laitakin a Tapa Zeisu zang hi, ci-in hong hilh leuleu hi.

“A kipatcilin ‘Thu’ a om hi. ‘Thu’ in Pasian tawh a omkhawm hi. ‘Thu’ zong Pasian mah ahi hi. Acil pekin ‘Thu’ leh Pasian a kibang uh hi. Nakhempeuh peuh Ama bawl hi a, Ama lo-a kibawl na khatbeek’ omlo hi.” John1:1-3.

Pa in thupia, Tapa ahi Thu in seemkhia, Khasiangtho in keem, ci-in siangtakin kimuhi. Leitung a bawl laitakin Thum Kipawl Pasian in naseem uh hi. Pa, Tapa, Khasiangtho thumte pen amau panmun ciatah manlah mahmah uh hi.

“Vangtung ah, Pa, Thu, Khasiangtho ciamtehna thum om hi. Hih thumte kipumkhat hi.” 1John5: 7.

Pawlkhatte in hih ‘khat’ cih kammal naklak lua-in mipumkhat bek dingin bulh pah uh hi. Adangdang tawh saikak leng tua bang hilo hi. Ukna aana power kibangin zangkhawm, policy leh lungsim pumkhatin om, cinuam ahi hi.

Hotkhiatna-ah Naseemkhawm:

Zeisu tui kiphum laitakin, vantung panin nakpi-in ki-uapsuk hi. Pa leh Khasiangtho in naseem uh hi. ” ” Zeisu tui a kiphum khit phetin, tuisungpan hong paikhiat laitakin, vantung kihongin, Pasian’ Khasiangtho vakhu bangin hong tuaksuk kamu hi. Tua ciangin, van pan aw khat hong ging a, ‘ hih in, keimah hong lungdamsak ka it ka Tapa ahi hi,’ aci hi.”Matt 3:16-17.

Thum kigawm Pasian innkuan hiah hong kilang hi. Zeisu in a pumpitawh tuiphumna la hi. Khasiangtho Pasian in vakhu bangin cing hi. Van panin Pa in a Tapa ahihna pulak hi. Hi tungkan a telzaw-in Pasian hong kipholak theilo ding hi.

Zeisu bek?

“Note pai unla, minam khempeuh tungah thuhilh un. A umte Pa min, Tapa min, Khasiangtho min tawh baptize un.” Matt 28:19-20. Vantunggam lut nading geelna pen Zeisu kia nasep hilo hi. Pasian Zeisu Gumpa tavuan ladingin sawl hi. Tua gumpa a um khempeuh vantung innkuan sungah seal tumin sanna kibawl hi. Tua pen Pa, Tapa, Khasiangtho min tawh vantung innkuan kisuak thei ahi hi. Step by step a, kalsuan kul hi. “Zeisu bek” ci-a tungkhutt’ ngengngang mawk tawh hikhin lo sam hi.

Tuiphumna tuamtuam a om zelzul hangin kamsang zuau, thuhilhzuau om ding, cisese lo hileh, khat peuhpeuh izat hangin phamawhlo kha ding hi. Ahi zongin Zeisu kineih, kamsang kineih, thuhilhzuau tampi hong paikhiazo hi, cimawk ahih manin,Pasian kammal laisiangtho tektekmah tawh din tinten ding ahi hi.

Vantung kilaktoh leh tulaitak:

“Hih leitung tawh kikhenin nangkiang ka hong pai ding hi; ahi zongin amaute leitungah omlai hi. A Siangtho Pa aw, keima tungah nong piak amaute hangin namin a kipna dingin; eite in pumkhat ihih mah bangin amaute zong pumkhat a suakna dingin.—”John17:11,

“Amaute pumkhat a suaktheih nangin; Nang sungah ka-om a, kei sungah nang nong om mah bangin, amaute zong eite sungah hong omtheihna dingin ahi zongin; “vs21

“Leitungmite in nangmah nong sawl kahihnathu a theihna ding un , kangen hi. Eite in pumkhat ihihmah bangin amaute zong pumkhat a suahna dingin, kei tungah nahong piak vangletna , amaute tungah kapia hi.” vs22 [John 17;11,21,22.]

Pumkhat suak cihpen mi-pumkhat gen hilo-in lungsim khat, ngaihsutna khat gen nuam ahi hi. Pa tawh kikumin, Pa kiangpan thukimna la tawntung hi. Pa leh Tapa sepkhiat nakhempeuh Khasiangtho in nakeem, nacing nakhansuahto hi. Nungzuite pumkhat suahna zong mihonpi lungsim kikhat ding, kithutuak ding deih ahi hi.

Christian sungah a tampite in ei lungsim utlamlam atum-akakin laziauziau-in, Khasiangtho mintawh tuiphumna e, Zeisu minbek zangin tui kiphumtawh e, om zilzul uh hi. Pasianthu leh Zeisu thuhilhna pen tua bangmawk a zat ding hilo hi. Zeisu vaikhakna mah sihsan zaw leng muanhuai pan ding hi.

”Kei nong it uleh, kathukhamte nazui un. Tua ciangin keimah in Pa kiangah kangen ding a, amah in note tawh a tawntungin a hong omtheihna dingin, Huhpa dang hong pia ding hi. –John 14:15-16. Zeisu vaikhakna khempeuh ah, thukham langpanna khempeuh ‘agalpa nasep hi,’ ci-in gen hi. Ama thumangte pen Khasiangtho kipia ding a, thunialte ngah kha pen, khanin hipah ding hi. Khasiangtho pen nungzuite in thukham a zuihzawhna ding Huhpa ahi hi. Thukham bei leh Huhpa kisapna bang ommawk ding hiam?

“Pa kiang pan a hong pai thuman-thutak tawh kidim Khasiangtho ahi,Pa kiangpan a ka hong sawl Huhpa Khasiangtho hong tun ciangin, keima thu tetti hong pang ding hi.” John15:26,

Zeisu in Pa kiangah ngen ding a, Pa in Khasiangtho pia ding a, tua Khasiangtho a nget Pa in a piak pen Zeisu in sawlin , eite tawh hong omkhawm ding ahi hi.

Vantung Kumpi tokhom

”Ka et ciangin kumpi tokhomte hong kikhia suk a, Taanglai Mipa a tu kamu hi—-Ka et ciangin mihing Tapa tawh kibang mikhat meiilom tuangin, Taanglai Mipa kiangah hong pai hi. ” Daniel 7 :9, 13.

Kumpi tokhomte hong kikhia suk, ci ahih ciangin, tokhom tung aa tu ding khat sangin tamzaw hi, cih i thei hi. Tua Taanglai Mipa kiangah mihing Tapa meiilom tuangin hong pai cileuleu ahihmanin Pa leh Tapa pen mipum khattuak a om ahina kitel hi. Khat leh khat kikawm uh, kithuza uh, cihpen mittang tawh kimu gen ahi hi.

Stephen a kidenlupna-ah a sihma-in, vantung kihong a, Pasian taklamah Zeisu tu mu hi.” Acts 7 :55-56. Pasian taklamah tu om ahihmanin kumpi tokhomte acihpen Pa, Tapa, Khasiangtho Pasian mi-thumte tutna gennuam ahi hi.

Thuman kante aadingin hizah pen kicing mahmah lel hi. Pasian langpangte in bel tel ngeilo ding uh hi. Sehnel tunga innlampa bang ihihloh nangin Topa vaikhak thute kiciantakin kan ni. Khasiangtho in zuih zawhna tha hong pia ding hi. Mihing pen perfect ngeilo ding hi. Ahi zongin, thuman nial, thunial ihihloh limlim ding thupi hi.

A simkha sanggamte tungah Topa Khasiangtho in hong tutpih henla, mit hong honsak tahen. Pr Thang Siangh