Thucinh thutang (E)

• Ei leh ei ki muang le’ng kikhial thei tawntung a, Topa muang le’ng bel kikhial ngei hetlo hi.

● En’na leh elna pen, siatna nam khat mah ahih manin, i lungsim sung panin hemkhia den ni.

● Eima thu bek thu sa loin, midangte ngaihsutna zong thupisak ni.

● Eima deihna leh mipi(a tam zaw)deihna bulphuh loin, Pasian deihna bulphuh leeng, i lawhcing zaw ding hi.

● Etlawm takin i pumpi i puah/zep mah bangin, a hoih theipen dingin i lungsim puahin zeem den ni.

● Eima ading bek ngaihsun loin, midangte’ ading zong ngaihsutsak ni.

● Eima hanciamna tawh pilna, siamna leh neih leh lamhte a kilawm ciang khat i nei kha mah dinga, ahi zongin tua pilna siamna leh neih leh lamhte kip sakin, man aneisak ding pen, Pasian bekmah ahi hi.

● Ei hong itte bek i it leh gahhoih i gah ngei kei ding hi. Hong mudahte zong it siam ni.

● Eima hih theihna ciat tawh, Pasian minthan’ gamzai nading leh, i gam/lei leh i minam adingin mapang ciat ni.

● Eima theihna suang loin, Topa hih theihna bek mah suang zaw ni. Tua in lampi maan hong musak dinga, hong lawhcingsak ding hi.

● Ei mihingte pen, koppih nei loin a piang theilote ihih manin, ei guak tangtattat se kei ni. Lauhuai hi.

● Ei leh ei i kimuan leh kikhial thei. Topa muang leeng bel kikhial ngei kei.

● Eima ngah nading bek i geelgeel leh eima thuak nading bek a zongzong hi gige hang. Ki dawm ni.

● Etteh taak dingin i nuntak theih nadingin Pasian i kimakaihsak ding kisam hi.

● Eima dinmun maan taktak i tel masiah kikheelna maan taktak inei thei kei ding hi.

● Ei mahmah tel takin ki thei cian phot leeng midangte a hoih in i mu thei pan ding hi. (Midangte hoih lohna bek lim muhsakin midangte a hawmthawh den keeite pen amah leh amah akitel cian lote hi).

● Elijah in, Bal kamsangte mai-ah hangsan takin ding ngamin, gualzawhna a ngahna pen, ama siamna leh ama vangliatna hang hi lo a, Pasian’ vangliatna hang leh Pasian’ panpihna hang hi zaw hi. A thahat vanglian Pasian’ huhna i kisam den hi.