Thuciamnate (Covenants) ~ Rev. Zam Khat Kham

Thuciamnate (Covenants) ~ Rev. Zam Khat Kham

Mihingte’ tangthu i cih Pasian’ deihna a tangtunna hi, cih thu Laisiangtho in hong hilh hi. A tawntung adinga Pasian’ gelna Laisiangtho sungah kilaak-a, Pasian in a bawlsa thuciamna leh kamciamte ah a bulpi-in om hi. Laisiangtho sung ah thuciamna giat bang peuhmah kimu thei a, leitunga Pasian’ gelna leh deihnate tawh kizom a thupipen thute tawh kipaiikaan hi. A tamzaw-in hih thuciamnate a tangtung pelmawh ding Pasian’ deihna kipulaaknate hi den zaw hi. Laisiangtho sunga thuciamnate banah theologian-te in theology tawh kisai thuciamna thum gen beh lai uh hi.

A. Theology Tawh Kisai Thuciamnate

A tawntung adinga Pasian’ gelnate a genna vuah, theologian-te in tawntung hun beisa lai pek pana a telsa mite a hotkhiat nadinga Pasian’ gelna mah a bulpipen hi, ci uh hi. Tua mah tawh kizui-in, tangthu pen hotkhiatna thu tawh kisai-a Pasian’ gelnate a kisepkhiatna bangin mu pah uh hi. Hih thugil a genna vuah, theology tawh kisai thuciamna nam thum gen uh hi.

1. Pasian in Adam tawh nasepna thuciamna (covenant of works) khat na bawl hi, ci-in gen uh hi. Hih thuciamna ah Adam in Pasian’ thu mang hi leh, a khalam dinmun ah kipsuak pah dinga nuntak tawntungna ngah pah ding hi. Hih thuciamna pen “na nek nini-in na si taktak ding hi” (Piancil. 2:17) ci a kivauhilh sia leh pha theihna singkung tawh kipia hi, kici hi. Adam in tua singgah na ne lo hi leh, si lo dinga, vantungmite siangthote mahbangin sianthona dinmun ah kikipsak ding hi, ci-in kila hi. Hih thuciamna bel deihkaih pianna tawh kigen hi a, Laisiangtho in thuciamna peuhmah-in gen ngei lo-a, tua thu hang mah-in Laisiangtho siam tampite in bulphuh ding kician om kei, ci-in thuciamna bangin sang zo lo uh hi.

2. Thuciamna dang khat kigen leuleu a, tua sungah tawntung hun beisa hun lai-in Pa Pasian leh Tapa Pasiante’ kikal ah mihingte’ hotkhiatna tawh kisai-in thuciamna khat kibawl hi, ci-in kigen hi. Hih thuciamna ah, Pasian’ Tapa in amah a um mite kihotkhiat nading in tatkhiatna a piak nading tavuan a lak nading leh, Pasian in tua biakpiakna a san nadingin kithukim uh hi, kici hi.

Hotkhiatna tawh kisai Pasian’ gelna pen a tawntung ading ahihna leh tua gelna ah mawhna biakpiakna dingin Khazih a sih kul dinga, Khazih a um mi khempeuhte a kihotkhiat nadingin tua biakpiakna a cingin Pasian in a san kul hi, cih thu Laisiangtho in teltaka hong genna om ahih manin nasepna thuciamna sangin Lasiangtho tawh kituak zaw hi.

Ephesians 1:4 ah, “Ama’ mai ah itna sungah kawkbanna om lo-a i siantho nadingin, lei pian ma-in ama’ sungah hong tel khin hi” ci-in na na kigen hi. Khazih’ sunga i dinmun tawh kisai-in Ephesians 1:11 ah, “Ama’ sunga gouluah hi nei a, Ama’ deihna tawh kizui-a na khempeuh a sem pa’ deihna tawh kizui-in hong kisehkhol hi” na ci hi.

Hih munte leh a dang Laisiangtho munte panin hotkhiatna tawh kisai Pasian’ gelna pen a tawntung ahihna kimu thei hi. Pasian’ gelna pen kamciam mah ahihna tungtawnin Pa Pasian leh Tapa Pasiante’ kikal ah thuciamna khat na kibawl hi, ci-a kila ahi hi.

3. Hotkhiatna tawh kisai a tawntung ading Pasian’ gelna pen hehpihna thuciamna banga ngaihsutna khat zong om lai hi. Hih ngaihsutna ah, Zeisu Khazih pen thuciamna Palaii leh amah a um mi khempeuhte’ tangmi bangin kingaihsun hi. Mi khatpeuh in Zeisu Khazih Honpa-a a san nak leh hih thuciamna in a kalh khempeuh a cin uh ahi hi. Hih thuciamna zong hotkhiatna tawh kisai a tawntung ading Pasian’ gelna pana kideihkaih ahih hangin, hotkhiatna thu ah Pasian’ hehpihna thupisak hi. Tua thu mah tawh kizui-in tatkhiatna thuciamna leh hehpihna thuciamnate in Laisiangtho bulphuh ding pawlkhat nei a, Laisiangtho Laisiangtho siam a tampte in Laisiangtho bulphuh ding mel a om lo nasepna thuciamna sangin sang thei zaw uh hi.

Ahih hangin hih theology tawh kisai thuciamnate a um mite in hotkhiatna tawh kisaia tawntung ading Pasian’ gelnate mihingte’ tangthu-a Pasian’ gelna bulpi suah thei zel uh hi. Tua ahih manin Israel mite tawh kisai-a Pasian’ gelnate, pawlpi tawh kisai-a Pasian’ gelnate, leh minamte tawh kisai-a Pasian’ gelnate thusim lo thei kha zel uh hi. Hotkhiatna tawh kisai-a Pasian’ gelna pen a tawntung ading ama’ gelna ah a thupi mahmah khat ahih teii hangin, tua pen Pasian gelna buppi hi lo hi.

Hih bang sanzia sanga hoihzaw bel, tangthu-a Pasian’ gelna pen Pasian in a minthanna a laak nading hi-in, mihingte a hotkhiatna bek tawh hi lo-in Israel mite, pawlpi leh minamte tawh a kizopna tungtawna a deihnate a tunsakna leh amah mahmah a kilaakna leh tawh tua bangin sem hi. Tua mah tawh kizui-in, mihingte’ tangthu buppi-a Pasian’ gelnate kilangsakin hotkhiatna tawh kisai Pasian’ gelna mahmah zong a kihel Laisiangtho sunga thuciamna giatte tungtawnin mihingte’ tanghtu i et ding deih huai zaw ding hi.

Theology tawh kisai thuciamnate a uangsak theologian-te “covenant theologians” kici a, Laisiangtho sunga thuciamnate a uangsak mite “dispensationalists’ kici hi, bang hang hiam cih leh, Laisiangtho sunga thuciamnate in hunkhennate sunga kilaak mihingte’ tangthu a hun tuamtuamte a kilamdanna hong lahna hang ahi hi.

B. Laisiangtho Sunga Thuciamnate

Laisiangtho sunga Pasian’ thuciamnate mihingte’ tunga kingah thuciamna leh mite’ tunga kinga lo thuciamna, ci-in nam nih-in kikhen thei hi. Mihingte’ tunga kingah thuciamna i cih ciangin thuciamna a kipia mite in bang khatpeuh a sepna uh tungtawna Pasian in a tangtunsak thuciamnate a gen i hi hi. Mite in thuciamna-a thukhunte a zuih nak leh Pasian in ama’ lampang peuhmah tangtun teiiteii dinga, ahih zongin mihing in a tangtun zawh kei leh, Pasian zong a kamciamte a tangtunsak nading panin tavuan peng pah hi.

Mihingte’ tunga kinga lo thuciamnate leuleu bel, mihingte’ kihelna pawlkhat a om teii hangin, Pasian’ gelna pawlkhat a kipulaakna hi zaw a, mihingte’ tunga kinga lo kamciam tungtawna kipia kamciamte Pasian’ hun leh Pasian’ zia bangin tangtung taktak ding hi. Laisiangtho sunga thuciamna giatte’lakah Eden huana thuciamna leh Moses tawh kibawl thuciamna bek mite’ tunga kinga thuciamna ahi hi.

Ahi zongin, mihingte’ tunga kinga lo thuciamnate nangawn ah mi pawlkhat tawh kisai-a a kizatna ah mihingte’ tungah a kingakna zong om veve hi. Mihingte’ tunga kinga lo thuciamnate mihingte’ tunga kingah thuciamnate tawh a kilamdanna taktak bel, tua bang thuciamnate a tangtun nading Pasian in kamciam khina, tua banga a tangtun nading Pasian’ vangliatna leh Pasian’thuneihna tunga a kingak bekna ahi hi.

1. Eden huana kibawl Edenic covenant pen Pasian in mihingte tawh a bawl masakpen thuciamna hi a (Piancil. 1:26-31; 2:16-17), nuntakna leh thupha leh sihna leh hamsiatnate Adam’ muanhuaina tunga kingah Adam tawh kibawl thuciamna ahi hi. Eden huana thuciamna ah thuciamna ah mihing khempeuhte’ pa a suak ding, leitung a uk ding, ganhingte’ tunga ukna a nei ding, huan a kem ding, leh sia leh pha theihna singkung gah a ne lo dingin Adam tavuan kipia hi.

Adam leh Eve in thuciamna cing zo lo-in tua singgah a nekna uh tawh Pasian’ thu a man loh uh ciangin, thuman lohna hanga sihna dan amau’ tungah kitungsak pah hi. Adam leh Eve-te thakhat thu-in khalam ah si pah uh a, hotkhiatna a ngah theih nadingun a suahthak loh uh phamawh tamawk hi. A nunglam ciangin a pumpi mahmah uh si lai hi. Amau mawhna hangin mihing’ tate khempeuh amau bangmah-in mawhna leh sihna kitung hi.

2. Mihingte mawhna ah a puk khit ciangin Pasian in Adam tawh thuciamna na bawl-a Adamic covenant kici hi (Piancil. 3:16-19). Hih pen mihingte’ tunga kinga lo thuciamna hi a, mihingte a mawhna uh hanga a nuntak zia ding uh Pasian in a pulaakna ahi hi. Thum kik theih nawn hi lo-in, mihingte in bang khatpeuh a sep manun a kikhel nawn ding zong hi lo hi.

Tua thuciamna ah tua huna kipan mihingte’ nunta zia dingte kigen hi. Tua thuciamna sungah Satan in a zat gulpi mahmah kisamsia hi (Piancil. 3:14; Rom. 16:20; II Cor. 11:3,14; Kilaakna 12:9); Tanpa kikamciam a (Piancil. 3:15); tua kamciam pen Khazih ah tangtung hi; numeite’ pianzia ding kigena, naupai denkeii nading, ta neihna ah dahna leh natna a thuak nading, pasal’ ukna nuai-a a om nadingte kigen hi (Piancil. 1:26-27; I Cor. 7-9; Eph. 5:22-25; I Tim. 2:11-14). Pasalte in zong khua-ul kai-in nek ding zong ding hi (Piancil. 2:15 leh Piancil. 3:17-19 enkaak dih ve); mihingte’ nuntakna pen dahna vive hi dinga sihna tawh kikhum ding hi (Piancil. 3:19; Eph. 2:5). A tamzaw-in, mihingte hih huna kipan hih thuciamna nuai-a nungta toto hi mai hi.

3. Noah leh a tate tawh Noahic covenant na kibawl hi (Piancil. 9:1-18). Hih thuciamna sungah Adamic covenant sunga thute pawlkhat a kigenkikna ahih hangin, mawhna a kikhaam nadingin mihingte’ kumpi ki-ukna a kigen cilna ahi hi. Adamic covenant mahbangin mihingte’ tunga kinga lo thuciamna hi a, Noah’ nunga mihing tate’ pianzia tawh kisai Pasian’ gelna hong lak hi.

Hih thuciamna sungah mihingte’ kumpi ki-ukna kiphuanga, tua sungah mi dangte’ nuntak a thatte kithah kik nading capital punishment thu kikhung hi. Leitung nate’ pianzia ding kikipsak kik a (Piancil. 8:22; 9:2), mihingte in tuiciin tun ma-a a nek bangin anteh theipuam bek ne lo-in ganhingte’ sa a nek theih nadingun phalna kipia hi (Piancil. 9:3-4).

Noah tawh kibawl thuciamna sungah a tate’ suan leh khakte tawh kisai genkholhna (Piancil. 9:25-27) leh Messiah a pian nadinga Shem gui a kisehnate kihel hi. Japheth tawh kisai genkholhna ah leitung tangthu-a Gentile mite’ gualzawh nading kigenkhol leh kilawm hi. Adamic covenant ah lungsim kitheihna tawh kimakaih hunkhenna a kipat mahbangin Noahic covenant ah mihingte’ kumpiki-ukna a kipatna kimu hi.

4. Abrahamic covenant (Piancil. 12:1-4; 13:14-17; 15:17; 17:1-8) pen mailam tangthu tawh kisai Pasian in a laakna thupipen khat hi a, kamciam thukpite thu thumin khenin na kipia hi. A masa-in, suan leh khak tampi a neih nading (Piancil. 17:16), amah ngiat in thupha tampi a ngah nading (Piancil. 13:14-15,17; 15:6,18; 24:34-35; John 8:56), a min a liat nading (Piancil.12:2), leh amah ngiat thupha a suah nading Abraham tungah kamciam na kipia hi.

A nihna ah, Abraham tungtawnin minam lian khat hong piang ding, ci-in kamciam na kipia hi (Piancil. 12:2). Pasian’ gelna ah, hih pen Israel nam 12 a piangsak Jacob’ suan leh khakte a gen nopna ahi hi. Hih minamte’ tungah leitang kamciam na kipia hi (Piancil. 12:7; 13:15; 15:18-21; 17:7-8).

A thumna ah, Abraham’ tungtawnin leitung buppi ah thupha tung ding, ci-in kamciam na kipia hi (Piancil. 12:3). Israel mite Pasian’ kilaakna a tunna a suahna, Pasian a pulaak kamsangte a pianna a suahna, leh Laisiangtho a gelh mite a pianna a suahna ah tangtung hi. Tuate sanga thupi zawlai ah, Abraham’ suan mah ahi Zeisu Khazih tungtawnin minamte in thupha ngah ding hi. Israel mite in Pasian tawh a tuam vilvel kizopna a neih manun, Israel mite a samsiate’ Pasian in samsia a, Israel mite thupha a piate thupha pia hi (Piancil.12:2).

Adamic covenant leh Noahic covenant mahbangin Abrahamic covenant zong, mihingte’ tunga kinga lo thuciamna ahi hi. Khang khatkhatte in thu a man uh ciangin hih thuciamna thuphate ngah a, thu a man loh uh ciangin sal-in kikaih theih zel hangin Pasian in Israel thupha a piak nading, Israel tungtawnaa kilaak nading, Israel tungtawna tatkhiatna a piak nading, leh Israel mite a ciamsa gam ah a paipih nading a gelnate mihingte’ tung kinga lo-in Pasian’ vangliatna leh deihna tung bekah kinga ahih manin kician mahmah hi.

5. Mosaic covenant pen Israle mite’ tungah Egypt gam pan Ciamsa Gam zuana a pai laitakun Moses’ tungtawna kipia ahi hi (Pai. 20:1-31:18).

Paikhiatna sungah kigenin Laisiangtho mun dang tuamtuam ah a kigenbeh mahbangin, amah leh a mire kizopna a uk ding thukham Moses tungah Pasian in pia hi. A huampi-in za guk bang a pha thupiak tuamtuamte khenpi thumin kikhen thei hi: (a) Pasian’ deihna a pulaak thukhamte (Pai. 20:1-26), (b) Israel mite’ nisim nuntakna keh kizopnate a uk ding thukhennate (Pai. 21:1-24:11), leh (c)ngeina thupiakte (Pai. 24:12-31:18).

Mosaic covenant pen mihingte’ tunga kinga thuciamna hi a, Israel in Pasian’ thu a man leh Pasian in thupha pia-in, thu a man kei uh leh hamsiat-in sek ding cih thukhun ahi hi. Thuhilhkikna 28 sungah hih thu kilangpen hi. Israel mite in a thu zui zo lo ding lam-et kholhsa hi napi-in, a mite a nusia lo dingin Pasian in kamciam hi (Jer. 30:11). Mosaic covenant pen tawlkhat sung bek a kimang ding thuciamna hi a, Khazih’ singlamteh ah bei ding hi. Hehpihna thu pawlkhat a om hangin, nasepna tawh kipawl thuciamna hi zaw hi.

6. Palestinian covenant (Thuhilhkikna 30:1-10) pen Israel mite in a tawpna ah leitang a neih nadinguh tawh kisai mihingte’ tunga kinga lo thuciamna ahi hi. Thuciamna khatpeuh mihingte’ tungah kinga het lo-in a tangtun ding kician mahmah hi taleh khang khatpeuh adingin amau’ thumanna tungah kinga thei mahmah ahihna hih thuciamna in hong lak deuh hi. Piancilna 12:7 ah Abraham’ tungah kipia a, Thuciam Lui buppi ah a kikipsak phapha kamciam bel Abraham’ suan leh khakte in tua leitung nei ding uh, cih ahi hi.

Ahi zongin, a thuman lohna uh hangin Jacob leh a suan a khakte Egypt gam pan a paikhiat mateng uh tua gam ah kum tampi teng uh hi. Ahih hangin, Pasian’ deihna tawh kizui-in, amaute hong ciahkik-in tua leitang pawlkhat nei ngei sam uh hi. A nunglam ciangin, a thuman lohna uh leh Pasian’ thukhamte a thusim lohna uh hangin, Assyria gam leh Babylon gamte ah saltang dingin kipaipih mang hi.

Pasian’ hehpihna mah tawh, Babylon gam ah kum 70 sal-a a om khit uh ciangin kiciah kiksak leuleu a, AD 70 kuma Jerusalem a kisuksiat hun ciang dong a gam uh kipia kik leuleu hi. Bangzah-in gina kei taleh, a tawpna ah tua gam mah ah kiciahpih kik teiiteii-in, lungmuanna leh thupha tawh tua lai-ah teng ding uh, koimah ah kithehthang ngei nawn lo ding uh, ci-in Israel kikamciam hi.

Tuhun laitaka Israel mite a gam vuah a ciahkikna uh pen hun nunung cianga piang ding thu a kipatna a hih manin nakpi takin thupi hi. Zeisu Khazih hong pai kikin a kumpi gam hong phuh khit ciangin Israel mite khat beek kisiit lo-in a gam vuah ciah kim ding uh hi (Ezk. 39:25-29). Thuman lohna hangin khag khatpeuh a kihawlkhiat hangin, Pasian in a mite a gam vuah a ciahpih kik ding pen mihingte’ tunga kinga het lo thuciamna hi a, tangtung taktak ding hi.

Hih thu mah tawh kizui-in, Palestinian covenant sungah Israel mite in Pasian um lo-a a thu a man lohna uh hanga a kithehthang nading (Piancilna 15:13; Thuhilhkikna 28:63-68), kisikkikna hun leh a ngei uh a batkikna hun ding uh (Thuhilhkikna 30:2), Israel mite a kikaihkhop kik nading (Thuhilhkikna 30:3; Jer. 23:8; 30:3; 31:8; Ezek. 39:25-29; Amos 9:9-15; Sawltak. 15:14-17), A gam vuah Israel mite a kikoih kik nading (Isa. 11:11-12; Jer. 23:2-8; Ezek. 37:21-25; Amos 9:9-15), khalam-a a kikhelna uh leh a minam bup vua a ngei a batkik nading uh (Hos. 2:14-16; Rom. 11:26-270, a tawpna ah minam khat a hihna uh lungmuang leh daupai taka a om nading uh (Amos 9:11-15), amau a nengniam mite Pasian in thu a khen nading (Isa. 14:1-2; Joel 3:1-8; Matt.25:31-46) cihte kihel hi.

7. Davidic covenant (II Sam. 7:4-16; I Khang. 17:3-15) zong mihingte’ tunga kinga lo thuciamna hi a, Pasian in David’ tungah a bei ngei lo ding kumpi khanggui, kumpi tokhom, kumpi gamte e tawntung adingin kamciam a piakna ahi hi. Hih thuciamna a pulaakna ah Jehovah Pasian in David’ tate tawsat-a thuhilh huai a om leh a hunhunin thuhilh geihgeih zel ding ahihna na gena (II Sam. 7:14-15); ahi zongin tua thuciamna a kip a khona bel bangmah in susia zo lo ding hi.

Abrahamic covenant in Israel mite minam khat-a a kip den nadinguh (Jer. 31:36) leh tua leitung a neih tawntung nadinguh a kamciam mahbangin (Piancil. 13:15; I Khang. 16:15-18; Late 105:9-11), Davidic covenant in amaute a tawntung kumpi tokhom (II Sam. 7:16; Late 89:36), A tawntung Kumpi (Jer. 33:21), leh a tawntung kumpi gam na kamciam hi (Dan. 7:14).

Jehovah Pasian’ kiciamna tawh tua thuciamna kibawl-a a kikipsak ni-a kipan (Sawltak. 2:30) Khazih suah hun dong, David’ tokhom tunga tu ding mi kitasam ngei lo takpi a (Jer. 33:21); Pasian’ Tapa leh David’ Tapa ahi Khazih ngiat mahmah zong tua tokhom luat ding Pa ahih manin tua tokhom tungah tu dinga (Lk. 1:31-33) a tapa khat a kumpi tokhom tungah a tawntungin tu ding hi, ci-a David’ tunga kikamciam tangtung ding hi.

Kum tul maanna sungah Khazih mahmah leitungah a man nading tawh kisai-in hih Davidic civenant a thupipen ahi hi. Sihna pana thokik David mahmah Israel innkuante’ tungah Khazih’ nuai-ah kumpi-in mang ding hi (Jer. 23:5-6; Ezek. 34:23-24; 37:24). Pa Pasian’ tokhom tungah David a tut ngei loh mahbangin vantunga a tokhom tungah Khazih a manna ah hih thuciamna tangtung nai lo hi. Leitunga kumpi gam leh leitunga kumpi tokhom kigenna hi zaw hi (Matt. 25:31). Tua ahih manin, hih Davidic covenant pen mailam- huna tangtung ding Pasian geelna ah a thupipen khat ahi hi.

8. Thuciam Lui sungah kigenkhol-a kum tul maanna-a tangtung ding thuciamna thak zong mihingte’ tunga kinga lo thuciamna khat mah ahi hi (Jer. 31:31-33). Jeremiah in a gen bangmah–in, hih pen “Israel innkuan, leh Judah innkuan tawh a kibawl” thuciamna ahi hi (Jer. 31:31). Israel mite in a palsat uh Mosaic covenant tawh kilehbulh-in a thuciamna thak ahi hi (Jer. 31:32).

Hih thuciamna sungah Pasian in, “Tua nite khit ciangin, a sung vuah ka thukham ka koih dinga, a lungtang vuah ka gelh ding hi; amaute’ Pasian ka hi dinga, amaute ka mi a hi ding uh hi, TOPA in ci hi” (Jer. 31:33). Hih banga Pasian mahmah leh a deihna a mite’ tunga a kilaakna hanngin, Jeremiah 31:34 ah, “TOPA thei in, ci-in kuamah in a vengte hilh nawn lo dinga, kumah in a sanggampa hilh nawn lo ding hi: bang hang hiam cih leh, amaute khempeuh a neupen panin a lianpen dong in keimah hong thei ding uh a, amaute’ mawhna maisakin a mawhna a khialhnate uh ka phawk nawn kei ding hi, TOPA in ci hi.”

Hih Laisiangtho mun in Khazih kumpi-a a maaana kum tul maanna hun sunga omzia ding hong hilh a, mi khempeuh in Khazih’ thu a theih kim nading a genna ahi hi. Hih thu tawh kizui-in Topa’ thu mi khempeuh in thei kim ding ahih manin kuamah in a vengpa’ tunga Pasian’ thu gen kul lo ding hi. Pasian in Israel mite’ mawhna maisaka thupha a dima a piak hun zong hi ding hi. Pawlpi mahmah thumaan thutak a thei lo leitung mun khempeuh ah pai-a Lungdamna thu a gen dingin kisawl ahih manin Jeremiah sunga i muh hih thuciamna sunga thute tuhun a tangtun lohna kimu thei hi.

Ahih hangin, Thuciam Thak ah hih thuciamna thak leh pawlpi kizopna kigen ahih manin, Israel mite’ tunga kipia hih thuciamna thak pawlpi ah tangtung hi, ci-a mi pawlkhat zong om hi. Mailam huna kum tul maanna cih bang a om dinga a um lote leh Israel mite a ngei a bat kik uh a um lote in hih thuciam thak buppi pawlpi ah tangtung hi, ci-in um uh a, hih thuciamna sunga thute kha thusuah-in Israel leh pawlpi a kibang hi, ci-in gen uh hi.

Mailam huna Israel mite a ngei a bat kik nading leh kum tul maanna a um mite leuleu in Thuciam Thak sunga kigen thuciamna thak pen mailam huna Isarel mite’ tunga tung ding thute lakah pawlpi tungah pawlkhat tangtung hi, a ci pawl oma, tua mahbangin thuciamna thak nih (Jeremiah sunga kipia Israel mite’ ading khat leh a nihna ah, hih hehpihna hun sunga Zeisu Khazih tungtawna pawlpi ading hotkhiat a pia thuciamna thak khat)om hi, ci-a um pawl zong om hi. a taktakin, Israel mite’ ading ahi a, pawlpi ading ahi zongin, thuciamna thak pen Khazih’ sihna leh a kiluangsak a sisan pana hong piangkhia ahi hi.

Pasian in mihing tate’ ading sep dinga a geel khempeuh a Tapa’ sisan bulphuh-in sem hi, cih hih thuciamna thak in lungmuanna hong pia hi. Lam nih-in kimu thei hi:

(a) Khazih a um mi khempeuh honkhia-in kema, vantung ah a Tapa tawh kisuun-in tunpih ding hi. Hotkhiatna a kingah nadingin Khazih up ding kisam cih thu peuhmah in hih thuciamna pen mihingte’ tunga kinga hi, cih suaksak zenzen lo hi. Upna pen hih thuciamna ah khen khat hi lo a, hih thuciamna tungtawna kingah tawntung thupha sunga lut theihna hi bek hi. Hih thuciamna pen thu um lo mite tawh kisai kha lo, thu-ummite bek tawh kibawl thuciamna hi a, amaute’ tanga Pasian’ thumaanna a kikamciamna ahi hi. “Note’ sunga nasep hoih a pan khin pa in Zeisu Khazih ni dongin sem ding” (Phil.1:6) a hong hotkhiat nading leh hong kepbit nading Pasian’ vangliatna khempeuh hehpihna tawh kibawl hih kamciam sunga kihel ahi hi.

Hih lai mahmah ah bit taka kikema a tawpna ah minthanna ah a kitun lo ding hotkhiatna peuhmah hih khanghun-in kigeel lo hi. Nisim kalsuanna ah Pa leh a tate kikal ah thu pawlkhat bel om-in, David’ mawhna mahbangin thu-ummite’ mawhna hangin Pasian tawsatna a tun hun zong im mah dinga; ahih hangin hehpihna-a a sansa mite’ nuntak tawntungna tawh kisai Pasian’ kamciam a tun nading, a tun loh nading tuate peuhmah kibulphuh zenzen lo hi.

Mihingte’ ngaihsutna a thupisak mahmah a, hotkhiatna leh Pasian’ hong kepna ah mihingte’ lungsim khensatna kihel hi, ci-a hilh pawlkhat om hi. Mihing’ ngaihsutna ah hi thei leh kilawm hi; ahih hangin Laisiangtho’ hong hilhna tua bang hi lo hi.

Hih thuciamna khempeuh ah Pasian in amah a um mite ading mihingte’ tungah kinga lo a a sep dingte pulaak hi (John 5:24; 6:37; 10:28). Hih pen lungsim leh ngaihsutna buppi kihel nasep lianpi hi a; ahih hangin ama’ sehsa lampi a zuih nadunguh Pasian in Noah’ tungah a genna ahi a, Abraham’ tungah minam lian khat-a a bawl nading leh ama’ suan leh khak sung panin Khazih a suah nading a gennte zong a hi mah hi zel hi.

Thuciamna khempeuh Pasian’ thuneihna leh vangliatna a kilatkhiatna ahi hi. Pasian in mihingte lungsim khensatna neisak veve hi. Mihingte’ lungsim khensatna kal-a, hotkhiatna a ngah mi peuhmah in a ngah uh hotkhiatna leh Pasian’ na a sep theihnate uh amau’ lungsim tawng pana a khensatna uh a hih lam tel sinsen uh hi. Pasian in mihingte’ lungsim uk hi, ci-in Laisiangtho in hong hilh a (John 6:44; Phil. 2:13), tua mahbangin mihingte’ lungsim khensatna kal-in tua tungtawnin thupha pia hi (John 5:40 7:17; Rom. 12:1; I John 1:9).

Laisiangtho in Pasian’ thuneihna lunghian nading om lo-in hong hilh hi. Pasian in a piang dingte sehkhol-a, a sehsa bangin tangtung ding hi; bang hang hiam cih leh a lamdang khatpeuh tawh Pasian kiphawng thei ngei lo a, a sehsa banga a tangtun loh manin Pasian lungkia cih bang ding hun om ngei lo hi. Tua mahbangin, a kiam ngei lo thu nih – a tawntung adinga a geelna leh tua bang liana a tangtunna – kikal ah mihingte in a lungsim khensatna bang vua a gamtat theih nadinguh zong hong veve hi.

Tua banga a hihna ah, a sehsate kipelh cih bang om ngei lo leuleu hi. Hih thu nih kileekkim-a a kingaihsut kei leh, a langkhat ah, na khempeuh a piang dinga kisehsa banga piang hi lel cih ngaihsutna hong lut lian dinga thungetna, Pasian’ maipha zon nopna, mihingte mawhsak theih nading thu, hotkhiatna thu genna ah mite in lungsim khensatna a neih nading vua kut ngaungauna leh Laisiangtho mun tampi mahmah in khiatna nei het lo ding hi; tua mahbangin, a lehlam leuleu ah, Pasian’ thuneihna peuhmah om vet lo zel ding hi.

Mihingte’ ngaihsutna i cihte Pasian’ ukna nuai ah om, cih bel kingaihsun thei a, ahih hangin Pasian’ thuneihna pen mihingte’ ngaihsutna nuai ah om hi, cih bel hi thei het lo hi. A um mite in Pasian in mihingte’ tunga kinga lo a thuciamna tawh kizui-in hotkhiatna ngah-in a tawntungin bittak-in kikem hi.

(b) Israel mite in mailam huna hotkhiatna a ngah nading thu mahmah uh zong mihing’ tunga kinga lo Pasian’ thuciamna tawh kikamciam ahi hi (Isa. 27:9; Ezek. 37:23; Rom. 11:26,27). Tua hotkhiatna zong Khazih sisan kibulphuh ahi hi. Khazih’ biakpiakna tungtawnin, Pasian in mimal khatpeuh a hotkhiat theih mahbangin minam khat zong honkhia thei hi. Israel mite pen lei sunga kisel gou manpha bangin Khazih in na gen hi. Tua leitang pen leitung ahi hi. Tua leitang lei-a tua gou manpha a lei theih nadinga a neih gil khempeuh a zuak pen Khazih hi, ci-in i um hi.

Hih thuciamna giatte i ngaihsut ciangin, mihingte’ tunga kinga thuciamnate-a mihingte’ ginat lohnate tawh kilehbulh-in mihingte’ tunga kinga lo thuciamnate tawh kisai-in Pasian’ thuneihna ki-uanggen lua thei lo ding hi. Mihingte’ tunga kinga lo-a Pasian’ nasep peuhmah ciangtan nei lo Ama’ hihna kicing tawh kizui-in kisem ding hi.

Dotna

• 1. Theology tawh kisai thuciamnate ah Pasian’ ngimna laigil bang hi a, tua leh tangthu bangci bangin kizom ahi hiam?
• 2. Nasepna thuciamna i cih bang hi a, a kibulphuh Laisiangtho mun koi mun ahi hiam?
• 3. Tatkhiatna thuciamna i cih bang hi a, a kibulphuh Laisiangtho mun koi mun ahi hiam?
• 4. Hehpihna thuciamna i cih bang hi a, a kibulphuh Laisiangtho mun koi mun ahi hiam?
• 5. Pasian in Israel mite, pawlpi, leh minamte tawh kisai a geelnate leh theology tawh kisai thuciamnate i ngaihsutkaak ciangin bang haksatna om thei ahi hiam?
• 6. Tangthu peuhmah theology tawh kisai thuciamnate tawh i et sangin Laisiangtho sunga thuciamnate tawh et huai zaw ahi hiam?
• 7. Mihingte’ tunga kinga thuciamnate leh mihing’ tunga kinga lo thuciamnate khentel in.
• 8. Edenic covenant i cih bang hi a, tua thuciamna a palsat manun mihingte’ tungah bang thute piang ahi hiam?
• 9. Adamic covenant i cih bang hi a, tua thuciamna tungtawnin tuni-a mihingte’ tungah bang thute piang ahi hiam?
• 10. Noahic covenant ah bang thuteng om a, tua thuciamna sunga thute lakah bangteng tuni-in om lai ahi hiam?
• 11. Abrahamic covenant sungah Pasian in Abraham bangteng kamciam ahi hiam?
• 12. Abrahamic covenant sungah Israel mite bang kamciamteng kipia ahi hiam?
• 13. Abrahamic covenant sungah leitung buppi ading bang kamciamteng kipia ahi hiam?
• 14. Bangci bangin Abrahamic covenant pen mihingte’ tunga kinga lo thuciamna hi, ci-in kigen thei ding ahi hiam?
• 15.Mosaic covenant pen mihingte’ tunga kinga thuciamna ahihna leh tawlkhat sung bek a kimang ding thuciamna ahihna bang ciang taktak ahi hiam?
• 16. Bang ciang taktakin Palestinian covenant pen mihingte’ tunga kinga lo thuciam hi kici thei ahi hiam?
• 17. Israel mite Assyria mite leh Babylon mite’ khut nuai ah sal-a a omna leh leitung buppi a a kithehthangnate uh mihingte’ tunga kinga lo Palestinian covenant tawh enkaakin bangci bangin gentel thei ding na hi hiam?
• 18. Israel mite’ thuman lohna, a kikaihkhop kikna, a ngei uh a bat kikna, leh minam khat a hihna uh tawh a tawntunga lungmuang leh daupai taka a om nadingte uh tawh kisai Palestinian covenant sunga thute a tomkim-in gen in.
• 19. Davidic covenent sungah mihing’ tungah kinga lo-a kikamciam bangte ahi hiam?
• 20.Davidic covenant leh mailam huna kum tul maanna bangci bangin kizom ahi hiam?
• 21. Thuciam Lui’ genna ah thuciamna thak sungah Israel mite’ ading bangteng kikamciam ahi hiam?
• 22. Israel mite’ adingin bang hunin thuciamna thak tangtung ding ahi hiam?
• 23. Bang hangin mi pawlkhatte in thuciamna thak tuhun ading hi ci thei uh hiam cih gencian in.
• 24. Thuciamna thak leh thu-ummite’ hotkhiatna a muanhuaina bangci bangin kizom ahi hiam?
• 25. Thuciamna thak leh Pasian’ thuneihna bangci bangin kizom ahi hiam?
• 26. Thuciamna thak leh mailam huna Israel mite’ kihotkhiat nading bangci bangin kizom ahi hiam? Rev. Zam Khat Kham