Thopi maw, Khuaivah? ~ Nk Khanno

Thopi maw, Khuaivah? ~ Nk Khanno

Thopi leh Khuaivah icih te pen kha (wing) nei in a leng thei insect nam ahi uhi.

Thopi ahih leh ninkawm lak, a kihhuai a uih nate bawm in nopsa in a om hi. Ninlak a a om lungnote a tungah pua in a leng kawikawi hi. A siangtho ante, mehteh mehgahte zong a bop ciangin tua ante thaanghuai sak hi. Tua thopi bopsa ante ne kha leng gilna, sungpai sak in nuntakna na ngawn mualliam sak zo thei hi.

Tua hi a thopi pen natna pua “Vector” ganhing kici hi. Nin le mihing kikal ah natna lungno a pua tanupi cih ding ahi hi. Tua hi a kua mah in thopi ki it lo, kikhawi nuam cih thadah ki thatlum nuam ahih manin thoza na ngawn akibawl ana hihi.

Khuaivah ahih leh paak palh bawm, paak zukhumte la khuaizu in bawl uh hi. Paak te palh sak tuam bek hilo in paakte aci a pian theih nading in leh a gah theih nading a huh kawm zong ahi hi. Paakpalhzu te khawmin nasem tanghtangh uh a, tua tungtawn in a khum mahmah Khuaizu kici bawl uh hi. Tua in mihing te cilesa hoihsak in thaza khat asuak hi. Amau zong pen paak ci piangsak nading tanupi te ahi uhi. Amau te pen paak huan nei te, singgah kung te aading akisam mahmah ahih mah bangun mite in a inn vuah khawi in azu nekpih uhi.

Hih a tung aa ganhing nih bangin mihingte zong kinungta thei hi.

Mi pawlkhatte in thusia, thuginalo peuh gengen in nei thei uh hi. Mi gensiatna, mite thanemna ko bawlna, mite kisapna bekbek muhsak gensiatsaknate thupi sak mahmah uh hi. Tua bek hilo in mi khat le khat kikal ah thusia puakpuak thei ahih manin mite kimuhdah sak in, ki tot kisiatna tampi tak piangsak thei hi. Khat veivei ciangin ki tapkhapna, ki muh khialhna leh khutkhialhna ciang dong piangsak thei uhi. Hi bang mite pen thopi tawh kibang in pelh theih ding kisam hi.

Khuaivah bangin Mipawl khatte in mite hoihna te muhsak in lungdam pih uhi. Asia pel in a pha mu uhi. Thu hoih thupha mah thupi sak ahih manin mite aading lungnop maitai na pia zo hi. Mite hoihna te etteh kawikawi cing kawikawi ahih manin amah pen khuaizu bangin mihoih mahmah suak hi. Kipawlna ah khantohna leh thalawpna piangsak hi. Mi khatlekhat kikal ki-itna, maitaina khangsak hi. Hi bang mite pen ki-it in ki ngai phadeuh hi. Ki phawk phadeuh hi.

Thopi bangin ninlak bawm in natna pua ihih khak leh ki puahphat theih ahi hi. Mite aading nektheih na hoih a sem Khuaivah bang ihih nading hanciam ciat ni.

Lai-at Nk Khanno (Zingsol)
10,12,2017 (8.30pm)