Tho kik ahih manin ~ Sia Do Khup

Tho kik ahih manin ~ Sia Do Khup

“Eite a dingin a hoih lo, i mawhna a kiciamtehna khempeuh, hong phiatsak a, tuate khempeuh singlamteh tungah kilhcipin a beisak ta hi.” KOLOSE 2:14 TDB

SATAN PEN LAI SIANGTHO SIAM HI

Satan i cih pen ama thuneihna tawh mihingte “Mi mawh hi uh ciai” hong ci thei pa hilo hi. “Pasian deih bangin nungta kei teh, tua Lai Siangtho tawh kituak kei teh, hell tung niteh, cina niteh, zawng niteh, guallel niteh, Pasian in nang hong mawksak hi” ci-in Lai Siangtho tawh hong kap den pa bek ahi hi.

Mi khat thong a kiat theih nadingin upadi tawh a kituahlohna teng a genkhia ding sitni kisam a, sitna pa mawhpaihna zui-in thukhen mangpa in a daan thuak ding zah seh hi. Satan zong na mawhna teng Pasian mai ah a genkhia den pa hi. “Hih pa in Lai Siangtho hih mun teng khial hi” hong ci den pa hi.

Tua mawhsakna khempeuh Topa Jesu in singlamteh tungah kilhcipin beisak a, nang hong kimawksakna khempeuh amai nadingin Pasian mai ah ama sisan manpha tawh biakna hong bawlsak hi. Mawhna thaman sihna tawh nang sih tangin si hi.

SATAN ZAT DING LAI SIANGTHO MUN OM NAWNLO

Satan zat theih ding nang hong kimawhsakna Lai Siangtho mun khempeuh adingin Jesu in mawhlawh hong tawisak khin mawk ahih manin Satan zat ding Lai Siangtho mun om nawn lo hi.

TU ZINGSANG NA KHANLAWH CIANGIN

Tuni Thawhkik ni zingsang na khanlawh ciangin Pasian mai ah midik khatin a khanglo nahi ta hi. Banghanghiam cih leh na ihmut kalin mi siangtho na suah nadingin Pasian leh Topa Jesu na thukim khin ta uh hi.

UP DING BEK KISAM

Hih thu na up leh 2021 thawhkik pawi pen nang adingin tawntung nuntakna ngahna leh kisuan giauguauna teng bei-in Pasian mai ah Jesu hangin nui siusiau kawmin Pasian’ ta cihna leh gamhluah za na ngah pah ding hi. Hun sia kawmkal ah deihsakna lianpi tawh; Khuata mipa – Sia Do Khup