Theihhuai Kabaw Valley thu ~ J. Thang Lian Pau

Theihhuai Kabaw Valley thu ~ J. Thang Lian Pau

Zomi ten Kawlzang i cih teh Kabaw Valley (KV) kawk diak hi. KV in Kalaymyo kiim pan Tamu kiim kikal mualkuam zang gam teng huamin 1470 sq. miles in zai a, a dung mile 150, a vai mile 20 (a sauna pen Kalaymyo kiim) pha hi.

‘Kabaw’ cih pen Meitei pau hiin, Kawl, a diakin Shan-Bamar te a genna uh hi. Kawl ten Meitei pen Kathe (Kate) ci uh.

1905 kumin khawk nih kisuahin Kalaymyo lam teng Kalay Valley kici tuam hi. Kumpi in 1964 kuma ‘Kabaw Valley Project’ a bawl pan Tamu mallama Myothit kiim teng in KV min ong pua kik diak hi.

KV pen a leitang leh a gam hoihin singkung manpha tawh kidim ahih manin a diakin Khampat-Tamu kiim pen tanglai pek pan Meitei ukpite leh Kawl ukpite kituh zel a, Kawlte gam dana seh bel hizaw hi.

1826, January in Meitei ukpi Gambhir Singh in a General Nara Singh sawlin simsak a, kha khat khit teh la zo hi. 1830 pan KV vaiah Meitei leh Kawl kisiatna suuk to ahih manin India Viceroy (India, Burma, Pakistan, Bangladesh gam li sunga thuneipenpa, British kumpi palai) kigolhin 26/2/1933 kumin thusuah bawlin Kawlte tan ding ci a, gamgi ding buaipihna teng tawh 9/1/1934 in Kawl ukpi tungah ki-ap thei pan hi.

Gamgi – tumlamah Murin mual bul, Suahlamah Chindwin gun (Meitei pauin Ningte), mallamah Luhova khua, simlamah Nawsawengan lui zanggam a lutna ciang. Gamgite pen Chindwin gun cih loh ciaptehna kician theilo ahih manin tulai taka gamgi pen India leh Burma kumpi bawlkhop kik hi. Hih zong deih bang zo loin Kalaymyo pan mile 57na Zohmun (Bohkan) kiim tenga Kalaymyo-Tamu highway mile 2 tang ding in India sung tawn kha lai hi.

KV a taan manun Meitei ukpi (Raja) ten na sa mahmah uh a, Gamber Singh tapa Chandrakirti hun pan compensation kha sim Rs. 500/- ta 1950 dong kipia hi.

Kum zalom 13na pawlin KV ah a nei tuam a uk tuam mel om loin Shan, Kadu, Kasak, Thak, Kwantia, Ingues minamte teeng uh hi. Shante tam penin a sawt teh Shan-Bamar kici a, tu ciangin Shan pau zang thei mel om nawn loin Kawl tawh khen haksa ta hi. Galpi nihna khit pan Zosuante zong kilut suksuk a, tu ciangin a tam pen pawl kihi ta hi.

1911 in khua 77 leh milip 20,982 pha in, 1972 teh khua 236 leh milip 115,265 pha a, tua lakah Kawl 70,551; Zosuan (Chin) 44,420 om hi. Tulai takin khua 284, inn 83265, milip vekpi 4,40,376 lakah Zosuan 200000 val leh Kawl 230000 val om a, minam pawlkhat a diakin Shante Kawl suak a tam man hi kei le minam malin Zosuan (Chin) mah kitam bel ding hi.

KV gam pen Zomi ten zong sim zel in, ciapteh theihah 17/10/1887 in Sihzang ten Sitpauk khua simin mi 7 that in, mi 45 salin kai hi. 29/10/1887 in Kamhau ten Khampat simin mi 7 mah that in, mi 27 ciahpih uh hi. (Hih pen a tom thei pena gelh hi) J. Thang Lian Pau