The World Trade Centre 9/11 ~ Thang Lam Tuang

The World Trade Centre 9/11 ~ Thang Lam Tuang

Ka nunktakna sung ah 9/11 2001 ni-in,khuavak ma deuh in, nakpi in khua a mial dantawh kibang hi. Leitung ah ka it ka ngaihpen ka phellang a hi Jim Sands in hong nusiat ni lian a hihi. A mahpen tuainn sangpi WTC dawl 101 na-ah a nasep laitak hi in, mihing ngaihsutna a neilo, mi gilo te taih na ha’ng in, a leitung nuntakna hong nusia hi. Zatui zuak nasep sem in, ka pasal anglai-ah nop kasak mahmah uh, ka ki-it mahmah sanlaitak in, tua mihi lo te ha’ng in, meigong nuntakna ka tung hi. Leitung ah ka it ka ngaih pen, hong it hongngai penpen, ka lamet na pi penpen in, hong nusia hi mawk in, kua kua in hong hehnem zo kei hi. Kei le kei zong, na kasa tawntung aa, lungkham meii bang hong ziingta ei maw ci-in, nisim in khitui tawh ka kidim den hi.

Sepnop bang mah ka neinawn kei a, ka hunte maigumna leh khitui tawh ka beisak den hi. 9/11 tuahsiatna hong pian ma-in, ka pasal tawh nuam kasa mahmah uh a, Christian ka hih ha’ng in, laising tho sim ngei cihtha dah, bu khat zong ka nei kei lai hi. Pasian ka upna toi mahmah in, ka upna pen, mitawh kipawlna dan ciang lel in ka ngaihsun kha hi. Tua hun laitak in, ka innsung ah, Pasian’thu tawh kisai laibui tuamtuam, na innsung teng ah dim in teh hong kici bang hi zenzen le bel, “na thugen manlua ei, thupiang ding khempueh a genkhol thei nai ve maw, CAT scan (pumpi pailet in et theina setvan nam khat) tawh pumpi en a, i sung a om khempeuh pailet in a kimu dan bang lian ei” ci-in ka dawng kik kha ding hi.

9/11 zawh kum 1 khit teh, ka nuntaknah tampi hong ki lamdang hi. Mi namtuamtuam tawh ka kithuah kha a, a maute hong thapiakna hehnepna ha’ng in, Pasian tawh hong kinaisak in, hong Gumpa ka upna zong hong khang semsem hi. Ka thu uppih ka lawmten, tha hongpia, hong henem in om den in, a mau hangin zong , ka lungtomna, ka gitlohna te hong bei hi. Ka nuntakna, khiimbang a ziing sate, nibang hong taang kik hi.

Mi pawlkhat ten upna khaiicii tuh in, pawlkhat ten tuibuak hi. A hi zong in Pasian bek in, hingsak thei hi. (Korentu Masa 3:6) cih dan lian in, ka lawmten ka tung ah upna khaici hongtuh in, tui hongbuak aa, Pasian in zong hong hingsak tak-pi a hih man-in, tua kum a kipan, hongtan khia Topa ka lungsim khempeuh ka nuntakna khempeuh tawh um-in, ka nuntakna ah, No.1 ah Topa ta ka koihden masak ding in, kician tak-in ka khensat hi.

Hi bangteng tawh lukhamna limlim, tuak kha nawn in kaki um kei hi. A hi zong in, ka lawmpa hong nusiat zawh kum 5 khitteh, breast cancer nei cih siahuai ten hong gen leuleu hi. Kei zong ka zakphet in 9/11 2001 zingsang ni dan mah in, “Hi thei kei..piang thei kei” ci-in, kei le kei ka phun gawp hi. Lungsimnat hong kipan leuleu in, tualaitak in, tuuma kum 5 lai a hongnu sia, ka pasal Jim Sands i anglai ah lum-in, hong thapiak na aw neem te ka lunggulh mahmah hi. Tua ka lunggulhna in, ka natna hong nasia sak semsem zaw hi.

9/11 laidan mah in, khat vei, deihtak in thala pha in, ka Pasian bek in hih natna pan honghun khia zo ding hi ci-in, deihtak-in upna tawh ka ki ap hi. Kumpi’te Kumpi, leitung na khempeuh a bawl a uk, saituipi phelnih a suah, cinate damsak in, misi te a thosak kik thei ka Topa’n hihlah khat zong nei lo ding hi ci-in ka um ngiat hi. Tuakhit ciang in, ka ngawng hong kikawi in, hehnepna aw nem te kaza kik hi. Ka lunggulh mahmah ka pasal Jim Sands i khut le aw nemte hi lo-in, tuasa’ng a nuamzaw i biak Pasian awnem a hi “Kei mah in Pasian ka hihi.

Leitung vantung na khempeuh a bawlpa ka hihi. Kei a ding in a piangthei-lo om a hi hiam? (Jeremiah 32:27). Tawntung Pasian in nangma omna hi aa, nang mah huh ding in, khutte a om hi(Thuhilhkikna 33:27). Leitung a hi a, vantung a hi zong in, thuneihna khempeuh, kei hong kipia ta hi (Matthai 28:18).” te in hong hehnem in, hih natna pan damngiat ding cih upna ka sung ah hongguan hi.

Nih vei ki at( surgery) in, 32 vei dat tawhkihal (radiation treatment) in, ka hih khit teh, ka natna pan-in ka damsiang takp hi. Topa’hoihna ka phat hi. 9/11 a kipan, kanuntakna ah, lunglen khuangaihna le breast cancer natna te ka thuak ha’ng in, tua te ha’in Topa’ hoihna te sinkha in, a Ma’ angsung ka tun lawh hi. Topa in, natna pan damna ah, lungkhamna pan lungnopna ah hongtun pih a hilam ka mukhia hi.

Ka it mahmah ka pasal hong nusiatna le a kihtaak huai mahmah breast cancer te ka ngah ha’in, gimna namkim thuak in, lungleng khua ngai in ka om ha’ng, hih ka thuakna te in nah, i tawntung inn ding a hi i Topa’ angsung ah hong tunpih zaw a hi hi. Tua aih man-in, i nuntakna ah hi bang hamsatna te i tuah ciang, i Topa tawh ki nai semsem nading step a kah to i hih lam phawk kim tek ni. From Chicken Soup for the Soul: Devotional Stories for Women/ Thang Lam Tuang