Thautawi kipawlna pen phuat ziauziau theih hilo

Thautawi kipawlna pen phuat ziauziau theih hilo

Thautawi kipawlna pen biakna pawlpi phuat dan a phuat ziauziau theih hilo hi. Sumpi leh sehsuah kidonna mun hilo hi. Leitung ah Zogam ah thau tamman pen hi.

Ei’ bawltheih pen huihthau leh Zothau hipan hi. Tuate tawh lah kuamah kineh ngam ding hisamlo hi. Galkap khat neih theihna ding in atawmpen kawlsum teng 100 bei hi. Galkap asuah khit teh “Huih nadik inla tua tawh na nungta mai o” ci a nusiat theih ziau hilo hi.

Bulphuhna ding mun (base) kisam hi. Kikapna om leh aliam abai omthei hamtang ahih man in tuate koi ah puak ding cih zong bul kician ih neih kei leh vaisah mahmah hi.

Khatvei kikap in ih zawh nak leh amanziau hi peuhmah lo hi. Anunggu tampi omthei lai hi. Kawl galkapte bang in cikziatna themcik zong neilo in a upmawh teng uh aphialmang den uh ahi hi. Khuazang in ahaltum uh tam mahmah hi. Numeite buangawp lai den uh hi.

Thautawi vai pen thutam mahmah hi. Thautawi hoihlo cihna hi hetlo a zangkhai ngaihsut ziauziau theih ahihlohna thu tawm ih gennopna hizaw hi. Minam thautawite khempeuh in “Naypyitaw lading in kawl teng vatmai ding” cih ngaihsutna anei khat zong omlo hi.

Thautawina bulpi pen “Ong ki simmawh lohna ding leh ei leh ei kidalna ding” cih hizaw hi. Tua teh ih thugen Ong ki thulak ding deihna ahi hi. Naupang khat tawh ih kitot laitak akhut ah hiam (temta ?) khat atawi lam mu leng ih hopih dan ki lamdangzo veve hi.

Sen Gam phutkhia Mao Tse Tung in: “Political power grows out of the barrel of a gun ( 枪杆子里面出政权; pinyin: Qiānggǎn zi lǐmiàn chū zhèngquán)” Naci hiau hi. “Thuneihna pen thaumuk pan khangkhia hi’ ci hi. Tulaitak a Zakhai galkap mangpa in: “Strength is the solution” အင္အားကအ‌ေျဖပဲ ci hi. “Thahat leng deih kingah” acihna in kasang hi.

(Kuamah na kisuang zel kei vo maw. Kuamah kawkna hi zenzen lo ahi) Lungdam, Mung Laan Thang (Tawmvei, Yangon)