Thal lam cil siat ei’ tung mah hong tu kik

Thal lam cil siat ei’ tung mah hong tu kik

Haman in Jew mi khempeuh kithah nadingin thu vaihawmhawm a, ama phattuam nading zongin kumpipa’ pahtawinop mipa a kibawl dan ding zong ama ut dan tektek in pulak hi. Ahi zongin mah in, lungsim kawi leh gitlohna tawh thu vaihawm ahih manin ama ngah dinga a lamet gamh hoih leh za’ neihna khempeuhte pen, thutang takin dikna tawh ana nungta khinkhian Modekai in ngah hi.

Haman’ thusia vaihawmna in ama maizum nading bek tham loin ama sihna ding dong tak piangsak a, Modekai ii nahoih sepna in amah suaktasak bek tham loin pahtawina leh minphatna zong ngahsak hi.

Mite’ siat nading vaihawmna pen eima siat nading bekmah vaihawmna hi-a, i hih theihna bangbang tawh midangte huhin i panpih pen eimah hong kipahtawikik nading leh hong ki laptoh nading ahi hi. Mikim in i vawh bang tekin a gah i at kik ding hi. Siatna i tuh leh siatna i at kik dinga, dikna i tuh leh dikna mah i at kik ding hi.

A diktat mi khat siatsak ding a hanciam pa pen ama tawhsa gum sung mahah kia ding hi. A dik mipa in gamh hoih luah ding a, migilo pa in bangmah luah lo ding hi. Paunak 28:10

Khazih sungah,
David Tuang