Thailand ah tuilian hangin mi 8 sita

Thailand ah tuilian hangin mi 8 sita

Dec. 8, 2016: December kha kipat cil panin guahpi a nasiat luat manin Thai leitaw lam teng ah tuilian a, tu dong mi giat in sih lawh ta hi. December kipat cil panin 150 – 200mm zu ziahziah den a, tua hangin khuata 1,245 leh district 18 ah tuikhang ahih manin lampi leh meileeng lampite Nakhon Si Thammarat sunga om Thung Song ah kizang thei lo hi.

Hih tuikhang pen Thai leitaw lam bek hilo-in Malay Peninsula leilu lam, Myanmar leitaw lam leh Mergui Archipelago lam zong nawk suk ta hi.

Nayong district ah tui 80cm in vung zo ahih manin lampite pai theih ding leh zat theih ding hilo hi kici hi. Gulf of Thailand kiim-ah zong guah nak zuk mahmah lai a, khuan (holiday) ngah ten khualzinna ding mun-a a nak zat mahmah uh Koh Samui ah zong tuikhang hi. A beisa naikal 48 in 90mm guah zu ziahziah a, tu-in bel tui kiam deuh ta hi kici hi.

Hih guahpi pen Andaman Tuipi panin hong kipan a, mun niamna mun tengah guah nak zuk mahmah hi. Guahpi pen tropical cyclone kici huihpi tawh a kithuah loh hangin guah zukna kiim teng lumsak henhan mahmah hi kici hi.

More: Rohingya tebek UN Card kipiahen ci’n Malaysia Minister khatin genkhia

Thai gam-a mun niamna mun-ah tawl khat zu lai dingin ki-ummawh a, Andaman tuikulh ah nasia semsem lai ding ahih manin Andaman tuikulh-a tengte adingin lauhuai hi kici hi. Source: Al Jazeera And Agencies/ Thang Khan Lian