Thailand ah Kawlgam numei abuansawm khat temta tawh kidawtlum

Thailand ah Kawlgam numei abuansawm khat temta tawh kidawtlum

Thai gamsung ah Saturday (Mar 18) ni in Kawlgammi numei khat in amah abuansawm, Rape dingin akithawi pasal khat temta tawh dawtlumkha cih Sunthit pan kiza hi. Tua mibuanding in akithawipa, dawtlup athuakpa zong Kawlgammi mah hiding kici hi.

Buan athuak dektak tua numeinu minpen Suh Suh Zin kicikhat hi a, kum 21 aphakhin khat ahihi. Amahguak inndei khat asaap in aom hi a, ahi zongin agei ahzong Kawlgammi te mahtawh aomkhawm uh ahihi.

Suh Suh Zin pen Saturday ni zingsanglam nasem kuanding in akithawithawi hi a, akisil khitciangin innsung ah lutkik hi. Innsung panin nasem kuanding apaikhiat madeuh zingsang 7am hunpawl in innkongkhak kikiu hi. Amahzong innsaapna inndei tawh akizom aom akitheihpih numei khat ahiding salel ahih manin kong honkha hi.

Ahi zongin a upmawh alawmnu nahilo in, atheih ngeiloh pasalkhat nahimawk a, inndei sungah luttinten in, Suh Suh Zin zong na otpeuhmah leh hong thatding cihi. Tuakhit ciangin tua pasalpa in Suh Suh Zin pen buansawm ahih manin, amahzong acihnading theilo in, akimaimai leh anhuanbuk ah azat temta khat maikha ahih manin, tuatawh abuansawm pasalpa dawtsuk ek hi.

A gawlgui lianah dawtkha bilbel ahih manin tuapa pen aphual mahah sipah hi. Thai Police te ki zasak in, tua innsungah aomte zong kidong kawikawi a, ahi zongin tua mibuansawm pasalpa pen atheingei kuamah omlo uhhi.

Thai Police te muhkhiatna ah tua pasalpa in Suh Suh Zin pen buannuam ahih manin encik gigeden hiding a, ahunlem angakngak khat hidinghi ci uhhi.

More: Thai ah Kawlgammi 2 sihdan mah kipiakik veve

Tuaban ah Thai Police te’n tuapa sitcianna aneih uhciang in Kawlgammi khatmah ahihlam mukhia uhhi. Asi pasalpa ii aluanghawm pen zato ah Postmortem bawlding in kipuak a, Suh Suh Zin pen Police Station ah thudotna neiding in kipaipih cih kiza hi. ZD Sawltak #zomidaily