Thai gamsung sanginn gei ah Bomb puakkham, mi 3 si, sawmval liam

Thai gamsung sanginn gei ah Bomb puakkham, mi 3 si, sawmval liam

Thai gam leitawlam aom Narathiwat Province sung sanginn gei khatah akikoih Motorcycle tungpan Bomb puakkham in mi 3 si cih Tuesday ni in AFP News pan kiza hi. Hih asi mi 3 lakah naupang kum 4 aphapan khatleh apa zong kihel uh cihi.

Thunei te genkhiatna ah hih Bomb pen Motorcycle ii sathau koihna kawmah aki selsim hi ci uh a, agamla panin Radio Control tawh aki mektamthei dingin akibawl ci uhhi.

Zingsangtung sangnaupang te sanginnlam zuanin apai ngeingai laitak in aki puakkhamsak hi a, apuakkhapna munpen sanginn kongvang lutna School Gate tawh kinai mahmah cihi.

Aliam te zato ah kipuak in kikhoi uh a, Hospital Worker te genkhiatna ah asi tepen Muslim te vive hi ci uhhi.

Hih Thai leitawlam pen Muslim biakna te tampi omna leh Thai gamsung ah buaina apiangsakden munkhat hi a, 2004 kum akipan hih kuamsungteng bekbek panin mi 6500 bang sikhin kici hi. Thai gampen Buddhist biakna vive atamzaw aomna, ateenna hi a, hihkuamsung teng ahihleh Muslim biakna te atamna khat hi in, buaina piangsakden uhhi.

Atung a lim (Photo) pen Bomb puakkhapna mun hi a, sangnaupang khat ii sangthungkuah lamzikpi gei ah akangbaang in kilawn leulau a, khasiat huai mahmah hi. ZD Sawltak #zomidaily