USA, Texas State aom biakinn sungah kikhop laitak thautawh kikap in mi 27 si in tampi liam

USA, Texas State aom biakinn sungah kikhop laitak thautawh kikap in mi 27 si in tampi liam

USA, Texas State sung aom biakinn sungkhat ah nipini kikhop laitak thautawh kikap ahih manin, mi 20 valbang sikhin in, adangzong tampi liam cih BBC pan kiza hi.

Police te genkhiatna Texas, Wilson County sung aom Sutherland Springs khuasung ah ah thautawi pasal khatin biakinn sungah kikhawm in aom mipi te akapgawp cihi.

Sutherland Springs khuasung aom First Baptist Church kici Tuiphum biakinn sungkhat ah Sunday zingsanglam 11:30am (Local Time) hunpawl in thautawi pasal khat biakinn sungah lutin akapgawp ahihi.

Wilson County Commissioner Albert Gamez Jr in agenkhiatna ah tua thautawipa pen biakinn sungah mipi akapgawp khitciangin tuaphual panin mawtaw tawh taikhia cihi.

Ahi zongin tua thautawh mipi akapgawppa zong Police te’n kaplum uh cih kiza hi.

Hih First Baptist Church biakinn sungah nipini simin akikhawm pen mi 50 tabang aphazel hi a, hih aki kaplum te lakah naupang pawlkhatzong kihel hi.

Wilson County Commissioner Albert Gamez in CNN te tungah agenkhiatna ah Emergency MEdical Technician te tungtawn in asipen mi 27 bang phading ci a, adang aliamzong mi 24 bnag liamding uh cihi.

Hih First Baptist Church biakinn ah Pastor asem ahi Frank Pomeroy inzong ABC News te tungah agenkhiatna ah atanu kum 14 aphapan ahi Annabelle zong thautawh kikapna ah hongki kaplupsak hi ci’n genkhia hi.

Pastor pa ahihleh thau kikap laitak in khuasung ah omlo a, Oklahoma lamah azinkhiat laitak ahihi. Ka tanu amelhoih mahmah, ka it phadiak “one very beautiful, special child” pen thautawh hongki kaplupsak hi ci’n Television Outlet tetawh Phone Call akibawl laitak in genkhia hi.

Hih thautawh akikap laitak in ageinai panin amukha Carrie Matula kici khatin NBC News te tungah agenkhiatna ah kopen biakinn panin 50 Yards aki gamlatna pawlah ka omlaitak uh hi a, Semi-automatic Gunfire pen kaza uhhi. Hih khuasung pen Community neukhat ahih manin, bangthupiang cih mikhempeuh in ki lunglut mahmah hi ci’n genkhia hi.

Hih thau kikapna apian laitak in Pastor pa leh azi pen khuasung panin azinkhiat laitak ahihi ci’n ageinai aom biakinn “River Oak Church” te’n KSAT 12 ah genkhia hi.

Sutherland Springs pen khuaneu “Rural Community” khat hi a, San Antonio City panin 30 Miles (50km) bang agamla khuata khat hi a, khuasung mipi zong tawmcik khat ahihi.

San Antonio FBI branch te genkhiatna ah hih thau kikapna pen mikhatbek ii gamtatna hiding ci a, athu hoihtak akancian laitak uh cih kiza hi.

Texas governor Greg Abbott inzong hih gitloh ngongtatna ah asi aliam te adingin thu kongngetsak uhhi ci’n genkhia hi. Law Enforcement te’n ahunlap in adelhpah uhpen lungdamhuai mahmah a, athu akicianzaw in Texas Department of Public Safety panin hongki tangko khiakikding hi ci’n genkhia hi.

More: Las Vegas thaukikapna misi 59 phakhin, aliam bekbekzong mi 527 pha

President Donald Trump zong Asia gamsung azin kawikawi laitak hi a, tulaitak Japan ah aomlian laitak ahihi. Texas, Sutherland Springs khuasung mite Pasian in hong ompih tahen ci’n President Trump in Twitter ah gelhkhia a, Japan panin kong Monitor den hi cihi.

Nungdiak mahmah inzong Las Vegas khuasung ah thautawi khatbek in mi tampitak kaplum a, tuathusia apianzawh khakhat bekbek hipan hi. Sawltak #zomidaily