Teek leh Mo ~ David Tuang

Teek leh Mo ~ David Tuang

Nute’ Ni hun sung tawh kizom in, “TEEK LEH MO” thu zong gen nuam hang. Banghang hiam cih leh teek leh mo i cih teng pen nute vive mah ahi uh hi. Teekte’ ading leh mote’ ading a nihtuak in enkhawm ni.

(1) TEEKTE

Naomi in a tapate a sih khit ciangin lungsim siangtho tak tawh a mote nih(Ruth leh Orpah) adingin a hoihpen geelna leh ngaihsutna neihsak hi. A mo khatzaw ahi Orpah in bel a teeknu(Naomi) gen mah bangin ciahsan pah a, Ruth in a hih leh a teeknu’ painana-ah pai ding, a teeknu tawh nungta khawm ding leh a teeknu’ sihnana-ah si dingin hong khentat hi. Naomi in a monu Ruth pen ama’ sunga piang tanu mah bangin it-in deihsak a, a zingvai nitak vai ding teng hawmsak, geelsak hi. Naomi in a it mahmah a monu Ruth pen ama’ adingin a muan, a suanpen leh a kisaktheihpihpen hong suak hi. Naomi, a monu Ruth in a it theihna dingin ama’ lampan itna leh deihsakna na nei masa cih i phawk ding kisam hi.

Tuhun Teekte in zong na mote uh no sunga piang tanu te mah bangin hong it un la, lungsim siangtho tak tawh a zingvai nitak vai ding uh hong hawmsak diamdiam un. No zong hun khat lai-in mo hi ngei na hih manun mote nopsak ding, nopsak loh ding cihte no tuahkhakna tungtawn in tel mahmah ding hi uh teh, cih kigen nuam hang. Na mo/mote’n hong it zawh kei uh leh khasia pah, mudah pah, hehpah, gensia pah cihte zangh loin, hong it theihna ding uh hanciam in thungen in la, kipuahphat dingte kipuah pha zaw un. Limtak ki ngaihsun le uh teh na kipuahphat ding uh tampitak mah na om veve ding hi. Naomi bangin teekhoih khat hi, cih taangthu hoih hong gelh le uh cin na tu na ta khang vuah teekhoih na hihna uh na kisuut kikkik ding hi.

(2) MOTE

Ruth in ama’ mailam ading maban hoih tampitak neizo lai ding himah taleh a teeknu tawh nungta khawm ding leh a teeknu’ sihnana-ah si dingin hong khentat hi. A teeknu’ zingvai hawmna pawlkhat a haksa leh a zumhuai phial zah dong om mah taleh a teeknu’ zingvaihawmnate nial hetloin thumang takin hong nungta toto hi. A teeknu nusia lo bektham loin, a teeknu’ tungah thuman citak ding leh a teeknu zingvaihawmna nuai-ah kiniamkhiat takin nungta dingin Ruth in hong khentat ni pen, a daupai kipat ni leh a maa a kihon ni hong suak a, tua nungah a teekta un thupha hong ngah mahmah uh hi. Ruth in mo hoih hihna tawh cikmah hunin a bei ngeilo ding taangthu hoih mahmah hong gelh hi.

Tuhun mote/nupite in zong na teekte uh it in zahtak un la, mo hoih hong hih sawm un. No zong nikhat ni ciangin teek dinmun ah a om ding na hih manun na at nop loh uh, na thuak nop loh uh khaici vawh kha kei un. Banghang hiam cih leh i vawh bangin ki-at kik hamtang hi. Teekte’ zingvai hawmna nuai-ah kiniamkhiat tak leh thumang takin hong nungta peuh le uh cin na maa uh vangin na dau uh hong pai dinga, no sung pana piang na suan leh khakte un thupha ngah ding uh hi. Teekte’ khutnuai-ah thumang tak leh kiniamkhiat taka nong nuntakna uh pen guallelhna bangin ngaihsun kha hetkei un. Gualzawhna taktak hizaw hi. Na teekte un hong it zawh kei leh khasia pah, mudah pah, hehpah, gensia pah cihte zangh loin, hong it theihna ding uh hanciam in thungen un la, kipuahphat dingte kipuah pha zaw un. Limtak ki ngaihsun le uh teh na kipuahphat ding zong uh tampitak mah na om veve ding hi.

A zenzen in, na teekte uh tawh omna a kikhat kei leh zong, na teekte uh phn tawh ahi-a, lai tawh ahi zongin hopih tangtang un. Teekte kisap/lunggulh zong dong zelzel un la, huh in vaak un. No thupha ding mah ahi hi. Sum leh paii tawh na huh/panpih zawh kei phial uh leh zong hopih zelzel in, thungetsak den peuh le uh cin na teekte uh lungkim mahmah ding uh hi. Teekte it loin, simmawh a teekte awlmawh loin a thusim lote daupai hetlo uh hi, cih pen i theihsa ahi hi.

Kei bang ka zi-in ka nute(a teekte) hopih mun sa lua kahih manin(khatveivei)hopih mun lua liang teh ka ci thei zel hi. Ka nute sum ka khak ding ciangun zong ka zi-in, tua zah bek tawm lua hi, cing lo ding hi, hong ci den ahih manin kei khak sawm zah sang vua tam zaw ka khak kha den uh hi. Tua ahih manin no pianna nu leh pa na it mah bangun na teekte uh hong it un. No pianna nu leh pate mah bangin na teekte’ tunguhah khang tampi kizom ding thupha ana nak om lua ahi hi. Mohoih hihna tawh taangthu hoih hong gelh un.

Teek leh mo ki-it, kilemte’n thupha ngah hamtang uh hi, cih pen Ruth leh Naomite’ tung tawnin kimu thei hi. Tua ahih manin cithei nuamsa in, khang tampi kimang ding thupha i ngah nop taktak leh “teek bekin it in, mo in mudah, mo bekin it in teek in mudah,” cih dan kingah lo a, i nih in ki it tuah ding ahi hi. Ruth leh Naomi te mota/teekta bangin taangthu hoih nei-in thupha ngah khanggui a suak thei dingin teek leh mo khempeuh Topa’n thupha hong pia ta hen. Amen 🙏.

Khazih sungah, ✍️David Tuang