Tedim te’ Zokam Awphei (Vowel) Thu ~ Rev. Khoi Lam Thang

Tedim te’ Zokam Awphei (Vowel) Thu ~ Rev. Khoi Lam Thang

Tedim kampau Zomite in ‘awphei’ (aw suaksak thei zong kici) i neihdan tomkimcingin kong pulak nuam hi. Sanggam Zomi dangte tawh i kibat lohnate i Tedim hihna hipah hi.

1. Awphei mal 5 bek

Tedim awsuah (Phonetics) ah awphei nga bek – /a/, /e/, /i/, /ɔ/ le /u/ – i nei hi. Lai i gelh ciangin (orthography) awphei mal guk – [a], [e], [i], [o], [aw] le [u] – i nei hi. (Killikual [-] pen Orthography lahna hia, ciangsawi /-/ pen Phonetic transcription lahna ahi hi. /ɔ/ pen awphei khat bek ahih hangin laigelh ciangin malnih ‘a’ le ‘w’ gawmin ‘aw’ in gelh hihang.

Tedim awphei malngate

• (1) [a] = Ka pa’ ha a na
• (2) [e] = Be na ne ve
• (3) [i] = Mi li kisi hi.
• (4) [aw] = dawhdan, mawhna, nawizu. /ɔ/ tanga [aw] kizang ahi hi.
• (5) [u] = Utong, pu, nu,

Zolai ah i [o] neih pen /o/ taktak (phonetic value of /o/ according to IPA) hi lo hi. [o] ci a i gelh pen awpheikop (diphthong or vowel glide) hi-a, /ou/ ahi hi. Siapi Vul Za Thang in “[o] is pronounced as /ou/ in November” ci a, Rev. S.T. Hau Go in “[o] pen consonant khit ah a nunung pen a i zat ciang le amah guak a, a din ciangin phonetic zui in /ou/ aw nei hi” ci hi. Cih nopna in /o/ lo pi [o] a kigelh cihna ahi hi. Zolai simbu sungah “Lo no po zo lo hi” ci a i gelh pen a khial hi lo napi, a awsuak bang tektekin a gelh ding hi leng, “Lou nou pou zou lou hi” cih ding ahi hi.

2. Awphei kop mal 10

Awphei malnih a kikop cianga, awmal (phoneme) a piangsakte (Diphthong ahih kei leh vowel glide kici) ahi hi. Mal sawm i nei hi.

• (1) [ia] = Biakna
• (2) [iu] = Kiukawi
• (3) [ei] = Leitung
• (4) [eu] = Keubawm
• (5) [ai] = Aisa
• (6) [au] = Kausi
• (7) [oi] = Khoi
• (8) [o] = Lo no po zo lo hi. Hih [o] i panmun taktak pen /ou/ ahi hi.
• (9) [ui] = Uisa
• (10) [ua] = Khuado

Tedimte’ Zokam ah khat veivei cieciai cih bangin a gelh kiom thei hi. Ei innkuan sung veve ah
Neam cih bang, Nieng cih bang zong om thei hi.

3. Awphei thumthuap mal 4:

Awphei malthum a kithuap cianga, awmal (phoneme) a piangsakte (Triphthong) ahi hi. Mal li i nei hi.

• (1) [iai] = Liailiai
• (2) [uai] = Huaiham
• (3) [uau] = kihuau
• (4) [iau] = liautuak

A huampi thu-in, Tedim kampau Zomite in awphei 5, awpheikop 10 le awphei thumthuap 4 a nei i hi hi. Pa Hau Thang gen ‘AW’ suaksakthei 11 te – a, e, i, o, u, aw, ia, ei, ai, oi, ui – a vekin kihel kim hi. Lungdam.
Rev Khoi Lam Thang (Yangon)