Tedim khuasung lampi vai: Theilohman hi zaw khong

Tedim khuasung lampi vai: Theilohman hi zaw khong

Khuasung lampi kikek/ golsak ding ciang a huang neite phalna ki ngen masa phot hi. A zenzen in a phal kei uh leh ki khoih saklo hi. Leitang huang lampi ding in ki kek sak leh liausum (ေလ်ာ္ေၾကး) a ngah ding dan in ngaihsun uh hi. Kumpi in tua liausum ding budget hong pia zenzen lo hi. Ngaihsutna lianpi tawh khuasung khantoh nang i deih taktak leh tawm bang bel supna/baina om kha mah ding hi. Galkap thuneih hunlai bang in zawhthawhthu tawh kikalsuanlo hi.

Ih minam leh i gam i khualna zong hoih mahmah hi. A hi zong tuipigal khatpan thu tel munmel neilo pipi in i mawk ciakciak pen deihsakna tawh a sem a bawlte a ding thanemna zong hi thei hi. A vei taktak i hih leh a mun vapha ngiat in a thu a la limtak kantel masaphot leng hoihzaw kha ding hi. Kum 5, 10 sungbang i om loh ciang omdan khawldan tampi ki lamdang mawk hi.

Tedim khuasung lampi vai: Gen kikkik mah leng

Lampi a ki-kek/golsakna munte pen lampi mah in koih lel leng hoih zaw lo ding a hiam? Eimau innmun/logam letmat khat nangawn a mawk piak ngamlo leitang manpha a sa phadiak minamte ihi hi.

Tua hi aa eimau innmun leitang i piak lah hilo lamsaklam ki-kek leh lamkhang lam te’n a sak neh to pah sese mawk ih hiam?Lampi a gol zahding a gol theih loh na pen tua ziak ahi hi.

Eimau innmun letmat khat nangawn pia ngawmlo i hih ciang mipileitang /lampi te keklek se dah hi.Pak/mehteh mehgah zong lampi dung teng um in suansuan dah zaw leng. Lampi mun neu tuam sak mahmah hi. I ciin nop leh gamlak ah leitang val ciin theih na ding muntampi omlai sam hi.

Ngaihsun taktak leng eimau leitang i piak sangsik lampi khawng i kekkek pen daupai huai hetlo hi.I pu te i pa te hunlai a mau a lopi innmun/lo gam na deih tuanlo uh hi.Huang kek/ kigi khin cihte zong luang in tuak ci’n thucin thutang in na nei tangtang uh hi.

Mipiphat tuamna ding ahih nak leh i huang pi khat pi nih ciangciang piak huai zawlo a hiam? Leitang manpha i cihsam hang tua pi khat pi nih sungah bang piang tuan sam diam?Suai a piang ding cih hi leh thu khat.

Nuntak tomkal sung eimau innkuan mimal noptuam nading sang mipi tampite noptuamna-ah leitung thupha/vantung thupha om zaw ding hi.Hakai pahtak lungleng a cih bang tek in i muan i suan tata hong gen hak zaw thei mawk uh hi.

Tedim khuapi khantoh ding i deih takpi leh huang kekkek nawnlo in a kisap leh eimau huang nangawn pi khat pi nih i piak zawh ding thupi ding hi.

More: Tedim ah Bus Station kician neihhun mahmahta

Sakhi in a tat nang kuamkua khual a cih bang mailam hun ding saupi ngaihsun in inn i lam ciang lampi gei neh pah tentan lo zaw in mawtaw buk ding leh nikhat ni ciang lampi hong kikek kha leh cih ngaihsun kawm in nasem ni!!! Tedim Municipal